Etingi Nsidi Nkeri Luk Asenging 5 - Ndoe

Jisɔs ayen barabannen ba anyedag we

¹ Epo yid nkeri Jisɔs alag wa ega yi ejeb yi Genesaret, bane agbai we afari awogag balem ma Ɔsɔwɔ.

² We arɔ bakpe afai wa nkpɔgi oloi ma bakɔrag ba bosi achan ka alo oso basem amibɔ.

³ Jisɔs awei okpe wud wu ole okpe wu Saimɔn, atɔ we arɔ, tin okpe wa ega ninsed ɔchag eteng oloi. Nyining we akɛmi nged eteng okpe akɔi bane.

⁴ Yi we amaning echɔdang, we atɔ Saimɔn arɔ, “Tin okpe ɔwei wa ekpen yi ebinobi, lang osem ɔwa da ting ɔkɔ bosi.”

⁵ Saimɔn abɔri we arɔ, “Nsi nju, sɔ elem erom yi boru feb ta epo eche ekɔn kpe nyum. Ka ntagi we ɔchɔding ala, me nting nlang osem awun.”

⁶ Nten yu bɔ ahɔ lem ala, bɔ akɔ bosi jugijugi ta basem amibɔ ato ɔjagi.

⁷ Bɔ ameg bolom bakɔrag ba bosi ba ale okpe wu wag babɔ arɔ abatɔb bɔ. Bɔ abatɔb bɔ asoi bakpe afaiafai yi bosi ta bakpe amibɔ ato ɔsɛmi.

⁸ Nteni Saimɔn Pita arɔn yifa, we anyudi nsi boso bu Jisɔs arɔ, “Minfɔni, lo cha me, me nle minlemag bobe minine!”

⁹ Ka we yi bolom ba bakɔrag ba bosi ba ale afa beke beman bɔ wa bosi bu bɔ akɔn,

¹⁰ Wa nkeri ekɛming yi Jems yi Jɔn, mbɔn ba Sebedi, ba ale bolom ba bakɔrag ba bosi yi Saimɔn. Nyining Jisɔs atɔ Saimɔn arɔ, “Kan re botig; to fafa ɔchag boso we oting ɔkɛmi ɔkɔrag bane.”

¹¹ Ka bɔ atu bakpe amibɔ asi wa ega, acha nggom feb anyedi Jisɔs.

Jisɔs agban minyɔg bafon

¹² Yi Jisɔs ale wa mpam yud, minine aban afa wu bafon asoi we beke feb, yi we arɔn Jisɔs, we atɛb boso nsisi aledi we arɔ, “Minfɔni, ebu enuning we, we ɔmanag olem me mbad.”

¹³ Jisɔs anyabi ɔbɔ owu agbi we, atɔ we arɔ, “Me enunonun me, beke bekori we!” Ebuyid bafon aman.

¹⁴ Nyining Jisɔs atu we baroi arɔ, “Kan nsidi mine kpewud, ka chog, tɔngi beke egwa ɔmɔ minsingag besingi bi Ɔsɔwɔ, nyining ka sɔm nkeri Mosis atɔn abangang bane ba agbaning bɔ bafon, etɔngi bane arɔ beke bekɔri we.”

¹⁵ Ka nsidi abangang Jisɔs akɔni mpam, eruafa jugijugi bane aba aba wog ekwɔrang eyi anungi agban bɔ bekɔn ebibɔ erɔng.

¹⁶ Ka Jisɔs amang otu lɔ achag bekpen bi bane chang aka soi nsɔm.

Jisɔs agban mine wu agweri

¹⁷ Epo yid Jisɔs ali kɔag, ka bane ba Farisi yi bakɔag ba eben akig afa. Bɔ arun kpeicha eri mpam yi ele wa Galili yi yi Judia yi yi Jerusalim. Ka ɔsa wu Minfɔni ole yi Jisɔs agban bane bekɔn.

¹⁸ Ebe banine akaring mine wu agweri wa ekpa ka anɔg arɔ akun we awei wa nju akanungi we wa boso bu Jisɔs.

¹⁹ Ka yi bɔ akamaning arɔ nnen awei wantag yu ekakab yi bane, bɔ akom wa esɔ ebunju alɛm ɔfɔng afa apodi mine ekɔn wa ekpa eyi aka si etengante yi ekakab yi bane wa boso bu Jisɔs, ekpen yi we alag.

