Etingi Nsidi Nkeri Luk Asenging 3 - Ndoe

Jɔn mipogag mmai aloni nnen anungi Jisɔs

¹ Wa nya eko yi Tiberɔs ale Sisa wa Rom. Nteni Pɔntɔs Palet ale mine eri wu ebad yi Judia. Erɔd minen wu Galili, ninyen owu Filip mine eri wu ebad yi Ituria yi Trikɔnitis, yi Lisanias mine eri wu ebad yi Abilene.

² Ele wa nten yu Anas yi Kefas ale balen ba balen ba besingi, Ɔsɔwɔ aken Jɔn mmɔn wu Sekaria barebi yi we ale wa ekpen yi bane chang akɛmag.

³ Ka Jɔn aken bɔpam bu bɔfaring baya ma Jɔdan akwɔrag arɔ, bane alo acha bobe, apog mmai eruafa alo acha bɔ.

⁴ Nkeri asenging wa botiti bu balem ma Aisaya minrɔag eyammɛd yi Ɔsɔwɔ: “Elem yi mine ali begag wa ekpen yi bane chang akɛmag, ‘Loni anyɔng nnen nyɔ onungi Minfɔni, lem anyɔng bɔlen bɔkɛmi kɔng nyɔ onungi we.

⁵ Kpeicha ɔdimgborong ting osoi, betɛm bi bopub yi nkekedi bopub ting bɔtedi eboi. Bɔlen bu bole gɔdang gɔdang ting bɔ nyabi kɔng, bɔlen bu bole chabichabi ting alem bu bɔsen.

⁶ Bane feb ting arɔ enyanyangi yi Ɔsɔwɔ.’ ”

⁷ Jɔn atɔ ekakab yi bane ba atɛbing aba we apog bɔ mmai arɔ, “Nyɔ mbɔn ba akwe bechaba bi begweni ala bebe bi bɔnyɔ! Nene aken nyɔ lesigi arɔ nyɔ ting nyɔ ɔsem wa etɛmi bɔsangag bu nted bu Ɔsɔwɔ bu we anɔngɔ bɔfong?

⁸ Lem anyɔng nggom bi ting betɔngi arɔ wa ekonekon nyɔ ɔcha elemang bobe. Kan to anyɔng ɔchɔd yi bolom nyɔ ɔrɔ, ‘Sɔ esem wantagi Ebraham ale nsi eyida.’ Me nsidi nyɔ ndɔ Ɔsɔwɔ amanag akun bara mafa alem mbɔn ake Ebraham.

⁹ Ee-ee, kpe fafa anɛmi betem wa mindug wu mindere. Kpeicha erere yi ekan woming etingi eme ting asob yi arob wa nsisi akun arob alang wa eteng minkod.”

¹⁰ Nyining bane ba ale wa ekakab abeb we arɔ, “Sɔ elemag lan fafa?”

¹¹ Jɔn abɔri bɔ arɔ, “Mine wu akwe nkwu efai akeni yud ake mine wu akankwe, kpewun wu akwe beliang akeni bi yi mine wu akwe.”

¹² Baramag ba ntɛbatɛba yu mpam aba erɔng aba pog mmai. Bɔ abeb we arɔ, “Minkɔkɔi, sɔ elem lan?”

¹³ We abɔri bɔ arɔ, “Kɔngɔ rami anyɔng eking nkeri atɔn arɔ nyɔ ɔramag.”

¹⁴ Nyining ebe banɔgag ba bera abeb Jɔn arɔ, “Ka sɔ alemag lan?” We abɔri bɔ arɔ, “Kɔngɔ fɔdi anyɔng bane bakpoga wa nkɛm ka kanyei anyɔng bane baram. Ekɔn nyɔ yi yi ali kpeag nyɔ.”

¹⁵ Bane ali worag yi ochorekpo akerag wa boted obubɔ ebu Jɔn amanag akɛmi Krais.

¹⁶ Jɔn abɔri bɔ feb arɔ, “Me mpogag nyɔ mmai, ka wud wu akwe ɔsa wu ɔting oking ɔma ting aba, wu baligi ma nggom bi bako ebi me nkɔning wu nwadag. We ting apog nyɔ yi Nyɔganyɔ yu Ɔsɔwɔ yi minkod.

