Etingi Nsidi Nkeri Luk Asenging 19 - Ndoe

Jisɔs yi Sakiyɔs

¹ Jisɔs awei Jeriko ka anɔngɔ king afa.

² Efɔning mine eri wu baramag ba ntɛbatɛba yu mpam afa ayenag we arɔ Sakiyɔs, wu afanging ɔfang.

³ We ali nɔngag we arɔ mpedi mine wu Jisɔs ale, ka ntagi we akpering ɔkperi we amaning arɔ Jisɔs wa ekakab yi bane.

⁴ Ka we agbɛdi achag boso aka kom erere yi sikamɔ we anungi arɔ Jisɔs wu anɔngɔ king ebad ayia.

⁵ Yi Jisɔs ahɔsi ekpen ayia, we amɔn esɔ atɔ we arɔ, “Sakiyɔs, bi nsi babab, wantag me nwei we bɔkenken elei yifa.”

⁶ We abi ebuyid arami Jisɔs yi bochobag bu nted.

⁷ Bane feb ba arɔn yi ato ɔkpen, “Minine wufa afe aka wei bonkeken wa nju yu minlemag bobe!”

⁸ Ka Sakiyɔs alo belag atɔ Minfɔni arɔ, “Mɔn, Minfɔni! Fa belag bifa me ting nke bakpak ebad yi efang ema, ka kpewun wu me mmarɔ pɔi, me ting ntisɛm njɔg we nken enye.”

⁹ Nyining Jisɔs atɔ we arɔ, “Elei enyangang eba wa nju yufa, waoye minine wufa erɔng ale mmɔn wu Ebraham.

¹⁰ Wantagi Mmɔn wu Mine nban aba kei ka nyangi bɔ ba alɛm.”

Bokobi bu Bakpoga ma Gol ɔfɔ

¹¹ Yi bane anyinang awogag yifa, Jisɔs achag boso asidi bɔ bokobi. Wantagi we ale kped yi Jerusalim ka bane akering arɔ da Bɔlen bu Ɔsɔwɔ bɔnɔngɔ bɔtɛb ebuyid.

¹² Ka we arɔ, “Efɔning etɛm minine wu alon achag mpam yuntad eken era akɔ we bɔlen ka we atisɛm.

¹³ Ka we ayen bagban abi eriɔfɔ ake kpeicha mine okpoga wu gol yud atɔ bɔ arɔ, ‘Kun anyɔng bakpoga mafa nyɔ ɔken efɛn tata me ntisɛm.’

¹⁴ “Ka we achang anunag bane abi, afong bane anyedi we achag aka sidi bakɔrag ba balen arɔ, ‘Sɔ eken minine wufa akɛmi minen owuda.’

¹⁵ “Minine wufa akɔ we bɔlen ka we atisɛm abugag. Nyining we ayen bagban abi ba we aken bakpoga aba, we anungi ammai nching yu bɔ amarɔ olem.

¹⁶ “Mindanen mingban aba arɔ, ‘Nsinju, gol yud yu we oken me nli nching gol ɔfɔ mbodi.’

¹⁷ “Ka nsinju ayi abɔri we arɔ, ‘Olem, etingi mingban ama! Wantag yu we amaning ɔkɔri nggom bi fe, me ting nlem we mine eri wu mpam ɔfɔ.’

¹⁸ “Mbɔgabɔga mingban aba arɔ, ‘Nsinju, me nli nching yu gol esɔn mbodi wa gol yud yu we oken me.’ ”

¹⁹ “Nsinju eyi abɔri we arɔ, ‘We kɛmi mine eri wu mpam esɔn.’

²⁰ “Ka mingban wuntad aba arɔ, ‘Nsinju, da gol ɔya yu we oken me; me mbɔbing yu wa efɔ nka wobi.

²¹ Me nren we, wantag yu we ole esɔnga minine. We okunag yi ɔkan nunging erɔng ofug yi we ɔkan kwanging.’

²² “Nyining Nsinju eyi abɔri we arɔ, ‘Me ting nkun balem anwa nreb mpem eya, we ebe mingban! Ka we ojiji, oji a, ɔrɔ me nle esɔnga minine wu nkunag yi nkanuging erɔng nfug yi nkan kwanging?

²³ Ye ka we ɔlanging bakpoga angama wa nju yu bakpoga, eruafa ebu me nlatisɛm nrami mɔ yi nching?’

²⁴ “Nyining we atɔ ba alag afa yi we arɔ, ‘Rami anyɔng we gol oyu kun ke mine wu akwe gol ɔfɔ.’

²⁵ “Ka bɔ arɔ, ‘Nsinju, we agburɔ fɔn gol ɔfɔ!’

