Etingi Nsidi Nkeri Luk Asenging 8 - Ndoe

Ebe bakani ba atɔbing Jisɔs

¹ Yi nggom bifa bemarɔ king, Jisɔs eken afari bɔpam bu ɔtɔ yi bu fefe asidag nsidi yu nnɔ abangang bɔlen bu Ɔsɔwɔ. Ɔfɔ yi bafai ba alag ɔbɔ owu ale yi we,

² erɔng yi ebe bakani ba we agbaning bɔ bebe bi bɔnyɔganyɔ yi bekɔn. Bopi bu bakani abɛn bole Meri wu arun Magdala wu bebe bi bɔnyɔganyɔ benebera betɛbing we beke;

³ Jɔana minkai Chusa, mine wu ali mɔnag nju yu Erɔd; Susana; yi jugijugi bantad. Bakani bafa ali atɔbag alangag bɔ babɔ akunag bakpoga yi nggom bi bɔ akwe akpeag wa nggom bi Jisɔs yi bɔ bali nyedag we aken.

Ekan yi minlemag erom ekwɔ achin aka fei mbuni

⁴ Nteni etɛmi ekakab eli fugag ka bane abag ɔmɔ Jisɔs ba arun bɔmpam belibeli, we arob ekan yifa arɔ:

⁵ “Minlemag erom ekwɔ achin efi arɔ we aka fei mbuni obu. Yi we ali kwadag ala mbuni bufa, ebe bɔchɔ wa nnen. Bane achem obu, bɔnɔnɔn bu esɔ bɔba li bu.

⁶ Ebe bɔchɔ wa etakpa, nteni mbuni bufa bɔmen, besin besɔ deg bekwɔ wantagi mmai chang wa nsisi.

⁷ Ebe mbuni bɔchɔ erɔng yi basen, basen akoi ekpenyid yi mbuni bufa ka akaming bu bokoi ka bowom.

⁸ Ka ebe mbuni bɔchɔ wa etingi nsisi. Mbuni bufa bokoi bowom bemei, nken erɛm berɔn eking bi afen.” Yi Jisɔs achɔding yifa feb, we atam elem esɔ arɔ, “We wu akwe baroi ma awogag, nungi we awog.”

Eri yi ekan yifa

⁹ Banyedag ba Jisɔs abeb we eri yi ekan yifa etɛbing.

¹⁰ Jisɔs atɔ bɔ arɔ, “Ɔmanyum wu beju bi bɔlen bu Ɔsɔwɔ ake nyɔ, ka ɔmɔ bantad Me nrobag bekan, enungi eru afa, “ ‘kpe bɔ arɔn ɔrɔ, bɔ amanag ahɔmai eri eyi; kpe bɔ awoging owog, emanag ehɔrebi bɔ.’

¹¹ “Fa ele eri yi ekan yifa: Mbuni bɔlag boke elem yi Ɔsɔwɔ.

¹² Bu bɔchɔn wa nnen bole bane ba awogag elem yi Ɔsɔwɔ, ka Minen Ejiri aba alɔb elem ayia wa boted obubɔ, eru afa bɔ anungi akan kam elem yi Ɔsɔwɔ yi ka enyangang bɔ.

¹³ Bu bɔchɔn wa etakpa bole bane ba araming elem yi Ɔsɔwɔ yi bochoba bu nted nten yu bɔ awoging wu, ka bɔ afɔning mindug. Bɔ akamag wa ekpiri nten, ka wa nten yu nkan bɔ atun.

¹⁴ Mbuni bu bɔchɔn wa erɔng yi basen bɔlag boke bane ba awoging elem yi Ɔsɔwɔ, ka nkeri bɔ akoag ala, bayang ma ekwen, efang yi betingi bi nggom bi nggon behɔ kam bɔ akoi asi belag.

¹⁵ Ka mbuni bu bɔchɔn wa etingi nsisi bɔlag boke bane ba akwe etingi nted, awog elem yi Ɔsɔwɔ, anungi yi wa nted oyubɔ yi bɔnɔ yi ekonekon, ka wa bɔtɔrag bu nted yi anyɔgi bawom emei.

Elem yi Ɔsɔwɔ ele ala enwɔi

¹⁶ “Mine chang wu anwɔag enwɔi akun awobi wa otu lale anungi yi eboi nnɔng. Otuke, we achorag yi wa esɔ, enungi eru afa bane ba abag eteng arɔ ewereng ayin.

¹⁷ Da nyum chang yi awobag yi ka ehɔtɛb efi, nyum erɔng chang yi ele ewobi yi bane ahɔmai yi lale ahɔtɛb yi yi efi.

