Etingi Nsidi Nkeri Luk Asenging 22 - Ndoe

Juda akam ɔchɔ Jisɔs

¹ Nteni efɔg yi bred yu akankwe yis, yu ayenag arɔ efɔg yi enwanang, ele kpɛd,

² ka balen ba basingag ba besingi yi bakɔag ba eben ali reag baso ma bane ka bɔ akeag bɔlen bu bɔ awoag Jisɔs wa ewobi.

³ Nyining Setan awei Juda, wu ayenag we Iskarɔd, wud wu ba ɔfɔ yi bafai.

⁴ Ka Juda alo aka kpɔgi minen basingag ba besingi yi bane ba eri ba ababag nju yu Ɔsɔwɔ akami nkeri we amanag achɔ Jisɔs.

⁵ Boted bochob bɔ ta bɔ akam yi akerag we bakpoga.

⁶ We akam ammɔnag nten yu efed ekɛmag yi we ajogag Jisɔs ake bɔ wa nten yu bane chang.

Nkurikuri Beliang

⁷ Nyining epo esi yi efɔg yi Bred yu Akan Langing Yis yi esɔmag mmɔn ɔwɔng wa efɔg yi Enwanang.

⁸ Jisɔs afong Pita yi Jɔn, arɔ, “Chog anyɔng nyɔ ɔka loni yi sɔ eyag beliang bi Enwanang.”

⁹ Bɔ abeb we arɔ, “Wan we ɔken ɔrɔ sɔ eloni yi?”

¹⁰ We abɔri arɔ, “Nkeri nyɔ ɔweag ala wa mpam, minine wu akaring nkpang yu mmamai ting akpɔgi nyɔ. Nyedi anyɔng we osi nju yu we aweag,

¹¹ sidi minfɔni nju ɔrɔ, ‘Minkɔkɔi abeb arɔ: wan ale emangɔng yi bakenken, yi me mmanag nli beliang bi efɔg yi Enwanang yi ba anyedag me.’

¹² We ting atɔngi nyɔ etɛm emagɔng wa esɔenyɔng, aloni feb. Lem beliang afa.”

¹³ Bɔ aloag aka rɔ nggom nkeri Jisɔs asiding bɔ. Nyining bɔ aloni beliang bi Enwanang.

¹⁴ Yi nten ahɔsi, Jisɔs yi bɔ ba alag ɔbɔ owu akɛmi afari okpokoro.

¹⁵ Ka we atɔ bɔ arɔ, “Ele me yi ka nyag efɔg yi Enwanang yifa yi nyɔ ka me nto bayig ɔrɔ.

¹⁶ Ka me nsidi nyɔ, me nkɔngɔ oli bi tata eri eyi etɔngi wa bɔlen bu Ɔsɔwɔ.”

¹⁷ Yi ahɔkun nkonkon, we akob Ɔsɔwɔ ka we arɔ, “Rami yifa keni yi wa erɔng eyina.

¹⁸ Me nsidi nyɔ me nkɔngɔ ɔhɔyɔ barog ma greb mafa tata bɔlen bu Ɔsɔwɔ bɔba.”

¹⁹ Ka we akun bred, akob Ɔsɔwɔ ka abeg yu ake bɔ, arɔ, “Yifa ele beke egama bi aken wa eri eyina; lem yifa eruafa nyɔ onungi otedag me.”

²⁰ Nkeri aleming kpa, yi bɔ amarɔ li bred we akun nkonkon, arɔ, “Nkonkon yufa ale enyɔ yieken wa nnung ema, yi apog ake nyɔ.

²¹ Ka mine wu anɔngɔ chɔ me ale fa yi me wa okpokoro.

²² Mmɔni Mine ting akwɔ nkeri Ɔsɔwɔ amarɔ oremi. Ka ebeb eke mine awua wu achɔg we!”

²³ Bɔ ato obeb erɔng eyibɔ wun owubɔ wu ting alem yifa.

²⁴ Ntang achɔ wa erɔng eyibɔ abangang nene owubɔ wu akering arɔ we atɔn aking.

²⁵ Jisɔs atɔ bɔ arɔ, “Balen ba akan sid bane ba Ju ali kɔrag bane abibɔ wa ɔsa. Ba ale ɔsa ayen lɔ ‘Batɔbag ba bane.’

²⁶ Ka nyɔ ɔkan kɛmi alafa. Otuke, we wu atɔn aking wa erɔng eyina nungi we akɛmi ala we akebing aking, ka we wu ale bɔlen akɛmi ala we wu ale botug.