²⁰ Yi Jisɔs arɔn ekamang eyibɔ atɔ mine ekɔn arɔ, “Nnum, alo acha we wa bobe ɔgwa.”

²¹ Bane ba Farisi yi bakɔag ba eben ato ɔkeri yi bolom arɔ, “Fa icha mine wu achɔdag ala kpe we ale Ɔsɔwɔ? Nene wu amanag alo acha bobe wu akinging Ɔsɔwɔ?”

²² Jisɔs amang yi bɔ ali kerag ka we abeb bɔ arɔ, “Ye ka nyɔ ɔkerag nggom bifa wa boted obuna?

²³ Yin ewɔn ɔchɔd, ‘Bobe ɔgwa alo acha,’ lale ɔtɔ ɔrɔ, ‘Lo belag ken’?

²⁴ Ka me nken ndɔ nyɔ ɔmai arɔ Mmɔni Mine akwe ɔsa wa nsisi wu alo acha bobe bu bane.” Ka Jisɔs atɔ mine wu agwering arɔ, “Me ntɔ we, lo belag, kun ekpa eya ɔchag obugag.”

²⁵ Ebuyid mine ekɔn alo alami bako ami wa boso obubɔ, akun ekpa eyi abugag ka akerag Ɔsɔwɔ ejeg.

²⁶ Kpeicha mine beke beman we ka bɔ ake Ɔsɔwɔ ejeg. Botig bosoi boted obubɔ achɔdag arɔ, “Sɔ erɔ nggom bi emanag beke elei.”

Jisɔs ayen Lifai

²⁷ Yi yifa emarɔ king, Jisɔs atɛb efi akarɔ minramag ntɛbatɛba yu mpam wu akamag arɔ Lifai akig wa nju erom oyu. Jisɔs atɔ we arɔ, “Nyedi me.”

²⁸ Lifai alo belag, acha nggom feb anyedi we.

²⁹ Nyining Lifai arob etɛm efɔg ake Jisɔs wa nju oyu, ka jugijugi baramag ba ntɛbatɛba yu mpam yi bane bantad ale afa yi bɔ ayag

³⁰ Ka bane ba Farisi yi bakɔag ba eben ba ale yi bɔ akpen asidi banyedag ba Jisɔs arɔ, “Ye ka nyɔ ɔyag nyɔ ɔyɔg yi baramag ba ntɛbatɛba yu mpam yi balemag ba bobe?”

³¹ Jisɔs abɔri bɔ arɔ, “Bɔ ba ale okora beke asid akeag mingbagban ekinging ba ayɔgɔyɔ akeag mingbagban.

³² Me mban ndɔ mba yen bane ba nnɔ, ka me mban eruafa balemag ba bobe acha bobe anyedi Ɔsɔwɔ.”

Bebeb abangang nsɔng yu nkɛmang

³³ Ebe bane abeb Jisɔs arɔ, “Ye ka bɔ banyedag ba Jɔn kpɔkpɔk nten akɛmag nsɔng asoag nsɔm, erɔng banyedag ba Farisi alemag alafa, ka agwa bacha ayag, ayɔg?”

³⁴ Jisɔs abɔri bɔ arɔ, “Wa epo yi ebai yi elemang erong yi minlemag ebai ting akɛmi nsɔng a wanten yu minlemag ebai ale afa yi bɔ a?

³⁵ Ka nten ting aba yu ting akun minlemag ebai erɔng eyibɔ, wa ndu ayia nyining bɔ anɔngɔ kɛmi nsɔng.”

³⁶ We asidi bɔ bokobi bufa arɔ: “Ahɔjag ebad efɔ wa bebɔbi bieken akun ako wa yi ekoi. Efefa ejagag efɔ yieken, ka ekoang yieken yi yi ekun ehɔkɔni.

³⁷ Ka kpe wud chang wu alangag barog ma nken wa bekun bi batin ma akuning nkob yu nyam alem. Ebu olem ala barog ma nken aburag bekoko bi batin ma nkobi nyam, barog apogag ka batin ma nkobi nyam abebag.

³⁸ Otuke, barog ma nken alangag mɔ wa batin ma nken.

³⁹ Ka kpe wud wu amarɔ yɔ ekuni barog ahɔkei ma nken chang, waoye bɔ arɔ, ‘Ma ekun anɔb aking.’ ”