Etingi Nsidi Nkeri Luk Asenging 18 - Ndoe

Bokobi bu Minkai ekud yi minrebag bɔpem

¹ Nyining Jisɔs asidi bɔ ba anyedag we bokobi akɔi bɔ arɔ basoag nsɔm kpɔkpɔk nten ekan jɔi bɔ.

² We arɔ, “Wa mpam yud efɔning minrebag bɔpem wu chang areag Ɔsɔwɔ erɔng chang ajegag bane.

³ Erɔng minkai ekud ale wa mpam ayua wu acha abag ɔmɔ owu aledag we arɔ, ‘Betɛbi tɔb me oreb mpem ema yi mine ojing ama.’

⁴ “Ka wa ekpri nten minrebag bɔpem akebokeb elemang nyum kpeyid ka wa nkurikuri we atɔ lɔ arɔ, ‘Kpe yi me chang nreag Ɔsɔwɔ yi yi chang egbarag me yi bane ali kerag,

⁵ ka wantagi efegayɔ yi minkai ekud wufa acha akerag me, me ting nsob mpem nke we eru afa agɔba akerag me efegayɔ yi emanag eke me oboreri!’ ”

⁶ Ka Minfɔni arɔ, “Wog yi minrebag mpem wu mbe wufa achɔding.

⁷ Ɔsɔwɔ ahɔsob mpem enɔb bane abi ba we asanging, ba babeag akerag we epen yi boru a? We ting ayingi etɔbang bɔ a?

⁸ Me nsidi nyɔ, we asobag mpem enɔb bɔ ahɔbebi nten. Ka ebu Mmɔn wu Mine alaba ting arɔ bane ba akwe ochorekpo wa nsisi a?”

Bokobi bu mine Farisi yi Minramag Ntɛbatɛba yu mpam

⁹ Jisɔs ahɔke bokobi buntad ake bane ba akering arɔ bɔ anɔbing aking ka amɔnag bane bawag fɔng.

¹⁰ “Banine bafai achin wa nju yu Ɔsɔwɔ aka soi nsɔm. Wud ale Farisi ka wu wag minramag ntɛbatɛba yu mpam.

¹¹ Wu Farisi alami ebad eyi asoi nsɔm arɔ, ‘Ɔsɔwɔ, me nkob we ndɔ me chang ala feb bane bantad, bajibag ba ejib, balemag ba bobe, ba boag ba befem. Chama Ɔsɔwɔ arɔ me chang ala minramag ntɛbatɛba yu mpam wufa.

¹² Ka me nkɛmag nsɔng nken efai wa efɛn erɔng nkerag ebad yid wa bebad ɔfɔ wa feb bi nkwei.’

¹³ “Ka minramag ntɛbatɛba yu mpam alami eken era. We akaming arɔ we atam boso obu esɔ, ka we asom babɔ wa ekpokpo arɔ, ‘Ɔsɔwɔ, nkɔ we nsɔn, me minlemag bobe.’ ”

¹⁴ Jisɔs arɔ, “Me nsidi nyɔ ndɔ wa banine bafa bafai minramag ntɛbatɛba yu mpam aleming nkeri wa boso bu Ɔsɔwɔ. Wantagi feb ba atamag beke apodag bɔ eboi ka bɔ ba apoding lɔ atamag bɔ esɔ.”

Jisɔs yi nkeked Mbɔnibɔni

¹⁵ Bane erɔng ali bag yi mbɔn abibɔ ɔmɔ Jisɔs arɔ we achori bɔ babɔ, ake bɔ enɔb. Ka banyedag ba Jisɔs ahɔ rɔ yi, bɔ anyan bɔ ka akeb bɔ.

¹⁶ Ka Jisɔs ayen mbɔn abag owu ka we arɔ, “Nungi nkekedi mbɔnibɔni abag ɔma, kan kpani bɔ, wantagi bɔlen bu Ɔsɔwɔ bole boke bane ala bɔ.

¹⁷ Ekonekon me nsidi nyɔ, kpewun wu akan raming bɔlen bu Ɔsɔwɔ ala ni nɛminke yibanya ahɔ wei obu.”

Ba afangingɔfang yi Bɔlen bu Ɔsɔwɔ

¹⁸ Minen wud abeb Jisɔs arɔ, “Etingi minkɔkɔi, ye me nlemag ka nfɔn ekwen yibanya yibanya?”