¹⁸ Chei baroi gɔgigɔgi wa yi we owogag. Kpewun wu akwe nyum abodag we obodi, kpewun wu akan kwei nyum, kpe yi we akering arɔ we akwe aramag we yi.”

Nyeni Jisɔs yi Mbɔn ba nyen ba Jisɔs

¹⁹ Fafa nyeni Jisɔs yi mbɔn ba nyen ba Jisɔs aban we ɔrɔ, ka bɔ amaning asi we kpedikpedi wantagi bɔtɔ bu ekakab.

²⁰ Ka mine wud asidi we arɔ, “Nyen eya yi mbɔn ba nyen agwa alag efi, akeag arɔ we.”

²¹ Ka Jisɔs abɔri arɔ, “Nyen ema yi mbɔn ba nyen agama ba banine ale bane ba awoging elem yi Ɔsɔwɔ alang yi wa elemag.”

Jisɔs akuni ebuga baya

²² Epo yid Jisɔs atɔn bane abi ba ali nyedag we arɔ, “Nungi anyɔng sɔ ewani nsɛm ejeb.” Bɔ awei wa okpe ajibag.

²³ Nkeri bɔ ali fungag ala achag, Jisɔs achɔ elɔ. Esɔnga ebuga baya ebi wa ejeb, egbung okpe ta mmamai ato ɔwei eteng okpe, botig bɔkɔ bɔ arɔ bɔ anɔngɔbɔ lɛm.

²⁴ Banyedag ba Jisɔs alo aka nyimi we arɔ, “Nsinju, Nsinju, sɔ enɔngɔbɔ lɛm!” Ka we alo belag anyan mpeb yi ebuga baya ekɛmi wedeg; ebuga baya egɔ mfom akun bemm.

²⁵ Jisɔs akpedi abeb bɔ arɔ, “Ochorekpo owuna ole wan?” Wa botig yi ɔmanag beke bɔ abeb bolom, “Nene la? We anyan ka kpe mpeb yi mmamai bewog we.”

Jisɔs agban minine wu akwe ebe nyɔganyɔ

²⁶ Bɔ afung aka badi ekpen yi ayenag yi arɔ Gerasa, yi ale nsɛm ejeb emmɔnag Galili.

²⁷ Nteni Jisɔs atɛbing okpe wa ega, minine wu akwe ebe nyɔganyɔ wu arun mpam ayua aba akpɔgi we. Eken erab minine wufa chang alangag nfɔ, erɔng we chang akɛmag nju, ka we akɛmag wa ekpen yi bayo.

²⁸ Yi we arɔn Jisɔs, we abeg mbei achɔ bako ma Jisɔs, abegag elem esɔ esɔ arɔ, “Ɔkeag ye yi me, Jisɔs, Mmɔn Ɔsɔwɔ wu Ɔchiming nlag oking? Me nledi we, kan seni me!”

²⁹ We achɔding yifa wantagi Jisɔs arob enyan arɔ ebe nyɔganyɔ etɛb beke bi minine awun. Nten jugijugi ebe nyɔganyɔ yifa erami we ɔsa. Kpe afening we yi bɔgbakɔbɔ ɔbɔ yi oko ka ababag we, we abri bɔgbakɔbɔ obu ka ebe nyɔganyɔ enyɔgag we elang eteng ekan bekpen bi bane chang akɛmag.

³⁰ Jisɔs abeb we arɔ, “Mpi ɔya akamag lan?” We abɔri arɔ, “Mpi ama akamag arɔ, ‘Nsɔgnsɔg,’ ” wantagi jugijugi bebe bi bɔnyɔganyɔ bewei we beke.

³¹ Ka bɔ aledi Jisɔs abɔgag bɔsɛm arɔ akan keb bɔ arob wa ebebe yi nkuri chang.

³² Ka bakug jugijugi ale afa wa nkpɔgi mpub ayag bali. Ka bebe bi bɔnyɔganyɔ beledi Jisɔs berɔ anungi bɔ atɛb beke bi minine wufa awei wa bakug, ka we ake bɔ ɔsa.

³³ Yi bebe bi bɔnyɔganyɔ behɔ tɛb beke bi minine awun, be ka wei bakug ka nsɔgi bakug ama agbɛddi achag minyɔ mpub, basɔri feb awei ejeb alɛm.

