Etingi Nsidi Nkeri Luk Asenging 7 - Ndoe

Jisɔs agban mingban wu mine eri wu banɔgag ba bera

¹ Yi Jisɔs amaning ekɔang bane ba ali wogag we nggom bifa feb. We awei mpam yu Kapanɔm.

² Ekwe mine eri wu banɔgag ba bera wu ali kɛmag afa. We afɔning mingban wu anunag we gbɔg, ayɔ ta ale ekwɔang.

³ Yi etɛmi mine wufa awoging abangang Jisɔs afong ebe bakonang ba Ju ɔmɔ Jisɔs, atɔ we abag aba gban mingban owu.

⁴ Yi bakonang bafa aban ɔmɔ Jisɔs, aledi we gbɔg arɔ, mine eri banɔgag ba bera wufa akɔnɔkɔn wu we ɔnyangag we,

⁵ wantagi we akwe enun yi mpam oyuda we erɔng atɛb sɔ nju efugi yu bane ba Ju.

⁶ Ka Jisɔs aloag yi bɔ. Yi we ale kped yi nju we mine eri wu banɔgag ba bera awun afong erong eyi arɔ atɔ Jisɔs arɔ “Minfɔni, ka ke lɔ efegayɔ, wantagi me nkɔning wu we ɔweag wa eboi yi ebunju ema.

⁷ Yi ala me nrɔn lɔ ala mine wu akan kɔning wu abag mɔ ɔwa. Ekinging we kpei elem, mingban ama beke ting bekori we.

⁸ Wa ebad ema me nle mine wu nle eboi ɔsa, yi banɔgag ba bera ba ale eboi ema. Ntɔrag owubɔ wud ndɔ chog alo; nhɔ tɔ wuntad ndɔ, ‘Bag,’ aba, Me ntɔ mingban ama ndɔ, ‘Lem yifa,’ alem yi.”

⁹ Yi Jisɔs awoging balem mafa, beke beman we yi mine eri wu banɔgag ba bera wufa, ahɔ kpedi amɔn ekakab yi bane ba ali nyedag we, we arɔ, “Me nsidi nyɔ, nkan ndɔ npɛdi etɛm ochorekpo lafa kpe wa Isrel.”

¹⁰ Nyining bane ba afonging bɔ atisɛm wa nju abarɔ arɔ mingban awun beke bekori we.

Jisɔs anyimi mmɔn wu minkai ekud wa eko

¹¹ Eken erabing, Jisɔs aloag wa mpam yu ayenag yu arɔ Nen. Bane ba ali nyedag we yi etɛmi ekakab alo yi we.

¹² Yi Jisɔs asin kpedikpedi yi minyɔfu ɔkɔ wu mpam, we arɔn bane akaring minkoko atɛbag yi we. Minkoko awun ale ebibi mmɔn minine wu nyen akwe. Ka nyen eyi ale minkai ekud. Bane jugijugi wa mpam ayua anyedi we arɔ aka kɛn mmɔn awun.

¹³ Yi Minfɔni arɔn minkani awun, nsɔn akɔ we yi we, atɔ we arɔ, “Kɔngɔ bei.”

¹⁴ We aba lo aka gbi mkpokpo minkoko yu bɔ akaring, bane ba akaring yu acha belag. We arɔ, “Esad, me ntɔ we, lo belag!”

¹⁵ Minkoko alo belag ato minchɔd ɔchɔd, Jisɔs akun we ajog ake nyen eyi.

¹⁶ Bane feb boted bosoi yi botig ka bɔ akag Ɔsɔwɔ. Bɔ arɔ, “Etɛmi minrɔag eyammɛd yi Ɔsɔwɔ atɛb wa erɔng eyida! Ɔsɔwɔ aba abanyangi bane abi!”

¹⁷ Nsidi yufa abangang Jisɔs asai afari Judia yi bɔpam bu bole bɔfari yu.

