Alom Ɛshɔwɔ nya long gɔ nwɛr Aluk 2 - Nnam

Na Bɔ Jɛlɛ Jisɔs

¹ Gɔ ngarɛ Ntola atol Ɔgɔstus akagɛ njang rɛ bɔ lim ɛfalanɛ gɔ ɛbjabɛ Roman kpɛk kpɛ ji yɛ le ntoboɛshi.

² Ɛfalanɛ jiya ji jɔlɔ mgbɔgambang ɛfalanɛ tabɛ na Kurinus jɔlɔ Ntoboɛshi gɔ Siriya.

³ Ɔwɔ nɛ awɔngawɔngɔ fɛrɛ nɔ tam gɔ ɛshi ɛjabɛ ɛjɛ shɔng kag mbing ɛnye gɔ nwɛr.

⁴ Ɔwɔ Josɛf kim mɛlɛ Nasarɛt gɔ Galili ring Bɛtlɛhɛm gɔ Judiya, ɛjabɛ ji Defid, lɔng nɔ teb rɛ yɛ lɔng ɛbange nab ajing na Defid.

⁵ Ajɛ ɔ na Mɛri, nɔ bɔ mitamɛ rɛ akɔɛ gɔ ɛbal shɔng kag mbing ɛnye fufɔ gɔ nwɛr ɛfalanɛ. Ngarɛ nyiɔ Mɛri ɛbshala.

⁶ Na bɔ jɔlɔ ɔ, ngarɛ ɛjɛlɛ mɔnɔwɛ ɛring.

⁷ A jɛl mgbɔgambang a mɔnɔwɛ, nɔ nlom. Arɔd mɔn kpɔngɛ gɔ abɔmɔ bom gɔ ɛkpagɛte ji bɔ kpejɔ ka ɛbol nshɔl alɛgɛ, teb rɛ ɛyagɛ kpɛm jɔl ka bɔ gɔ njobkang.

Ba babɛ ɛbol na balɔgɔ ɛbtom Ɛshɔwɔ

⁸ Gɔ ɛjangɛ ɛbjabɛ jiɔ, bɛlɛ ba babɛ ɛbol ba jɔlɔ ɔ gɔ ɛwingɛ jɔ babɛ ɛbolo bɔ atu.

⁹ Ɔwɔ balɔgɔ ɛbtom Ɛshɔwɔ lɔngɔ bǝkpere bɔ. Ɛblobo Ɛshɔwɔ ya bolo bɔ, Ɛfalfal bɔb bɔ anɛ kpɛk kpɛ.

¹⁰ Nlɔgɔ ɛbtom Ɛshɔwɔ kim tɔngɔ bɔ rɛ, “Kǝfal wan. Teb rɛ mba na nɔbɔ ɛteb rɛ bǝka wan nyi le ka wan anɛ kpɛk kpɛ njijɔg ɛyɛbɛbtem.

¹¹ Lɛl gɔ ɛjabɛ jiya ji Defid bɔ jɛl Ntitarɛ ka wan; Yɛ wɔ le Krayis, Nfɔnɔ ɛying.

¹² Jiya ji nlikɔ gbɛrɛ: Nkpe nyenɛ mɔn nɔ bɔ kpɔngɛ gɔ abɔmɔ bom gɔ ɛkpagɛte ji bɔ kpejɔ ka ɛbol nshɔl alɛgɛ.”

¹³ Tutu ɔ, ɛblɔng balɔgɔ ɛbtom Ɛshɔwɔ lɔng gɔ ɛjabɛ Ntol Ɛshɔwɔ bǝkpɛlɛ na nɔga kime jige Ɛshɔwɔ rɛ,

¹⁴ “Ɛjijige jɔl ka Ɛshɔwɔ gɔ rɔrɔ, Na ɛbkɔnɔ gɔ ɛlitak ga anɛ ba akpe ɛyɛbɛbtem na bɔ.”

¹⁵ Ɔji balɔgɔ ɛbtom Ɛshɔwɔ fɛrɛ nɔ tam gɔ ɛjabɛ Ɛtol Ɛshɔwɔ, ɔwɔ ba babɛ ɛbol kim tɔngɔ atɛm rɛ, “Ɛtam wan gɔ Bɛtlɛhɛm ɛshɔng nyen ɛjom ji milim, ji Nfɔnɔ ɛying tɔngɔ war lagɛ.”

¹⁶ Bɔ kim fɔmɔ tam shɔng nyen Mɛri na Josɛf, na mɔnɔbele, nɔ nɔng gɔ ɛkpagɛte ji bɔ kpejɔ ka ɛbol nshɔl alɛgɛ.

