Etingi Nsidi Nkeri Luk Asenging 24 - Ndoe

Jisɔs anyimi wa eko

¹ Wa ndanen epo yi efɛn yi ele epo yi minchɔd wu Ɔsɔwɔ, yi epopo, bakani akun bagwei ma bɔ anyɔbing achag oyo.

² Aka rɔ arɔ abungi ndinda alɔb wa minyɔ oyo,

³ ka yi bɔ aweng eteng, bɔ arɔn beke bi Minfɔni Jisɔs.

⁴ Yi bɔ alag akerag abangang yifa, ebuyid banine bafai yi nfɔ ebadag ala nwawang alami bɔ nkpɔgi.

⁵ Yi botig abua bakani aba atɛb beri yi baso amibɔ nsisi, ka banine aba atɔ bɔ arɔ, “Ye ka nyɔ ɔkeag mine mbed wa erɔng yi bakoko a?

⁶ We chang fa; we anyimi! Tedi nkeri we asiding nyɔ, yi we ale yi nyɔ wa Galili:

⁷ ‘Mmɔn wu Mine ating ajog we alang babɔ ma bane ba mbe, akom we ka wa ndu isia we ahɔnyimi.’ ”

⁸ Nyining bɔ atedi balem ami.

⁹ Nteni bɔ atiming nsɛm wa oyo, asidi nggom bifa feb bɔ ɔfɔ yi wud yi bantad feb.

¹⁰ Ale Meri wu arɔn Magdala yi Jɔana yi Meri nyeni Jems, ka yi bantad ba ale yi bɔ, ale bane ba asiding bɔ ba alag ɔbɔ wu Jisɔs yifa.

¹¹ Ka bɔ akaming yi bakani bafa asiding bɔ, waoye bachɔd amibɔ ale bɔ ala baram.

¹² Pita nyining, alo belag agbɛdi achag oyo. Anyudi nsi ka we arɔn efɔ yi eko yiyi enɔng, ka we atɛbag, akerag yi lɔ yi emarɔ tɛb.

Jisɔs atɛb boso bu bafai ba anyedag we yi ale nnen achag Emayɔs

¹³ Wa epo ayia yid bafai abibɔ ba anyedag Jisɔs ali chag wa eri mpam yi ayenag yi arɔ Emayɔs. To wa Jerusalim osi wa mpam yu Emayɔs ale ala mail enyibisia.

¹⁴ Bɔ ali chɔdag atangag yi bolom abangang feb nggom bi bemarɔ tɛb.

¹⁵ Nkeri bɔ ali kamag ala abangang nggom bifa yi bolom, Jisɔs we minfɔni atɛb aken yi bɔ;

¹⁶ bɔ arɔ we ka bɔ arening we.

¹⁷ We abeb bɔ arɔ, “Icha bachɔd la ma nyɔ ɔkwe ɔchɔdag yi bolom nyɔ ɔkenag ɔchag?” Bɔ alami jim yi baso amangag.

¹⁸ Wud owubɔ, wu akamag arɔ Klopas, abeb we arɔ, “We bibi ole minkenken wa Jerusalim wu akan ji nggom bi bemarɔ tɛb afa ndu yifa?”

¹⁹ We abeb arɔ, “Icha nggom?” Bɔ abɔri arɔ, “Abangang Jisɔs wu arun Nasaret. We akɛming minrɔag eyammɛd yi Ɔsɔwɔ, ka balem ami yi elemang eyi efɔning ɔsa wa boso bu Ɔsɔwɔ yi bane feb.

²⁰ Balen ba basingag ba besingi yi bane ba eri ba Ju ajoging we ake balen ba Rom ba asobing mpem arɔ awoi we, ka bɔ akom we wa erere yi baseni.

²¹ Ka sɔ efɔning ochorekpo sɔ erɔ we ale wud wu ɔnɔngɔ ɔfri Isrel. Ka ekuring afa, ele ndu isia yi bifa feb betɛbing.

²² Ka ebodi afa, ebe bakani abida amaning sɔ beke. Bɔ achin wa oyo yi epo po yifa,

²³ ka arɔn beke ebi. Bɔ aba sidi sɔ arɔ bɔ arɔn eyammɛd yi bakamag ba befong bi Ɔsɔwɔ ba atɔn arɔ we ale mbed.

²⁴ Nyining ebe ba ale yi sɔ aloag wa oyo aka rɔ wu nkeri bakani asiding, ka bɔ arɔn Jisɔs.”

²⁵ We atɔ bɔ arɔ, “Ye ka nyɔ ochuag, nyɔ oyigang ekamang feb bi barɔag ba eyammɛd yi Ɔsɔwɔ amarɔ ɔchɔd!

²⁶ Chang nyum yi Krais arɔag bayig ma nggom bifa ka we nyining awei wa ekpen eyi yi ejeg a?”

