Etingi Nsidi Nkeri Luk Asenging 23 - Ndoe

Aba yi Jisɔs boso bu Palet

¹ Nyining efugi yi bane bafa feb alo belag akun we achag ɔmɔ Palet.

² Ka bɔ ato ɔbadi we bachɔd, arɔ, “Sɔ erɔ minine wufa akerag efegayɔ wa mpam oyuda. Asidag bane akan tɛb ntɛbatɛba ake Sisa, erɔng we ali yenag lɔ arɔ we Krais, minen.”

³ Ka Palet abeb Jisɔs arɔ, “We ole minen wu bane ba Ju a?” Jisɔs abɔri arɔ, “We ɔchɔding ala.”

⁴ Nyining Palet asidi mine eri wu basingag ba besingi ma Ɔsɔwɔ yi bane ba anyeding bɔ arɔ, “Me nrɔn nyum kpeyid yi me nkerag minine wufa bobe.”

⁵ Ka bɔ anyɔgi arɔ, “We alem bane feb wa Judia ali koag beri wantag ekɔang eyi. We aton wa Galili tata we asi fa.”

Palet afong Jisɔs achag ɔmɔ Erɔd

⁶ Yi Palet awoging yifa abeb ebu Jisɔs arun Galili.

⁷ We ahɔmai arɔ Jisɔs arun mpam yu ale eboi yi Erɔd, we afong we ake Erɔd, wu ale Jerusalim wa nten ayua.

⁸ Yi Erɔd ahɔrɔ Jisɔs, nted achob we gbɔg, wantag yu eken erab yi we ali keag arɔ we arɔ we. Wa bi we amarɔ wog abangang Jisɔs, we aken we arɔ we alem nyum yi emanag beke.

⁹ We abeb we bebeb jugijugi, ka Jisɔs abɔring we kpe yid

¹⁰ Minen wu basingag ba besingi yi bakɔag ba eben alag afa, abadag we bachɔd ma mbe.

¹¹ Nyining Erɔd yi banɔgag ba bera abi aseg we alang we bakig. Esɔbang we yi etingi bebɔbi, bɔ afong we atisɛm ɔmɔ Palet.

¹² To epo ayia Erɔd yi Palet ale ekɛmangba, wa oye wa nten yu nsɛm bɔ ale ojing.

Asob mpem eko ake Jisɔs

¹³ Nyining Palet ayen minen wu basingag ba besingi, bane ba eri yi bane ekpenyid,

¹⁴ ka we atɔ bɔ arɔ, “Nyɔ ɔban yi mine wufa ɔma ala mine wu ali chodag bobe abangang bɔlen obuda bu olemag bane arob besing. Me nkan we boso obuna feb ka me nrɔn we ala mine wu aleming nggom bi nyɔ ɔbading we.

¹⁵ Ka kpe Erɔd, arɔn bobe kpebud, ka ahɔtisɛm afong we ake sɔ. Nkeri nyɔ ɔrɔ, we aleming nyum kpeyid yi ekwɔag.

¹⁶ Ekinging me nɔngɔ ke we baseni nyining njog we achag.” [

¹⁷ Kpe icha Efɔg yi Enwanang, Palet ajogag mine wud wu ale wa mgbakɔbɔ ake bane ba Ju.]

¹⁸ Ka bɔ feb abeg, “Lo yi minine wufa! Jog Barabas ke sɔ!”

¹⁹ (Barabas ale mgbakɔbɔ wa efegayɔ yi we aken wa mpam yi wa mine wu we awon.)

²⁰ Palet akeag arɔ we ajog Jisɔs babɔ, we ahɔledi bɔ abodi.

²¹ Ka bɔ acha abegag, “Kom we akwɔ! Kom we akwɔ wa erere yi baseni!”

²² Ka ɔyɔgɔ nken isia Palet ahɔchɔd yi bɔ, “Wa oye? Icha bobe bu minine wufa amarɔ olem? Me nrɔn bobe bu minine wufa aleming bu me ntɔrag ndɔ awoi we. Me nting nkwud we badu njog we babɔ achag.”

²³ Ka yi ebegang eyibɔ esɔesɔ anyɔgi akeag arɔ akom we, ka bebeg ebibɔ betɛb bɔ eri nnen.

²⁴ Ka Palet akam yi yi bɔ akeng.

²⁵ We ajog minine wu ale etengi mgbakɔbɔ babɔ wu eken mpam efegayɔ yi mine wu awon, wu bɔ abebing, ka ajog Jisɔs ake bɔ nkeri bɔ aken.

Akom Jisɔs wa erere yi baseni

²⁶ Nkeri banɔgag ba bera akuning we aloag, bɔ akɔ Saimɔn wu arun Sairini, wu arun efi anɔngɔ wei mpam, ka achori we erere yi baseni, anyɔgi we akari yi anyedag Jisɔs wa nsɛm.

²⁷ Bane jugijugi anyeding we, bodi yi bakani ba ali beag abegag wa eri eyi.

²⁸ Jisɔs akpedi atɔ bɔ arɔ, “Mbɔn ba bakani ba Jerusalim, kan bei anyɔng me; ka bei anyɔng beke ebina yi mbɔn abina.