¹⁹ Jisɔs abɔri we arɔ, “Ye ka oyen me etingi? Mine kpewud wu anɔbing chang ekinging Ɔsɔwɔ bibi.

²⁰ We oji beben: ‘We kan boi efem, we kan woi, we kan jibejib, we kan lami ntese yu baram, jegi nsi yi nyen eya.’ ”

²¹ Ka minine awun abɔri arɔ, “Me nnungi beben bifa feb to yi me nle fe.”

²² Yi Jisɔs awoging yifa, we atɔ we arɔ, “We onyinang yi nyum yid yi we ɔkan lem. Chɔ feb bi ɔkwei oke bakpak da we ting ɔfɔn efang wa mpam esɔ. Nyining bag ɔba nyedi me.”

²³ Ka yi we awoging yifa, nted achobing we, wantagi we afanging gbɔg.

²⁴ Jisɔs amɔn we ka arɔ, “Ejɔag ka efangane awei wa bɔlen bu Ɔsɔwɔ!

²⁵ Ele ewɔra kamel aking mpog yu aga eking efangane awei wa bɔlen bu Ɔsɔwɔ.”

²⁶ Bɔ ba awoging yifa abeb arɔ, “Nene nyining wu amanag asem?”

²⁷ Jisɔs abɔri arɔ, “Yi egan mine ehɔga Ɔsɔwɔ.”

²⁸ Nyining Pita atɔ we arɔ, “Mmɔn! Sɔ echai feb bi sɔ ekwei anyedi we.”

²⁹ Jisɔs abɔri bɔ arɔ, “Ekonekon me nsidi nyɔ ndɔ, kpewun wu achan nju oyu lale minkai lale mbɔn ba nyen lale nyen lale nsi lale mbɔn wantagi bɔlen bu Ɔsɔwɔ

³⁰ ahori eramag nken jugijugi aking abia wa ekwen yifa yi eramag ekwen yibanya yibanya yi enɔngɔ ba.”

Jisɔs ahɔchɔd wa ɔyɔgɔ nken isia abangang eko eyi

³¹ Jisɔs akun bɔ eri ɔfɔ yi bafai ba ali nyedag we achag nkpɔgi aka sidi bɔ arɔ, “Sɔ enɔngɔ olo anyɔng Jerusalim, ka feb bi barɔag ba eyammɛd yi Ɔsɔwɔ asenging abangang Mmɔn wu Mine benɔngɔ ɔtɛb alafa.

³² Anɔngɔ jɔg we ake bane ba akan sid bane ba Ju. Bɔ ting alang we bakig, achib we ka apum we basɔn.

³³ Bɔ ting akwud we ka awoi we, ka wa ɔyɔgɔ ndu isia we ting anyimi.”

³⁴ Ka bɔ ba ali nyedag we kpeyid yifa erebing bɔ. Eri eyi awobing yi bɔ akan mai, ka bɔ amang yi Jisɔs ali chɔdag abangang.

Jisɔs Agban Minine wu acheging mmɛd

³⁵ Nkeri Jisɔs anɔngɔ bosi Jeriko, minine wu acheging mmɛd akig nkpɔgi nnen aledag beledi.

³⁶ Yi we awoging ekɔi yi bane ali kingang, we abeb yi eli tɛbag.

³⁷ Bɔ asidi we arɔ, “Jisɔs wu arun Nasaret ali kingag.”

³⁸ We abeg elem esɔesɔ arɔ, “Jisɔs, Mmɔn wu Debid, nungi me nkɔ we nsɔn!”

³⁹ Bɔ bale boso anyan we atɔ we arɔ kɛmi wedeg, Ka we abegag abɔgagɔbɔg, “Mmɔni Debid! nungi me nkɔ we nsɔn!”

⁴⁰ Jisɔs alami ake ɔsa arɔ abag yi minine awun. Yi ahɔsi kped, Jisɔs abeb we arɔ,

⁴¹ “Ye yi ɔken ɔrɔ me nlem nke we?” We abɔri arɔ, “Minfɔni, me nken ndɔ nrɔ nnen.”

⁴² Jisɔs atɔ we arɔ, “Rɔ nnen! Ekamang eya egban we.”

⁴³ Ebuyid we arɔ nnen ka anyedi Jisɔs, akagag Ɔsɔwɔ. Yi bane feb arɔn yi, bɔ erɔng akag Ɔsɔwɔ.