²⁷ Ka etoang enud yi Mosis yi feb barɔag ba eyammɛd yi Ɔsɔwɔ, we alem erebi bɔ yi achɔding wa botiti bu balem ma Ɔsɔwɔ feb abangang we minfɔni.

²⁸ Yi bɔ ale kped yi mpam yu bɔ ali chag, Jisɔs aleming ala kpe we anyinang achag boso.

²⁹ Ka bɔ aledi we arɔ, “Kɛmi yi sɔ, wantagi eko esi.” Ka we anyedi aka kɛmi yi bɔ.

³⁰ Yi Jisɔs ale wa okpokoro yi bɔ, we akun bred, akob Ɔsɔwɔ, abeg yu, ka ake bɔ.

³¹ Nyining mmɛd amibɔ arɛbi ka bɔ areni we. Ebuyid we alɛm mmɛd amibɔ.

³² Bɔ abeb bolom arɔ, “Boted obuda bɔkɛming bosidag sɔ wa eteng yi we ali chɔdag yi sɔ wa nnen a, yi yi we aleming erɛbi sɔ abangang botiti bu balem ma Ɔsɔwɔ a?”

³³ Bɔ alo belag atisɛm ebuyid achag Jerusalim. Afa bɔ arɔn bawag Ɔfɔ yi wud yi bane ba ale yi bɔ, afugi ekpenyid.

³⁴ Bɔ ali chɔdag arɔ, “Ele ekonekon! Minfɔni anyimi wa eko atɛb atɔngi lɔ ɔmɔ Saimɔn.”

³⁵ Nyining aba bafai asidi yi etɛbing wa nnen yi nkeri bɔ arening Jisɔs nten yu we abeging bred ake bɔ.

Jisɔs atɛb erɔng yi Ba anyedag we

³⁶ Yi bɔ anyinang achɔdag abangang bifa, Jisɔs minfɔni atɛb alami erɔng eyibɔ ka atɔ bɔ arɔ, “Ekunakuna ekɛmi yi nyɔ.”

³⁷ Bɔ anig ka botig bɔkɔ bɔ, akerag arɔ bɔ arɔn minkoko.

³⁸ We abeb bɔ arɔ, “Ye ka nyɔ oreag erɔng ye ka bɔtang bɔtɛbag wa boted obuna?

³⁹ Mɔn anyɔng babɔ angama yi bako angama. Ekonekon me ala! Gbi me ɔrɔ; minkoko akwe nyam beke yi bekɛkɛb nkeri nyɔ ɔrɔn me mfɔn.”

⁴⁰ Yi amarɔ ɔchɔd yifa, we atɔngi bɔ babɔ ami yi bako.

⁴¹ Ka yi bɔ anyinang akan kam yi yi wantag yu bochoba bu nted yi emanang beke, nyining we abeb bɔ arɔ, “Nyɔ ɔkwekwei nyum kpeyid yi eliang fa?”

⁴² Bɔ ake we nnsi yu awɔnɔwɔ,

⁴³ ka we arami yu ali wa boso obubɔ.

⁴⁴ We atɔ bɔ arɔ, “Wa yi me nsiding nyɔ yi me nle yi nyɔ: Feb nggom betɛbag ekonekon bi asenging abangang me wa eben yi Mosis, Barɔag ba eyammɛd yi Ɔsɔwɔ yi wa Botiti bu Ebɛn.”

⁴⁵ Nyining we arɛbi boted obubɔ eruafa bɔ amai Botiti bu balem ma Ɔsɔwɔ.

⁴⁶ We asidi bɔ arɔ, “Da yi asenging wa Botiti bu Ɔsɔwɔ: Krais ting arɔ bayig ka anyimi wa eko wa ɔyɔgɔ ndu isia.

⁴⁷ Ka asenging erɔng wa Botiti bu balem ma Ɔsɔwɔ arɔ ting akun mpi oyu asidi bane wa feb bɔpam, to wa Jerusalim alo acha bobe obubɔ nkeri Ɔsɔwɔ aloag acha bobe obubɔ.

⁴⁸ Nyɔ ole bɔtese bu nggom bifa.

⁴⁹ Me ting nfong nke nyɔ yi Nsi ema amarɔ oremi, ka kɛmi anyɔng wa Jerusalim tata nyɔ ɔrami ɔsa wu orun esɔ.”

Jisɔs akom achag esɔ

⁵⁰ Nyining we akun bɔ achag ekpen yi ebɔging Betani, we atam babɔ esɔ ake bɔ enɔb.

⁵¹ Yi we ali kerag bɔ enɔb, we acha bɔ ka akun we achag esɔ.

⁵² Nyining bɔ ajegi we atisɛm yu Jerusalim yi bochoba bu nted pɔp.

⁵³ Ka bɔ acha wa nju yu Ɔsɔwɔ kpɔkpɔgi nten akagag we.