²⁹ Wantag yu nten ala bag yu nyɔ ting ɔtɔ ɔrɔ, ‘Enɔb eke bagom, bala ma akanbɔ ogwe yi babei ma mbɔn akanbɔ ɔyab!’

³⁰ Nyining “ ‘bɔ ting atɔ bopup bu ɔtɔ arɔ, “Chɔ nyei sɔ!” ka yi nkeked bopup, “Foi sɔ!” ’

³¹ Ka ebu bane alem nggom bifa nten yu erere enyinang mbed, ye etɛbag nten yu yi enungi ewom gbagara?”

³² Banɔgag ba bera akuning banine bantad bafai, bɔ feb atuning eben, arɔ aka woi bɔ yi Jisɔs.

³³ Nten yu bɔ asin ekpen yi ayenag arɔ “Ekpageri,” afa bɔ akoming we wa erere yi baseni, yi ba atuning eben. Wud ebad yi ɔbɔ olom ka wu wag ebad yi ɔbɔ kai.

³⁴ Jisɔs arɔ, “Nsi lo cha bɔ, da bɔ aji yi bɔ ali lemag.” Nyining bɔ arob berɔ akeni nfɔ eyi.

³⁵ Bane alag amɔnag, kpe bane ba eri ba Ju aseg we arɔ, “We anyangi bane bantad; nungi we anyangi lɔ ebu we ale Krais wu Ɔsɔwɔ, wu Asanging.”

³⁶ Banɔgag ba bera erɔng abakɛmi asegag we. Bɔ ake we barog ma agbangag ɔgbang,

³⁷ ka arɔ, “Ebu we ole minen wu bane ba Ju, nyangi lɔ.”

³⁸ Efɔning erɔng yi asenging akom wa erere yi baseni esɔ eyi. Yi asenging afa ele: WUFA ALE MINEN WU BANE BA JU.

³⁹ Wud wu atuning eben wu akering afa ali chibag we arɔ: “We asid ole Krais a? Nyangi lɔ ɔnyangi sɔ erɔng!”

⁴⁰ Ka wu wag wu atuning eben erɔng akpedi anyan we arɔ, “We chang oreag Ɔsɔwɔ a? Baseni ma aken we asid aken sɔ a?

⁴¹ Asening sɔ nkeri, wantagi sɔ eli ramag ala baseni mafa wa yi sɔ eleming. Ka minine wufa aleming bobe kpebud.”

⁴² Nyining we arɔ, “Jisɔs, tedi me ebu we alaba wa bɔlen ɔgwa.”

⁴³ Jisɔs abɔri we arɔ, “Ekonekon me nsidi we, elei yifa we ting ɔkɛmi yi me wa Paradais.”

Eko yi Jisɔs

⁴⁴ Nten yufa nchen anɔngɔ bɔ okoi, ka ejiri efoi mpam feb tata esidag nten esom bera yi epen,

⁴⁵ nsoi agɔ ɔbad. Ka efɔ yi nju Ɔsɔwɔ ekeni bebad befai to esɔ osi eboi.

⁴⁶ Jisɔs abeg yi elem esɔesɔ, “Nsi, me njog nyɔganyɔ ama nlang wa babɔ anwa.” Yi we ahɔchɔd yifa, we atu nkurikuri efeb akun bem.

⁴⁷ Mine eri wu banɔgag ba bera yi we arɔn yi etɛbing, we akag Ɔsɔwɔ arɔ, “Ekonekon minine wufa ale mine kɔng yi Ɔsɔwɔ.”

⁴⁸ Nteni feb bane ba agbang arɔ yifa arɔn yi etɛbing, bɔ asom babɔ amibɔ wa bekpokpo abugag.

⁴⁹ Ka feb ba aji we, bodi yi bakani ba anyeding we to wa Galili, alag eken era arɔag nggom bifa.

Ekenang yi Jisɔs

⁵⁰ Efɔning minine wu ayenag we arɔ Josef, ale wud owubɔ wa efugi yi bane ba eri, etingi mine erɔng ale kɔng,

⁵¹ wu akaming wa yi bɔ areming olem. We arun mpam yu Arimatia yu ale eboi yi Judia, ka we minfɔni ali worag bɔlen bu Ɔsɔwɔ.

⁵² Aloag ɔmɔ Palet, aka beb we arɔ ake we ekoko yi Jisɔs. Ka Palet akam.

⁵³ Nyining we akun ekoko eyi abi nsi, abɔb yi wa efɔ yi eko ka anɛmi yi wa oyo wu asɛming wa etakpa, wud wu akanbɔ ɔkɛn mine.

⁵⁴ Ele Epo yi Olonag beke wu bane ba Ju. Nten yu Ewealɔ yi bane ba Ju enɔngɔ boto.

⁵⁵ Bakani ba aban yi Jisɔs to wa Galili anyedi Josef ka arɔ oyo yi nkeri anɛming beke ebi.

⁵⁶ Nyining bɔ alo abugag aka nyɔbi bagwei yi bakwu ma achobag mmu. Ka bɔ awealɔ wa Epo yi Ewealɔ enungi eben nkeri echɔding.