¹⁷ Echagag mbuni eyi ele we wa ɔbɔ we apag efap yi ekwudag mbuni akpo wit alang ebongi eyi, ka we ting ayegi bepa wa minkod wu ɔhɔlɛmi ɔlɛmi.”

¹⁸ Ka yi jugijugi balem mantad Jɔn alei bane arɔ ajɔdi bengweni erɔng akwɔri etingi nsidi ake bɔ.

¹⁹ Ka yi Jɔn aken Erɔd minen wu ebad yi Galili bobe wantag yu we asɔding Erɔdias, minkai ninsi owu, yi feb bechaba bi nggom bintad bi we amarɔ lem.

²⁰ Erɔd abodi yifa yi bi feb: We afen Jɔn wa etengi mgbakɔbɔ.

Jɔn apog Jisɔs mmai

²¹ Nteni we amarɔ pog feb bane bɔmai, we apog Jisɔs mmai erɔng. Kayi we ali soag nsɔm, esɔ erebi,

²² ka Nyɔganyɔ yu Ɔsɔwɔ abi we yi beke ala ebi. Ka elem eba yi erun esɔ: “We ole Mmɔn ama, wu onuning me; yi we nted achob me.”

Enudi nju yi Jisɔs

²³ Jisɔs aton erom eyi yi we asin nya erɛm nsɛm ɔfɔ. We ale mmɔn nkeri akering wu Josef. Josef ale mmɔn wu Eli,

²⁴ mmɔn wu Matat, mmɔn wu Lifai, mmɔn wu Milki, mmɔn wu Janai, mmɔn wu Josef,

²⁵ mmɔn wu Matatias, mmɔn wu Emɔs, mmɔn wu Naum, mmɔn wu Esli, mmɔn wu Nagai,

²⁶ mmɔn wu Maat, mmɔn wu Matatias, mmɔn wu Semen, mmɔn wu Josek, mmɔn wu Jɔda,

²⁷ mmɔn wu Jɔanan, mmɔn wu Resa, mmɔn wu Serubabel, mmɔn wu Seltiel, mmɔn wu Neri,

²⁸ mmɔn wu Milki, mmɔn wu Adi, mmɔn wu Kosam, mmɔn wu Emadam, mmɔn wu Er,

²⁹ mmɔn wu Josua, mmɔn wu Eliesa, mmɔn wu Jorim, mmɔn wu Matat, mmɔn wu Lifai,

³⁰ mmɔn wu Simiɔn, mmɔn wu Juda, mmɔn wu Josef, mmɔn wu Jɔnam, mmɔni wu Eliakɛm,

³¹ mmɔn wu Milea, mmɔn wu Mena, mmɔn wu Metata, mmɔn wu Natan, mmɔn wu Debid,

³² mmɔn wu Jesi, mmɔn wu Ɔbed, mmɔn wu Boas, mmɔn wu Salmɔn, mmɔn wu Nasɔn,

³³ Nasɔn mmɔn wu Aminadab, mmɔn wu Ram, mmɔn wu Esrɔn, mmɔn wu Peres, mmɔn wu Juda,

³⁴ mmɔn wu Jekɔb, mmɔn wu Aisik, mmɔn wu Ebraham, mmɔn wu Tera, mmɔn wu Naɔ,

³⁵ mmɔni wu Serug, mmɔn wu Reu, mmɔn wu Peleg, mmɔn wu Eber, mmɔn wu Sala,

³⁶ mmɔn wu Kenan, mmɔn wu Afasad, mmɔn wu Sem, mmɔn wu Noa, mmɔn wu Lamek,

³⁷ mmɔn wu Metusela, mmɔn wu Enɔg, mmɔn wu Jared, mmɔn wu Maalalel, mmɔn wu Kenan,

³⁸ mmɔn wu Enɔs, mmɔn wu Set, mmɔn wu Adam, Adam mmɔn wu Ɔsɔwɔ.