Etingi Nsidi Nkeri Luk Asenging 20 - Ndoe

Ebeb Abangang Ɔsa wu Jisɔs

¹ Epo yid nkeri Jisɔs ali kɔag bane wa etengebam yi nju yu Ɔsɔwɔ akwɔrag etingi nsidi. Balen ba basingag ba besingi yi bakɔag ba eben, ekpen yid yi bakonang ba mpam, aba akpɔgi we,

² Bɔ atɔ we arɔ, “Sidi sɔ, wa ɔsa wun we oli lemag nggom bifa? Nene aken we ɔsa?”

³ We abɔri bɔ arɔ, “Me erɔng ting mbeb nyɔ ebeb. Sidi anyɔng me:

⁴ Opogag mmai wu Jɔn orun wa esɔ lale ɔmɔ mine?”

⁵ Bɔ akami yi wa erɔng eyibɔ arɔ, “Ebu sɔ etɔn sɔ erɔ, ‘Orun esɔ ɔmɔ Ɔsɔwɔ,’ we anɔngɔ obeb sɔ arɔ, ‘Ye ka nyɔ ɔkaming yi Jɔn?’

⁶ Ka ebu sɔ etɔ sɔ erɔ, ‘Orun ɔmɔ mine,’ bane bafa feb arobag sɔ bara, wantag yu bɔ akaming ekonekon arɔ Jɔn ale minrɔag eyammɛd yi Ɔsɔwɔ.”

⁷ Ka bɔ abɔri arɔ, “Sɔ eji abad yi orun ɔbag.”

⁸ Nyining Jisɔs abɔri bɔ arɔ, “Me erɔng nhɔ sidi nyɔ ebad yi ɔsa ɔma orun wu me nli lemag nggom bifa.”

Bokobi bu Baramag ba nkwɔ

⁹ Nyining we ato bane osidi bokobi bufa arɔ: “Minine wud afen greb wa ekwɔ eyi, akun ekwɔ ayia ake baramag ba nkwɔ ammɔnag yi, we aloag eken wa erabaraba nten.

¹⁰ Yi nten efuang ahɔsi, we afong mingban ɔmɔ baramag ba nkwɔ aka rami ebe bemei wa yi bɔ afun. Ka baramag ba nkwɔ ayin akɔ we akwud afong we atisɛm babɔ mmbɛd.

¹¹ We ahɔ fong mingban wuntad, ka wufa erɔng akwud we alang we enyi afong we atisɛm babɔ mmbɛd.

¹² Nyining we atisɛm ahɔ fong ɔyɔgɔ bara, ka bɔ alemi we atam we arob efi.

¹³ “Nyining minfɔni ekwɔ arɔ, ‘Me nlemag lan? Me ting nfong mmɔn minine ama, wu anunag me, yintad bɔ ting ajegi we.’

¹⁴ “Ka yi baramag ba nkwɔ arɔn we, bɔ atɔ bolom arɔ, ‘Wu fa ale minyag eko. Nungi ewoi we eli eko yi ekwɔ.’

¹⁵ Ka bɔ alɔb we ekwɔ arob efi awoi we. “Ye nyining yi minfɔni ekwɔ alemag bɔ?

¹⁶ We abag aba woi bɔ ba araming ekwɔ ayin ka ajog yi ake bantad.” Yi bane awoging yifa, bɔ arɔ, “Ɔsɔwɔ ahɔkam!”

¹⁷ Jisɔs amɔn bɔ kɔng ka abeb bɔ arɔ, “Nyining ye ele eri eyi wa yi asenging wa Botiti bu Balem ma Ɔsɔwɔ: “ ‘Ndinda yu batɛtɛb akebing atisɛm ale ekɔkɔb yi nju a’?

¹⁸ Kpewun wu achɔn wa ndinda ayua we ting achegi bebad bebad ka wu ndinda achɔrag we ting akɔg we.”

Ebeb abangang ekerang ntɛbatɛba yu mpam

¹⁹ Ka bakɔag ba eben yi balen ba basingag ba besingi akei nnen yu bɔ akɔrag we ebuyid, wantag yu bɔ ammai arɔ bokobi bu we asiding bole bɔbangang bɔ. Ka bɔ aren baso ma bane.

²⁰ Nyining bɔ ababag we mmɛdimmɛd, afong bane akpod we aleming ala bɔ anɔbɔnɔb. Bɔ achorag nted akɔ Jisɔs wa yi we achɔdag eruafa bɔ anungi akɔ we ake mine wu Rom wu ale ɔsa.

²¹ Ka bakpodag ba bane bafa abeb Jisɔs arɔ, “Minkɔkɔi, sɔ eji erɔ yi we ɔchɔdag erɔng ɔkɔag ele nkeri, we chang ɔmmɔnag baso ma bane ka ɔkɔag nnen yu Ɔsɔwɔ nkeri ale ekonekon.