³⁴ Ka yi bammɔnag ba bakug ama ahɔrɔ yi emarɔ tɛb, bɔ agbɛdi aka sidi yifa wa mpam yi bɔmpam bu bole bɔfari,

³⁵ ka bane amug achag aka rɔ yi emarɔ tɛb. Yi bɔ ahɔ si ekpen yi Jisɔs ale, bɔ arɔ minine awun wu bebe bi bɔnyɔganyɔ bemarɔ ɔtɛb we beke, akig bako ma Jisɔs yi nfɔ beke yi nted nkeri; ka botig bɔkɔ bɔ.

³⁶ Bane ba arɔn yi etɛbing asidi bantad nkeri minine wu afɔning bebe bi bɔnyɔganyɔ amarɔ ɔgban we.

³⁷ Feb bane ba mpam yu Gerasa yi buwag bu bole bɔfari atɔ Jisɔs arɔ acha bɔ, wantagi botig bu bɔkɔn bɔ. Ka Jisɔs awei okpe aloag.

³⁸ Ka minine wu Jisɔs alɔbing we bebe bi bɔnyɔganyɔ aledi Jisɔs arɔ we anyedi we, ka Jisɔs akaming, atɔ we arɔ,

³⁹ “Tisɛm bugag ɔka sidi bane etɛmi nyum yi Ɔsɔwɔ amarɔ olem ake we.” Minine awun alo aka sidi mpam feb afari abangang etɛmi nyum yi Jisɔs aleming ake we.

Jisɔs anyimi mmɔni mindig wa eko ka agban minkani ekɔn

⁴⁰ Fafa yi Jisɔs atɛming nsɛm, jugijugi bane arami we, wantagi bɔ feb akig aworag we.

⁴¹ Minine wud wu ayenag we Jerus, mine eri wu nju efugi yu bane ba Ju, aba chɔ bako ma Jisɔs, aledag we arɔ abag wa nju oyu,

⁴² wantagi ebibi mmɔn owu, mindig wu asi nya ɔfɔ yi efai, ale ekwɔang. Yi Jisɔs ale nnen achag, bekakab bi bane anyɔngag we.

⁴³ Ka minkani wud ale afa wu nnung eli tɛbag we wa nya ɔfɔ yi efai, ka mine chang wu amaning agban we.

⁴⁴ We aba kpedikpedi nsɛm yu Jisɔs agbi oroi efɔ owu, ebuyid nnung eyi egɔ ɔtɛb.

⁴⁵ Ka Jisɔs abeb arɔ, “Nene agbin me?” Yi bɔ feb akebing yi, Pita arɔ, “Nsinju, bane afugag anyeag we.”

⁴⁶ Ka Jisɔs arɔ, “Mine agbi me; Me mmai ndɔ ɔsa ɔtɛb me beke.”

⁴⁷ Yi minkani awun ahɔrɔ arɔ we ahɔman awobi lɔ aba afiag achɔ bako ami. Wa boso bu bane feb, asidi eri yi eleming ka we agbi we yi nkeri ekɔn eyi emaning afa belag.

⁴⁸ Jisɔs atɔ we arɔ, “Mmɔni minkani, ochorekpo ɔwa ɔgban we. Chog wa ekunakuna.”

⁴⁹ Yi Jisɔs anyinang yi minchɔd minyɔ achɔdag, mine wud aba wu arun nju yu Jerus, mine eri wu nju efugi yu bane ba Ju. We arɔ, “Mmɔn owa akwɔ. Kɔngɔ ke minkɔkɔi efegayɔ.”

⁵⁰ Ewogag yifa, Jisɔs atɔ Jerus arɔ, “Kan re botig; ekinging kam ɔrɔ mmɔn ɔwa beke ting bekori we.”

⁵¹ Yi we asin wa nju yu Jerus, akaming arɔ mine wuntad anyedi we awei wa nju akinging Pita, Jɔn yi Jems, yi nsi yi nyeni mmɔn.

⁵² Feb bane ali beag we yi ɔrem. Jisɔs atɔ bɔ arɔ, “Gɔ anyɔng mbei. We akwɔn ka ali lagɔlai.”

⁵³ Bɔ awɔi we, amag arɔ akwɔ.

⁵⁴ Ka we akɔri we wa ɔbɔ arɔ, “Mmɔn ama, lo belag!”

⁵⁵ Nyɔganyɔ oyu atisɛm ka ebuyid we alo belag. Ka Jisɔs atɔ bɔ arɔ ke we anyɔng nyum ali.

⁵⁶ Nyen yi nsi mmɔn beke beman bɔ. Ka Jisɔs ake bɔ lesigi arɔ akan sidi mine kpewud yi emarɔ tɛb.