¹⁷ Na bɔ jɛ nyenɛ, bɔ kime ɛtɔngɔ anɛ lagɛ ji bɔ tɔngɔ bɔ lagɛ mɔn nɔ.

¹⁸ Anɛ kpɛk kpɛ ba wogo nɔ lagɛ ɛka ji ba babɛ ɛbol tɔngɔ bɔ, anyar lamɛ bɔ.

¹⁹ Mɛri kagɛ nshɔl nyaa kpɛk kpɛ gɔ ɛbtem jɔ tir lagɛ kpɛk kpɛ ngarɛ.

²⁰ Na ba babɛ ɛbol fɛrɛ nɔ. Bɔ jɔ jige Ɛshɔwɔ rɛ kpɛk kpɛ nshɔl nyi bɔ wogo nɔ fɛrɛ nyen, ɛjɔl na bɔ tɔngɔ bɔ.

²¹ Gɔ nfong ɛnigeni, bɔ kim mɔn ɛri. Kayɛ mbing rɛ Jisɔs, mbing nyi nlɔgɔ Ɛbtom Ɛshɔwɔ tɔngɔ Mɛri akim shagɛ ɛla.

Bɔ jɛ na Jisɔs gɔ Ɛtak gɛ Ɛshɔwɔ

²² Ɔji ngarɛ ringe nɔ nyi bɔ kpofolo nshing na njang a Mosis tɔngɔ nɔ, Mɛri na Josɛf tabɛ mɔn tam awɔ gɔ Jɛrushɛlɛm shɔng bomɛ gɔ ata Nshɔ.

²³ Na bɔ yɛlɛ gɔ njang a Nshɔ rɛ, “Fɛlfɛl mgbɔgambang a mɔn nɔ nlom kpejɔlɔ ka Nshɔ.”

²⁴ Bɔ fufɔ tɔb folo nshing na njang a Nshɔ bungɔ nɔ rɛ: “Bɔ ka ɛmɛb ɛbal tɔgɔ jɔl nɔ mbǝl ɛbal.”

²⁵ Ngarɛ nyiɔ nlolom awan jɔlɔ gɔ Jɛrushɛlɛm nɔ bɔ jɔ lɔngɛ rɛ Simiyɔn. Simiyɔn jɔlɔ nɔba nɛ gɔ mbang Ɛshɔwɔ nɔ bɛlɛ ɛtinge ɛbjini. Yɛ jɔ shege Krayis rɛ aba bǝtarɛ anɛ ba Isɛrɛl. Ɛtɔgɔ Ɛshɔwɔ jɔlɔ nanɛ.

²⁶ Ɛtinge ɛtɔgɔ lingɛ tɔngɛ rɛ anim kpɔ tɛtɛ anyɛn Ntitarɛ nɔ Ɛshɔwɔ mijag.

²⁷ Ɛtɔgɔ Ɛshɔwɔ tomɛ tu gɔ Ɛtak gɛ Ɛshɔwɔ, ɔji Mɛri na Josɛf ba na Jisɔs gɔ Ɛtak Ɛshɔwɔ rɛ bɔ belim na njang a Mosis tɔngɔ nɔ.

²⁸ Ɔwɔ Simiyɔn tabɛ Jisɔs file gɔ bɔ jɔ jige Ɛshɔwɔ rɛ,

²⁹ “Nfɔnɔ ɛying, anu nɔngɔ nlɔgɔ ɛbtomowa shɔng gɔ ɛyɛbɛbtem, Na atɔngɔ nɔ.

³⁰ Teb rɛ mɛ nyen Ntitarɛ,

³¹ Nɔ amɛtom rɛ atarɛ anɛ kpɛk kpɛ.

³² Yɛ wɔ le ɛtrikang ji le lingɛ Ɛshɔwɔ ka anɛ ba ki le Aju, Na ɛblobo ka anɛ ba ba Isɛrɛl!”

³³ Nyen na Ndɛ a Jisɔs lamɛ bɔ anyar na ji bɔ jɔ bung lagɛ mɔnabɔ.

³⁴ Ɔwɔ Simiyɔn folo bɔ, afɛrɛ tɔng Mɛri, nyen mɔn, “Rɛ Ɛshɔwɔ ɛjag mɔnɔwa rɛ alem anɛ gbalɛgbalɛ gɔ Isɛrɛl gbɔ a fɛrɛ lim gbalɛgbalɛ nyamɛ gɔ ɛbku. Wɔ aba na njɛnanɛ nɔ anɛ lebung lagɛ, wɔ anɛ gbalɛgbalɛ nim tamɛ tuɛ.