²⁷ Wun atɔn aking, we wu ale okpokoro lale we wu ali tugag? We wu ale okpokoro asida? Ka me nle erɔng eyina ala wud wu ale botug.

²⁸ Nyɔ ole bane ba nyɔ ɔmarɔ lami yi me wa nten yu bɔkan ɔgama.

²⁹ Me nke nyɔ ɔsa wu bɔlen, ala nkeri Nsi ema aken me,

³⁰ nkeri nyɔ ɔmanag oli, nyɔ yɔ yi me wa bɔlen ɔgama. Nyɔ ting ɔkɛmi ngɛd yu balen, nyɔ orebag bɔpem nyɔ okerag benud bi nju ɔfɔ yi befai bi Isrel.”

Jisɔs asidi nkeri Pita ting akeb we

³¹ Jisɔs atɔ Saimɔn Pita arɔ, “Saimɔn, Saimɔn, Setan arami ɔsa we achag nyɔ ala wit.

³² Ka me nlang we wa nsɔm, Saimɔn, nkeri ochorekpo ɔwa ɔkan yɔ mmai. Ka wa nten yu we ala tisɛm lang mbɔn banyen agwa ba banine ɔsa.”

³³ Ka Saimɔn Pita abɔri arɔ, “Minfɔni, me nloni beke bi nchag yi we kpe wa mgbakɔbɔ yi kpe ele yi eko.”

³⁴ Nyining Jisɔs abɔri we arɔ, “Me nsidi we, Pita, ka nkɔg akog elei, we ting okeb nken isia ɔrɔ we oji me.”

³⁵ Nyining Jisɔs abeb bɔ arɔ, “Nten yu me nfonging nyɔ babɔ babɔ nyɔ ɔkɔring ebam yi bakpoga, ebam yi etɔ yi eken lale nggom bi bako, kpeyid erin ori nyɔ a?” Bɔ abɔri arɔ, “Kpenyum.”

³⁶ We atɔ bɔ arɔ, “Ka fafa ebu ɔkwei ebam yi bakpoga, kun yi, erɔng ebam yi etɔ yi eken; ka ebu ɔkwei ekangkang, chɔ nkwu ɔya yu efi yud ɔnam yid.

³⁷ Asenging wa botiti bu Ɔsɔwɔ arɔ: ‘Afang we erɔng yi balemag ba bobe;’ ka me nsidi nyɔ yifa etɛbag yi me. Ee-ee, yi asenging abangang me enɔngɔ tɛb alafa.”

³⁸ Ba anyedag Jisɔs arɔ, “Mɔn, Minfɔni, da bekangkang befai.” We abɔri arɔ, “Cha anyɔng minchɔd awua!”

Jisɔs aka soi nsɔm wa Mpɔp yu Olif

³⁹ Jisɔs aloag Mpɔp yu Olif nkeri amang olem, ka ba anyedag we anyedi.

⁴⁰ Esiang ekpen ayin, we atɔ bɔ arɔ, “Soi anyɔng nsɔm nkeri nyɔ ɔkan chɔ ɔwei wa nkan.”

⁴¹ We atin ninsed fe aking bɔ, anyudi nsi asoi nsɔm arɔ,

⁴² “Nsi, ebu we ɔken, lɔb me nkonkon yufa; ka nkeri me nkeng asid, ka ekɛmi nkeri ɔya.”

⁴³ Minkamag efong yi Ɔsɔwɔ arun mpam esɔ atɛb alang we ɔsa.

⁴⁴ Ka wa ntagi botig bu baseni ma anɔngɔ ba, egbi we gbɔg, we asoi nsɔm gbɔg ta besɔngsɔng ebi bele ala belɔng bi nnung bechɔrag wa nsisi.

⁴⁵ Yi we ahɔman nsɔm alo belag atisɛm ɔmɔ ba anyedag we, aka kpɔgi bɔ elɔ, ejɔi bɔ wa ntag yu bayig.

⁴⁶ We abeb bɔ arɔ, “Ye ka nyɔ ɔlag? Lo anyɔng belag nyɔ osoi nsɔm nkeri nyɔ ɔkan chɔ ɔwei wa nkan.”

Akɔ Jisɔs

⁴⁷ Yi we anyinang achɔdag, ekakab yi bane aba ekpen ayia, ka minine wu ba ayenag we Juda, wud wu ba ɔfɔ yi bafai, aran bɔ nnen. Atin abɔg Jisɔs anɔg arɔ we kug we minyɔ,

⁴⁸ ka Jisɔs abeb we arɔ, “Juda, we ɔnɔngɔ ɔchɔ Mmɔn wu Mine yi ekugang minyɔ a?”