²² Sidi sɔ, elele nkeri a arɔ sɔ etɛbag ntɛbatɛba ekerag Sisa lale ekan ke?”

²³ Ka Jisɔs ate bewag ebibɔ ka atɔ bɔ arɔ,

²⁴ “Tɔngi me anyɔng okpoga wu Rom. Boso yi mpi yu nene ale wa ɔmɔ?” Bɔ abɔri arɔ, “Bu Sisa.”

²⁵ Ka we atɔ bɔ arɔ, “Nyining ke anyɔng Sisa bi ele bi Sisa, ka ke anyɔng Ɔsɔwɔ bi bele bi Ɔsɔwɔ.”

²⁶ Bɔ amaning akɔ we wa bi we achɔding afa wa boso bu bane, wantagi ebɔri eyi, beke beman bɔ ka bɔ afoi banyɔ.

Ebeb abangang enyimag wa Eko

²⁷ Nyining ebe bane ba Sadusi, ba ali tangag arɔ da bane achag anyimag ebu ala kwɔ, aban ɔmɔ Jisɔs yi ebeb.

²⁸ Bɔ arɔ, “Minkɔkɔi, Mosis asenging wa eben yifa ake sɔ arɔ ebu minine ala sɔd minkani ka akwɔ achai minkai ka mmɔn agwen, ninyen asɔdag minkai ekud awua agwe mbɔn alang ninyen wu akwɔ.

²⁹ Fafa efɔning mbɔn banyen ba banine banebara. Mindanen asɔd minkani ka aba king akwɔ mbɔn chang.

³⁰ Wu nbɔgabɔga

³¹ ka nyining ɔyɔngɔ bara asɔd we, ka ebem ayia yid bɔ banebara akwɔ agwen mbɔn.

³² Wa nkurikuri, minkani erɔng akwɔ.

³³ Nyining wa epo yi enyimang, we akɛmag minkai wu nene yi bɔ beri benebera bafa asɔding we?”

³⁴ Jisɔs abɔri bɔ arɔ, “Bane ba nggon yufa asɔdag erɔng akerag bɔ ebai.

³⁵ Ka bɔ ba arɔn arɔ bɔ akɔning yi akɛmag erɔng wa ndu yi boso yi wa enyimag wa eko bɔ ahɔsɔd erɔng ahɔke wa ebai,

³⁶ ka bɔ akɔngɔ kwɔ; bɔ akɛmag ala bakamag ba befong bi Ɔsɔwɔ. Bɔ ale mbɔn ba Ɔsɔwɔ, wantag yu bɔ enyimag wa eko.

³⁷ Ka kpe Mosis atɔngi jai arɔ bakoko ba akwɔn anyimi. Yi asenging abangang eyegag ekanakwɔ, mpi yu we ayening Minfɔni ale ‘Ɔsɔwɔ wu Ebraham, Ɔsɔwɔ wu Aisik yi Ɔsɔwɔ wu Jekɔb.’

³⁸ We chang Ɔsɔwɔ wu bakoko, ka ale Ɔsɔwɔ wu mbed, ka ɔmɔ wu feb ale mbed.”

³⁹ Nyining ebe bakɔag ba eben akpei alem arɔ, “Minkɔkɔi, we ɔchɔd gɔgi!”

⁴⁰ Ka bɔ ahɔ kan ahɔbeb we bebeb bintad.

Ebeb abangang Krais

⁴¹ Nyining Jisɔs abeb bɔ arɔ, “Ye ka atɔ arɔ Krais ale mmɔn wu Debid?

⁴² Kpe Debid minfɔni atɔn wa botiti bu Bebɛn bi bakag arɔ, “ ‘Minfɔni atɔn Minfɔni ama: “Kɛmi wa obolom ɔma

⁴³ tata me nlem bane ba ojing agwa esigag bako yi bako anwa.” ’

⁴⁴ Debid ayening we ‘Minfɔni.’ Ka elemag lan we atisɛm akɛmi mmɔn owu?”

Lesigi Abangang Bakɔag ba eben

⁴⁵ Yi bane feb ali tamag baroi, Jisɔs atɔ ba anyedag we arɔ,

⁴⁶ “Kodi anyɔng beke ebina yi bɔ bakɔag ba eben. Bɔ akeag aken yi berabaraba bi bewuri echobag bɔ bane akobag bɔ yi ejeg wa bekpen bi efɛn, ka erɔng betɛm bi boged wa boju bu efugi bu bane ba Ju akeag bekpen bi ejeg wa befɔg.

⁴⁷ Bɔ apɔag bakai ba nkud afɔdag boju obubɔ, ka bɔ asoag berabaraba bi bɔsɔm atɔngi arɔ bɔ aji Ɔsɔwɔ. Banine bafa baseni amibɔ ting ati gbɔg.”