Juudeꞌ 1 - Naasioi

Diikaang Baito Tareveriai Kara Masikung Too'dempaamaing Sirakaapuverima (1:1-25)

¹ Ning tee Juude', tee Jiisuu' Karistoo' bakaang botovotonaa' ee'noko Jeemisi baara'ma'nung. Ninge aung karavoto˜ daariamang dii'anko dii' Kumponinge piaarurira bokururu'ning, teie Jiisuu' Karistoo'ke tarerurimaing.

² Tee piaa unaa-anta, mooa, ee'noko piaa Kumponing-etaing maneena' okoruriaing.

Doorenang Tampara Too'dempaako'ning Dootuu'koo Tumpariru'na'

³ Ee mmaikori', tero tee ninge Jiisuu'ke nii' ookara nari' domamuru'na' daarirerompii'naang noru'anko', teka enang noru' paarimarara nii'nung kapoo'koo daarirerompimang dii' puring-antarampii'naang Kumponing bakaang kara nii'ninge pituaa'neeng-koo orokoverererii'naang, ai' naro'ka bakevui amuru'nung nii'ke tare-koo, ee'noko paari-koo makotua'.

⁴ Ninge tee' naurampimang nii'ning nau-antanuka Kumponing noru'aavaing dii'koo makenge tumpariko, aa'paama, “Tenang nii' Karistoo'navitu deemarira nii' makosi tamung kato piamoriaina' nko-koo, Kumponinge kiimata-koo amorompia', teie piaamurimaung-koo.” Teing tee' minkuaama Karistoo' penkempaamaung tee ee'nara daurarong˜ masikung, niikaang Ovoring makosi, nii'nung otoa'. Kumponinge tero sira'puu'nung Daari Meekung-koo kuunge tee' teinge temurii' nantoonge barakosi' kompaavaina' botu basiarima.

⁵ Teie Kumponinge naumurimaung aa'nou'nunge: Iisipi'keta nantoong domang-antavurira napo' teing-koo nii'ning tee masika'antavaavaruu'ning dama'ke boo'antavuru'. Tee' ee'na' tero tampa' noru'eru'na' napo' nauramping tasi'perii'naang.

⁶ Napo' teing koosinunanka naumurimaunge. Tero bono' Kumponinge sipevuru'noo' dintu'aara bii'ka taura'paririo' Kumponinge te' biikanoo' oto'doma masipo'keta bata'uru'. Ee'noko Kumponinge taavi'urio' doong kante-koo tunumparava'noo'ke doonko otoromaung bera te'mung panka'mung simpe'uriaina'mung-koo basiariaing.

⁷ Napo' tee' nari' teing osi pankeng Sodom, Komora', ee'noko nii'ning teke due'ke otoroko'ning oraka' nkoarikotaa' kera'pariru'. Kaukauro nkoaama bakiaa'eema donkaang donkaang ninka nari' oraka' nkoariko'. Tee'koo Kumponinge kiimata-koo nta'ke tai-antavurira o'antavuru' nii'ke noru'koo.

⁸ Teka bane temurii'koong kiimata sira'pari otoko, teing aing nantoong tamung noone narung nau-antaraarima tee' nari' bii'ka biikaang mono orari-antavarimaung teing Sodom-nupoong nkoariko'na'. Teinge dimpa'aamaung tee Ovoring, ee'noko poore'aarikoo' teing koosinunanka˜ Kumponinge nerampurima nkovuru'ning.

⁹ Teka tee tero koosinung pankaing Maikol tee' nkoarava'. Tenang Sietani' ninka Moosesi bakaang mono boo'pario' nka-koo tata'eerema, bane pankainge, teka boonkoaritaa' teie Sietani' poore'uma kiimata-koo tampua' tee, teka aa'puu', “Ovoringe orokorui bake-antaruaing da'.”

¹⁰ Teka teinge ainge nau-antanukai aming kapoo' noru'aavaung tamung kato poore'aakoo'. Ee'noko teing kau' karenaumonanka matauropananka-pina' onouaamana' onouaakoo'. Ee'noko kapoo' mono-aapenung onoue narunge noru'aamaing tamung kato nkoaama orariarikoo'.

¹¹ Piaaru'nuka teing, ai' teing teing Keini' bakanavung siompaamaing baara'ma'nung dupisi'ura barakosi' nkavuu'nung. Napo' Beelamu mooni' nka-koo daanameng-koo baka avario' dupisi'au'na' avarikoo'. Ee'noko Koora bakaning-pina' nari' Kumponing-koo bei'bei'arikoo', ee'noko nari' orari-anta kune'aakoo' tee' urikamu' Koora dovang doonko tumpariru'na' kansi' kamaankuio'.

