Efisọs 5 - Ñwed Abasi Ke Ikọ Ibibio Ayo Mfịn

¹ Ikpebe Abasi sia edoññoke nditọ a-anye anekkeke ama,

² inyʌñ idu uwem ima, kpa nte Krais akimaaha ñnyịn, a-akenyʌññọ ayak idem amọ inọ ñnyịn nte inem ufịk enọ ye uwa anọ Abasi.

³ Ado ke atu ndufo inaaha adinam use aba, ndedeghe uwem ndomokeed me ubịme ñkpọ, sia mme ñkpọ ami ifọnnọ ke atu ndisana ikọd Abasi.

⁴ Utañ ndiọi ikọ inyʌññọ ina aba, ndisịme ikọ me atañ asak, a-ammiidotto, ado yak enọ ekọọm ikpọọñ.

⁵ Sia ana ndufo etʌm ediọọñọ: mme anam use, ndiọi ibon me mbon ñwo, utọ awo ntodo ado akpono ndem, inieeghe udeme ke abio ubọọñ Krais, ye ake Abasi.

⁶ Yak awo ndomokeed akuuyaañ fiin ke ikpu-ikpu ikọ sia ato ke ntak ñkpọ ntodo iyadesịd Abasi adoro mbon ntreutọñ.

⁷ Ke ntodo, ikiidoñño nsaña ye ammọ.

⁸ Sia ini keed ko ndufo ekedoñño mbon akịm, ado idahami edoñño unwana ke Abọọñ. Idu nte nditọ unwana

⁹ (sia mfịd unwana asịne ke afịd mfọnido ye akpanikọ)

¹⁰ nyʌñ yem ñkpọ se inem Abọọñ esịd.

¹¹ Kuunyʌñ unie ñkpọ ndomokeed adinam ye anana mfịd mme utom akịm, kuudịp ammọ.

¹² Sia ado ata ñkpọ abuud idem aditatañ se mbon ntreutọñ esinam ke ndịbe.

¹³ Ado unwana ayaara anyʌñ anam ekan ekịt ukeed ñkpọ.

¹⁴ Ntak ado anam ebo: “Demme, O andidaiya, set ke ñkpa, ndin Krais ayaayamma unọ fiin.”

¹⁵ Ikpeme ndin, naña edu uwem, idooho ke unana ifiọk, ado nte mme anie ifiọk,

¹⁶ itʌm idat ufañ e-enieeghe inam ñkpọ, sia mme usen ediọi.

¹⁷ Ke ntodo ikiidoñño ndisịme, ado yak uduak Abọọñ inwaña ndufo.

¹⁸ Ikiikpa mmịn, a-asañake ye adiseppe idem. Utu ke ado, iyọghọ ye Sịbidịd.

¹⁹ Ineme ye keed aken ke mme saam, mme ikwọ Abasi, mme ikwọ Sịbidịd. Ikwọ inyʌñ ibre ikwọ ke esịd ndufo inọ Abọọñ,

²⁰ afịd-afịd ini, inọ Abasi andido Ete ekọọm ke abaña afịd ñkpọ ke anyịñ Abọọñ ñnyịn Yisọs Krais.

Item a-anieeghe mme ufọk ikọdabasi

²¹ Isuuho idem inọ keed aken ke ukpono Krais.

²² Ibaan ndọ isuuho idem inọ mme ebe ndufo, nte esuuhọ enọ Abọọñ.

²³ Sia ebe ado iwuod anọ anwaan nte Krais adooho iwuod anọ ufọkabasi, idem amọ, a-anye anyʌññọ ado Andinyaaña.

²⁴ Do ndin nte ufọkabasi asuuhọke idem anọ Krais, akpena ibaan esuuk idem ammọ enọ mme ebe ammọ ke afịd ñkpọ.

²⁵ Mme ebe, ima ibaan ndufo, nte Krais akemaaha ufọkabasi anyʌñ akappa idem amọ anọ anye,

²⁶ nọ anam anye ado adisana, asiooño anye mbad ke adiyet ke mmọọñ ato ke ikọ,

²⁷ nọ anyʌñ aben anye awọt nte ufọkabasi a-ayamake, mbad isịneke, ibiomoke ndo ndomokeed, ado adisana, anyʌñ anana ndo.

²⁸ Ke ukem usʌñ ami, ana mme ebe ema ibaan ammọ. Awo a-amaaha anwaan amọ ama idem amọ.

²⁹ Ke aditʌm nse, awo ndomokeed akenam isuaaha idem amọ, ado anọ anye ndidia anyʌñ akama afọn, kpa nte Krais akamake ufọkabasi.

³⁰ Sia ñnyịn ido mme ndido idem amọ.

³¹ “Ke ntak ami, awodeen ayaakpọñ ete ye eka amọ anyʌñ akediana ye anwaan amọ, ndin ammọ awo iba eyaekappa edo abʌk keed.”

³² Ami ado ata ndedịbe ifiọk, ado ami ntañ mbaña Krais ye ufọkabasi.

³³ Kpa ye ado, awo keed-e-keed ana ama anwaan amọ nte anye amaaha idem amọ, ndin ana anwaan akpono ebe amọ.