Jɔn Minpogag mmai afong Bakamag ba befong ɔmɔ Jisɔs

¹⁸ Banyedag ba Jɔn minpogag mmai aba sidi we abangang nggom bifa feb bi Jisɔs aleming. Jɔn ayen bafai wa erɔng eyibɔ,

¹⁹ afong bɔ ɔmɔ Minfɔni arɔ aka beb we arɔ, “We ole mine wu anɔngɔ ba lale emɔn mmɛd wa wuntad?”

²⁰ Yi banine bafa aban ɔmɔ Jisɔs, bɔ arɔ, “Jɔn minpogag mmai afonging sɔ ɔmɔ ɔwa arɔ ebeb we arɔ, ‘We ole we wu anɔngɔ ba a, lale emɔn mmɛd wa mine wuntad?’ ”

²¹ Wa nten ayua Jisɔs agban jugijugi ba akwe bekɔn, ba ayɔgɔyɔ yi ba akwe bebe bi bɔnyɔganyɔ, agban jugijugi ba acheging mmɛd arɔ nnen.

²² Ka abɔri bɔ ba Jɔn afonging arɔ, “Tisɛm anyɔng nyɔ ka sidi Jɔn yi nyɔ ɔmarɔ ɔrɔ, yi yi nyɔ owog. Bachegag ba mmɛd ali rɔag nnen, bɔbɛni baken, ba akwe bafon agban bɔ, bakɛnag ba baroi awog, ba akwɔn anyimi ka etingi nsidi akwɔri ake bakpak.

²³ Enɔb yi kpewun wu akan tuning wantag ama.”

²⁴ Yi bakamag ba befong ba Jɔn ahɔ lo, Jisɔs ato ɔchɔd yi ekakab yi bane abangang Jɔn: “Ye yi we ochin efi wa ekpen yi bane chang akɛmag ɔka rɔ? Emei enyingag nkeri mpeb afugag a?

²⁵ Ebu chang, ye yi we ochin efi ɔka rɔ? Minine asɔbing lɔ yi betingi bi nfɔ a? Chang, bane ba alangag nfɔ bi bekon efɛn yi ba akwenag ekwen yi efangane akɛmag wa boju bu balen bibi.

²⁶ Ka ye yi nyɔ ochin efi ɔka rɔ? Minrɔag eyammɛd yi Ɔsɔwɔ a? Ee-ee, me nsidi nyɔ, Jɔn aking minrɔag eyammɛd yi Ɔsɔwɔ.

²⁷ We ale mine wu asenging abangang: “ ‘Me nting nfong minkamag me befong ara we nnen, wu ting aloni nnen anungi we.’

²⁸ Me nsidi nyɔ, mine chang wu atɔn aking Jɔn wu minkani amarɔ ogwe; ka kpe nkeri ele ala wu akebing aking wa bɔlen bu Ɔsɔwɔ atɔ aking Jɔn.”

²⁹ (Feb bane, kpe bɔ baramag ba ntɛbatɛba yu mpam, yi bɔ ba awoging balem ma Jisɔs, akam arɔ nnen yu Ɔsɔwɔ ale ekonekon, wantagi Jɔn ale mine wu apoging bɔ mmai.

³⁰ Ka bɔ Farisi yi bakɔag ba eben akebing yi Ɔsɔwɔ areming abangang bɔ bafɔni, wantagi bɔ akaming arɔ Jɔn apog bɔ mmai.)

³¹ Jisɔs achag boso yi minchɔd owu arɔ, “Yi ye, nyining, Me nkanag bane ba nggon yufa? Ba ale ala ye?

³² Bɔ ale ala mbɔnibɔni ba akig ekpen efɛn ayenag bolom, “ ‘Sɔ efɔd ntangtang eke nyɔ, ka nyɔ okeb ebɛnang; sɔ ekɔn eben yi eko, ka nyɔ okeb ebeang.’