¹² Ookara batei-koo Ovoring bakaang taamang dii'ke navurariri nkoverimaung-koo domang orara ninka poroma tee orari-antavaamaung tee diikaang navunavu. Dii' ninka nari' taamanirima amaiaa'oroa' bii'ka toonaakoo' duuku'arima. Teing aa'ning-pina' oro'nuka: kamo' kovere-pina', pionge avitoitoi nkavuko apo'uarukoo'. Napo' tee koi' sinang bi'uaruio' bita'au'nung bakei boo'.

¹³ Napo' boo'a pirung-koong ta'da'parama koikoiri nkavuma avitoitoi sipuko oraka' oro'paramana' biikaang orara aarumo ninka tee' oro'nuka. Napo' teu-pina' beento'nu-pina' koonto'navunge nanuau-pina' oro'nuka tero miru'uru'ning tunumparava'noo'ke doong kante oto'koo.

¹⁴ Napo' tee' nari' Iinokei tarampeearama˜ teing aing minkuvuru' tenang Aadama-ita depeto parapara ˜kenaanka-taa navarang-koo basiarako aa'puu'noo'ka, “Ooveriko, Ovoring tee bakaning koosinunanka karinga ninka nari' poroaing.

¹⁵ Teie nantoong ookara simpe'urii'naang ee'noko teing Kumponing-koo kupi'nuka oreng tampurira tora'antavuriai tee-koo biikaang ookara oraka' nkonanka-koo bakei Kumponing too'dena' nkoaamaing-koo, napo' ookara kara ari'ariri'nanka Kumponing-koo minkuaakoo' ee'ninge bakaning kare-nupoonge.”

¹⁶ Aing teing minkuminkuru ee'noko naro'keta tuumpi nkonuka, biikaang noru' karakaraa'koong pia narung sionuka, ampirinumpariri kareaamaing, ee'noko auraiarima bauta' tamung eentanuka.

Taura'periai Teie Diikaang Baitoi Domang Puring-antarurii'naang

¹⁷ Teka ee mmaikori', dii'ke norunoru'eriaing tee kapoo'nanka niikaang Ovoring Jiisuu' Karistoo' bakaninge kara okovuri nkanukai dama'ke nkoaravaing sira'pau'na'.

¹⁸ Aa'daaru', “Dama'ke asi'namu' poroaing teing Kumponing daang-antavai benkempaavaining Kumponing-koo kupi'oroitaa' biikaang noru' karakaraa'koong pia narung siompai.”

¹⁹ Teing aing ee'ning tankatankaang nkoaamaing, kansi' bakaang onou-koo otoromaing, Tanuaang Meekung otoroaing.

²⁰ Teka dii', mmaikori', dii'ka deto kanirariaing diikaang masika'anta aa'na' meekung-koo. Kunsirariri tee ninka iri' ninka Tanuaang Meekung-etaing ninka.

²¹ Otori te' otoriai Kumponing bakaang piaae kuung deempui otoinoo'ke, banainge nemperi tee Domang-anta niikaang Ovoring Jiisuu' Karistoo' piaarurira domaang oparavauka'noo' basi-antaruriaina'.

²² Teing daang-koong nau-antanuka taaravaarima papaaravarimaing piaaverereri onou koong-antavererimaatoai.

²³ Nii'ning tampa' taararaariaining namu'ke mosianung-koong nta'keta batusi'erererima domang-antavereriai. Ee'noko napo' nii'ning Ovoring-anko bokuereriai tampa' nkoverererima, teka biikaang aarumo mono bakaang pia siona'koo maarerori pinka'dariaing, baaro'duriko teing pina' nari' dua'dari'neenga.

Kumponing Daangampampiai

²⁴ Enang si'noora'dampima tee Piikonara bakaang tanata-koo napo' si'damping dii' dua'dariaroo'naang. Ee'noko teie dii' kiiroraa'antarurira bakanoo' osi meenasi-po'noo' basi-antaruriai doturotu ninka.

²⁵ Tee tee narung Kumponing masikung, niikaang domang-anta, tee ninka niikaang Ovoring Jiisuu' Karistoo' ninka. Otoaing tee meenasi tee Kumponing-koo, tee daurarong anka-ankang deempari, teing ookara kapoo' tanata tee, iri' okora' – urikamu', enang, ee'noko dama'ke ookara batei-koo. Ee', tee' nari'.