²⁶ “Ka we abɔri arɔ, ‘Me nsidi nyɔ ndɔ kpewun wu akwe, akerag we abodi obodi, ka bɔ ba akan kwei kpeyid, kpe ninsed wu bɔ akwe ting arami bɔ yi.

²⁷ Ka bɔ bane ba ojing agama ba akan ken arɔ me nkɛmi minen owubɔ, bag yi bɔ fa ka woi bɔ wa boso ɔgama.’ ”

Jisɔs awei Jerusalim ala Minen

²⁸ Yi Jisɔs amaning esidang bɔ bokobi bufa, we ara bɔ nnen boso, achag yu Jerusalim.

²⁹ Yi we ahɔbɔg Betfag yi Betani wa Mpɔp yu ayenag yu Mpɔp Olif, we afong bafai ba ali nyedag we achag boso asidi bɔ arɔ,

³⁰ “Chog anyɔng erimpam yi ele nyɔ boso, nkeri nyɔ ɔweag ala oyu, nyɔ ting ɔrɔ ni mmɔni ngwɔnkang wu abɔbing afa erɔng mine akan ba okom oyu. Wadi yu ɔbag yi yu fa.

³¹ Ebu mine kpewun abebing nyɔ arɔ, ‘Ye ka nyɔ ɔwadag yu?’ tɔ we ɔrɔ, ‘Minfɔni akeng yu.’ ”

³² Ka bɔ ba afonging ara nnen aka arɔ yu nkeri we asiding bɔ.

³³ Nkeri bɔ ali wadag ni mmɔni ngwɔnkang ayun, minfɔni abeb bɔ arɔ, “Ye ka nyɔ ɔwadag yu?”

³⁴ Bɔ abɔri we arɔ, “Minfɔni akeng yu.”

³⁵ Bɔ akun yu abag ɔmɔ Jisɔs, aten bokwu obubɔ nsɛm yu ni mmɔni ngwɔnkang ayun ka atɔb Jisɔs akom nsɛm oyu.

³⁶ Nkeri we ali chag ala bane aten nfɔ eyibɔ wa nnen.

³⁷ Yi we ahɔsi kped ekpen yi nnen achin eboi yi Mpɔp yu Olif, etɛm ekakab yi bane ba ali nyedag we ato ochob boted akagag Ɔsɔwɔ yi balem esɔesɔ wa feb nggom bi emanag beke bibɔ amarɔ rɔ:

³⁸ Bɔ ali chodag arɔ, “Eri enɔ ekɛmi yi Minen wu abag wa mpi yu Minfɔni!” “Ekunakuna ekɛmi wa mpam esɔ ka bakag akɛmi yi Ɔsɔwɔ wa esɔ yi echiming eking!”

³⁹ Ka ebe bane ba Farisi wa ekakab atɔ Jisɔs arɔ, “Minkɔkɔi, nyan ba anyedag we bakɛmi wedeg!”

⁴⁰ Jisɔs abɔri arɔ, “Me nsidi nyɔ, ebu bɔ ala gɔ wedeg, bara ting abeg esɔesɔ.”

Jisɔs abei wa eri yi Jerusalim

⁴¹ Yi we ale kpedikpedi yi Jerusalim ka we ahɔrɔ yu we abei eri eyi

⁴² arɔ, “Ebu ka nyɔ oji la wa elei yifa yi ka ebag nyɔ yi ekunakuna ka enɔb! Ka fafa awobi yi wa mmɛd amina.

⁴³ Nten ting aba yu bane ba ojing abina atɛbag bakom agbai nyɔ afari ka bɔ anyeag nyɔ eteng wa kpeicha bebad.

⁴⁴ Bɔ ting acheg bakom amina arob nsi ka bɔ ting awoi bane abina. Bane ba ojing abina ahɔchai ndinda kpeyud akɛmi nsɛm yu num, wantag yu nyɔ orening nten yu Ɔsɔwɔ aban owuna.”

Jisɔs wa nju yu Ɔsɔwɔ

⁴⁵ Nyining yi Jisɔs awen wa nju yu Ɔsɔwɔ ato ɔkep bachɔg ba efɛn arob efi.

⁴⁶ We atɔ bɔ arɔ, “Asenging wa botiti bu Ɔsɔwɔ arɔ, ‘Nju ama akɛmag nju yu nsɔm, ka nyɔ okpedi yu ale ekung yi bajijib!’ ”

⁴⁷ Kpeicha epo Jisɔs ali kɔag wa nju yu Ɔsɔwɔ. Ka Mineni basingag ba besingi yi bakɔag ba eben yi bane ba eri erɔng yi bane ali anɔgag awoi we.

⁴⁸ Ka bɔ arɔn nnen yu bɔ alemag yi, wantag yu bane feb acha awogag minchɔd owu akeng elem kpeyid esem bɔ.