³³ Yi Jɔn minpogag mmai aban, alin beliang ayɔn barog, ka nyɔ ɔrɔ, ‘Akwe ebe nyɔganyɔ.’

³⁴ Ka Mmɔn wu Mine aba ayag ayɔg, ka nyɔ ɔrɔ, ‘Wufa ale nchɔg yi minyɔg barog, nnum wu baramag ba ntɛbatɛba yu mpam yi balemag ba bobe.’

³⁵ Ka ɔmanyum ɔtɔngi ekonekon wa mbɔn abi feb.”

Minlemag bobe minkani apog Jisɔs Bakwu

³⁶ Wud wu Farisi alaging Jisɔs aka li beliang wa nju oyu. We alo achag nju Farisi aka kɛmi awegi lɔ ebad yid ali wa okpokoro.

³⁷ Nyining minkani wu ale wa mpam ayua, wu ekwen eyi enɔbing, yi we awoging arɔ Jisɔs ali yag beliang wa nju yu Farisi, we aba yi otu bakwu ma achobag mmu.

³⁸ Ka we alami nsɛm yu Jisɔs abɔgag bako ami, abeag, we ato ɔbedi bako ma Jisɔs yi babɛdag ami. We asiri mɔ yi ndi eyi, akug mɔ minyɔ, ka apog mɔ bakwu ma achobag mmu.

³⁹ Yi Farisi wu alaging Jisɔs arɔn yifa, we atɔ lɔ arɔ, “Ebu minine wufa ale minrɔag eyammɛd yi Ɔsɔwɔ, we ka amain npedi minkani wu ali gbirag we yi ekani minkani wu we ale, wantagi we ale minlemag bobe.”

⁴⁰ Jisɔs abɔri we arɔ, “Saimɔn, Me nkwei nyum yi nɔngɔ nsidag we.” We abɔri arɔ, “Minkɔkɔi, sidi me.”

⁴¹ “Banine bafai akwe minfɔg bakpoga barɛm. Wud barɛm ami ale ekpa dinari erɛm nged erɛm nsɛm esɔn ka wu wag ekpa bakpoga erɛm befai nsɛm ɔfɔ.

⁴² Bɔ bafaibafai akwe bakpoga ma bɔ ajogag, we afɔ bɔ arɔ bɔ ali bakpoga amɛn. Fafa nene wa erɔng eyibɔ wu ka minfɔg bakpoga anunag we aking?”

⁴³ Saimɔn abɔri arɔ, “Nkering ndɔ we wu barɛm ami atin aking ka afɔ we.” Ka Jisɔs abɔri we arɔ, “We osob mpem gɔgigɔgi.”

⁴⁴ Nyining we akpedi amɔn minkani awun atɔ Saimɔn arɔ, “Ɔrɔ minkani wufa? Me nban nju ɔya, we oken me mmamai me nso bako angama ka we abedi bako angama yi babɛdag ami asiri mɔ yi ndi eyi.

⁴⁵ We okobing me yi ekugang minyɔ, ka minkani wufa, to nten yu me nwen wa nju ɔya akan gɔ ekugang bako angama.

⁴⁶ We ɔlanging me bakwu wa eri ema, ka we apog me bakwu ma achobag mmu wa bako angama.

⁴⁷ Wantagi yifa, Me nsidi we, we wu bobe obu botinoti alo acha we, waoye we akwe enun yi jugijugi. Ka mine wu alon acha ninsed akwe enun yi ninsed.”

⁴⁸ Jisɔs atɔ minkani awun arɔ, “Bobe ɔgwa alo acha we.”

⁴⁹ Bolom bakenken ato ɔkpen yi bolom arɔ, “Nene la wu akwe ɔsa wu afɔg mine bobe?”

⁵⁰ Ka Jisɔs atɔ minkani awun arɔ, “Ochorekpo ɔwa ɔnyangi we; chog wa ekunakuna.”