³⁵ Nɔwɔ akɛkɛrɛ gɔ ntem anɛ gbalɛgbalɛ libɛl ɛblingɛ. Na wɔ Mɛri lijɔla na bɔ jama ɛkangkang gɔ ɛbtem.”

³⁶ Anna, nlikal nɔ kpejɔ tinge ateb Ɛshɔwɔ, tɔb jɔlɔ ɔ gɔ Ɛtak gɛ Ɛshɔwɔ. A jɔlɔ mɔn a Fanuɛl nɔ lɔng nab a Ashɛr, ajɔlɔ ɛkpokol nlikal. Bɔ kɔ atɛm gɔ nnya ɛshima nlom kim kpɔgɔ.

³⁷ Nɔwɔ asha ɛgɔl gɔ nnya atalani a nnya ni. A tirim tam Ɛtak gɛ Ɛshɔwɔ sha a jɔlɔ ɔ atu a njol, ji njal jɔ kag ɛrɔ, jɔm Ɛshɔwɔ.

³⁸ A ba gɔ ngarɛ nyi Simiyɔn jɔ bung na Mɛri na Josɛf, a bɔmɔ ɛjige Ɛshɔwɔ. A bungɔ lagɛ mɔn tɔng nɛ awɔngawɔngɔ nɔ jɔ shek rɛ Ɛshɔwɔ bǝladɛ Jɛrushɛlɛm.

³⁹ Ɔji Josɛf na Mɛri milim ajingajingɛ ji njang Nshɔ tɔngɔ nɔ, bɔ fɛrɛ krɛ nyi Nasarɛt gɔ Galili.

⁴⁰ Ɔwɔ mɔn gbalɛ fɛrɛ kongo; bɛl ngbɛrɛ, ɛbfolo Ɛshɔwɔ jɔl nanɛ.

Jisɔs jɛ gɔ Ɛtak gɛ Ɛshɔwɔ

⁴¹ Ɛbya atingatingɛ Ndɛ na Nyen jɔ jɛ Ɛbkak ni bɔ lɔngɔ rɛ Ɛbkak gɛ ɛbshiri gɔ Jɛrushɛlɛm.

⁴² Ɔji Jisɔs ringe ɛwobo anya bal, bɔ jɛ ɛbkak gɔ Jɛrushɛlɛm na bɔ kpejɔ jɛ gɔ ɛjini bɔ.

⁴³ Ɔji ɛbkak nyiɔ malɛ nɔ, bɔ tam nyi ɛbkrɛ, Jisɔs sha gɔ njam gɔ Jɛrushɛlɛm. Nyen na ndɛ gbɛrɛm.

⁴⁴ Teb bɔ tir rɛ a tɔnɔ anɛ bagɔ. Bɔ jɛn gɔ ɛfong krɔkrɔ. Bɔ kimawɛ bɔmɔ ɛshɛbɛ gɔ ji abinyen na atɛm.

⁴⁵ Ɔji bɔ kiyɛ nyen, bɔ fɛrɛ tam nyi Jɛrushɛlɛm shɔng shɛbɛ.

⁴⁶ Gɔ nfong ɛra wɔ bɔ kimawɛ nyen gɔ Ɛtak gɛ Ɛshɔwɔ, ajig gɔ ɛblɔng batetebe, kpe wongo atong ka bɔ fɛrɛ jɔ bab bɔ ababɛ.

⁴⁷ Nɛ awɔngawɔngɔ nɔ wogɛ nɔ lamɛ anyar gɔ ɛbɛmɛ mgbɛrɛ nyi abɛlɛ nɔ jɔ fangɛ ababɛ.

⁴⁸ Ɔji Nyen na ndɛ nyenɛ nɔ lamɛ bɔ anyar. Nyen kim bungɔ tɔngɛ rɛ, “Mɔn, Jɛn ji wangɛ alemɛ war na? Mɛ na nshɔ ɛfige war ayɔ, ɔji ɛkpa shɛbɛ.”

⁴⁹ Jisɔs kim fangɛ rɛ, “Jɛn ji wangɛ mkpim shɛbɛ? Wan nyim rɛ nkpe jɔlɔ gɔ ɛtak gɛ ashɔjama?”

⁵⁰ Tirim lingɛ bɔ ji ajɔ bung.

⁵¹ Ɔwɔ akim fɛrɛ nyi Nasarɛt, fɛrɛ jɔ lɔgɔ bɔ ɛbtom na wogowogo. Nɔ wɔ nyen kagɛ nshɔl nyaa gɔ ɛbtem.

⁵² Jisɔs gbalɛ na mgbɛrɛ na ngɔbjing. Ɛbkpen ɛnɛ yɛbɛ Ɛshɔwɔ na anɛ.