⁴⁹ Yi banyedag ba Jisɔs ahɔrɔ yi enɔngɔ tɛb, bɔ arɔ, “Minfɔni, enɔg yi bekangkang ebida?”

⁵⁰ Ka wud owubɔ akwe mingban wu minen wu minsingag besingi, asob oroi wu obolom owu.

⁵¹ Ka Jisɔs abɔri arɔ, “Nhɔkei yifa!” Ka we agbi oroi wu minine awua agban we.

⁵² Nyining Jisɔs atɔ balen ba basingag ba besingi, bane ba eri ba ababag nju yu Ɔsɔwɔ yi bakonang, ba aban we ɔkɔ arɔ, “Ye ka nyɔ ɔba me ɔkɔ yi bekangkang yi bekpri bi bopung ala mine eri wu bakerag ba efegayɔ?

⁵³ Kpeicha epo me nle yi nyɔ wa etengebam yi nju Ɔsɔwɔ, ka nyɔ ogbin me ɔbɔ. Ka fafa nten oyuna asi yu ejiri ekwei ɔsa.”

Pita akeb Jisɔs

⁵⁴ Nyining akɔ Jisɔs, ba akun we achag nju yu minkonang minen minsingag besingi. Pita anyedi bɔ ekenera.

⁵⁵ Ka nten yu ebe bane afuging minkod wa etengante yi etengebam bɔ akɛmi afa ekpen yid, Pita akɛmi afa yi bɔ.

⁵⁶ Mindig mingban arɔ we nkeri we akig wa mkpɔgi awugag minkod. We amɔn we gɔgigɔgi ka arɔ, “Minine wufa ale yi we.”

⁵⁷ Ka we akeb yi arɔ, “Minkani, Me nji we.”

⁵⁸ Wa ninsed nten mine wuntad arɔ we ka arɔ, “We erɔng ole owubɔ wud.” Ka Pita abɔri arɔ, “Minine, me erɔng chang!”

⁵⁹ Yi ninsedi nten ahɔking mine wuntad arɔ, “Wa ekonekon minine wufa ale yi we, wantag yu we ale mine wu arun Galili.”

⁶⁰ Pita abɔri arɔ, “Minine, Me nji yi we oli chɔdag abangang!” Nkeri we ali chodag ala, nkɔg akog.

⁶¹ Minfɔni akpedi amɔn Pita kɔng. Nyining Pita atedi elem yi Minfɔni asiding we: “Ka nkɔg akog elei, we ting okeb me nken isia.”

⁶² Ka we atɛb efi aka bei yi ɔrem.

Ba bababi alang Jisɔs bakig

⁶³ Banine ba ali babag Jisɔs alang we bakig akwud we.

⁶⁴ Bɔ abɔb we efɔ mmɛd ka atɔ we arɔ, “Te! Nene atɛming we?”

⁶⁵ Ka bɔ achib we wa nggom bibɔ ali chɔdag wa bɔlen jugijugi.

Jisɔs boso bu Palet yi Erɔd

⁶⁶ Epo ehɔche bakonang ba bane, bodi yi balen ba basingag ba besingi yi bakɔag ba eben afugi ekpen yid, ka akun Jisɔs aba yi we wa boso obubɔ.

⁶⁷ Bɔ arɔ, “Ebu we ole Krais, sidi sɔ.” Jisɔs abɔri bɔ arɔ, “Ebu me nsidi nyɔ, nyɔ ɔhɔ kam yi me,

⁶⁸ ka ebu me mbeb nyɔ, nyɔ ɔhɔ bɔri.

⁶⁹ Ka to fafa chog boso, Mmɔn wu Mine anɔngɔ kɛmi wa obolom wu Ɔsɔwɔ wu akwe basa feb.”

⁷⁰ Bɔ feb abeb we arɔ, “Nyining we ole mmɔn wu Ɔsɔwɔ a?” Jisɔs abɔri bɔ arɔ, “Ekonekon yi nyɔ chɔding ele alafa nyɔ ɔrɔ me nle Mmɔn wu Ɔsɔwɔ.”

⁷¹ Nyining bɔ arɔ, “Ye ka sɔ enyinang ekeag bɔtese buntad? Sɔ bafɔni ewog wa minyɔ owu.”