Luke 14 - Maiadomu

Ieisu tomoqo vovona tubutubuqina ikavegiagiamaia Kaiata Kabaveyawai waineye

^1-2 Tamo Kaiata Kabaveyawai waineye Ieisu inaqo tamo Palisi kaditogumeta navanuqe inakani. We no waineye tamo tomoqo vovona tubutubuqina ibabaneni, we tomo'otoqa matatabudi Ieisu ikisakikikia kago tomoqo inakavegiagiamaia Kaiata Kabaveyawai waineye.

³ Beqa Ieisu ivelautoli Palisivo wete loina kaditovekaivevenavo waidie ivo, “Banikodiqa daloina? Kadasala toviqa taikavegiagiamaia Kaiata Kabaveyawai waineye o gebuka?”

⁴ We ge tamo vakai idavesipupuyeni. Beqa Ieisu toviqanina ialatovoni ikavegiagiamaia, mulineye ivoneni inaqo.

⁵ Wete Ieisu ivelautoliedi ivo, “Kago tamo aitoi waimie'eqa natumu o mubulumakau inabeku gulie Kaiata Kabaveyawai waineye banikodiqa kivalabubunedi? Ayagovi kivedimadimana kisilagai kaiatanina waineye.”

⁶ We Palisivo wete loina kanatovekaivevenavo ge tamo vakai idavesipupuyeni.

Eqavoi taunidi inasilagaidi kawaie Yaubada inasiobuyedi

⁷ Tutuyanina tomo'otoqa ilugulugu Palisinina navanuqe kani paipaina, Ieisu ikisedi iewaliwalikai wayaqidi inamiabui tomo'otoqa bwaigidi dikabamiabui waidie. Beqa ivonawakedubala waidie.

^8-9 Ivo, “Kago tamo tomoqo inamaseagamu naqi kanina waineye, ge kimiabui tomo'otoqa bwaigidi dikabamiabui waidie. Kago gunabeida kimiabui no waineye, oge kaninina kanatogumeta tamo tomoqo bwaigina wete imaseagai inavemuli inalekwa togumetanina inavonemu, ‘Kabamianina waineye kitovoi we inamiabui.’ We komu kinaqo tatanoqe kimiabui beqa kabavovomayamayaqa waimue!

¹⁰ “Beqa kago inamaseagamu, kinaqo tatanoqe kimiabui matautauda kaninina kanatogumeta inakisemu inavonemu inavo, ‘Iagu, kutovoi kumai sidede kabamiabui giamaina waineye.’ Tomo'otoqa matatabudi inakisemu inavekimatanemu.

¹¹ Eqavoi taunidi inasilagaidi kawaie Yaubada inasiobuyedi, we meqavoi taunidi inasiobuyedi kawaie Yaubada inasilagaidi.”

¹² Wete Ieisu tonivanuqa waineye ivesipupu ivo, “Kago kani siaina o bwaigina kivalabubuni ge emwavo kimaseagadi mesaida taimwavo, kamukailakavo o tomo'otoqa guyoguyodi imiamia muvikaie, paina kamukabeida inamaseagamu mesaida kibaivilai.

¹³ Beqa aivonemu, kago kani bwaigina kivalabubuni dede tomo'otoqanidiavo kimaseagadi, toveyomuyomu, bwalobwalogodi, totubuqakapo wete matadi pwalupwaludi.

¹⁴ Kabamwasana waimue tomo'otoqanidiavo kumaseagadi paipaina, paina ge kadisala inabaivilai. Kawaie Yaubada natomo'otoqa tonotonovidi ditovoi vaituqana waineye muvenapwayewanina kanabaivila kibabaneni.”

Ieisu ivonawakedubala kani bwaigina paipaina

¹⁵ We kaninina waineye tamo tomoqo Ieisu navona inoqai beqa menanualaga ivesipupu waineye ivo, “Kabamwasana bwaigina meqavoi inalugu Yaubada Nakabaloina naqeneye nakani bwaigina waineye inakani.”

¹⁶ We Ieisu navona ibaivilai vonawakedubalaeqa ivo, “Tamo toloina kani bwaigina ivalabubuni, we tomo'otoqa puedi imaseagadi.

¹⁷ We kaninina kanakaiata waineye natolituqa ivetuneni tomo'otoqanidiavo base ivemataluanidi ivonedi ivo, ‘Kwamai tainaqo saku matatabuna gunabeida ivalabubunidi.’

¹⁸ “We tomo'otoqanidiavo imaseagadi ibaila ivonadamana tupwaidiavo saku waidie. Tamo tomoqo ivo, ‘Yau kaiana paina gupwayapwaya agimwanei ainaqo aikiseni. Avelaukui waimue kutagwanegu aimiamia we ge aiwai.’

¹⁹ “Wete tamo tomoqo ivo, ‘Yau kaiana paina bulumakau 10 gunabeida agimwanedi. Deqoina ainaqo aivelituqatovonidi. Avelaukui waimue kutagwanegu aimiamia we ge aiwai.’

²⁰ “Wete tamo ivo, ‘Yau kaiana kaivaugu anaqi beqa ge aiwai.’

²¹ “Beqa tolituqanina ivila imai ivesipupu kanatoloina waineye. Toloinanina kanakapoka ioqala we natolituqa ivoneni ivo, ‘Vedimadimana kinaqo taoni kanakeda bwaigidi wete siaidi waidie, toveyomuyomu, bwalobwalogodi, totubuqakapo wete matadi pwalupwaludi kumaseagadi kumaiedi.’

²² “Beqa tolituqanina inaqo lituqanina ivalabubuni ikakava wete ivila imai kanatoloina ivoneni ivo, ‘Tomwaya, vakai kuvonegu gunabeida avalabubuni, we muvanuqa bwaigina giladi ge idaveadaqi.’

²³ “Beqa kanatoloina ivo, ‘Taoni kibaileni kinaqo maleweye keda bwaigidi waidie tomo'otoqa kibabanedi kiwewesedi inamai guvanuqa inaveadaqi.

²⁴ Aivonemi meqavoi naqaida amaseagadi ge tamo saiqana kanikani inakania.”

Kago wayaqida Ieisu taivemulieni, naqaida nalituqa kanamwau paipaina tainuani

²⁵ Yoko bwaigina Ieisu taiauda inaqonaqo we isivilai ivonedi ivo,

²⁶ “Aitoi wayaqina inamai waigue inavetovemuli naqaida tamana, inana, mwanena, natunavo, tainavo, novunavo wete taunina yawaina inabailedi matautauda inavetovemuli waigue.

²⁷ Aitoi ge idatagwana taunina kanalaukenobalabala inakavalai inavemuliegu, gumanina ge kanalaubwaina inavetovemuli paipaigu.

²⁸ “Naqaida kwaivenuana kamisala lituqanina kwaivalabubuni o gebuka. Dede mesaida, kago aitoi waimie'eqa wayaqina vanuqa bwaigina inayoqoni naqaida namane inakiseni vanuqanina kanatutula kanasala.

²⁹ Kago namane ge inakiseni, nakoqala inavetovoidi we ge kanasala inayoqona-kakavai wete tomo'otoqa inakiseni inasasaidibieni.

³⁰ We inavo, ‘Tomoqo dede wayaqina vanuqa inayoqoni we ge kanasala inavekakavai.’

³¹ “Wete mesaida kago kini valea inanoqai tamo kini menatolauqaviavo 20,000 imaimai wayaqidi taiauda inavetalaqa, we kininina valea inoqai naqaida inavenuana kanasala natolauqaviavo 10,000 inaveluluna kadiqaviavo 20,000 inavelulunapeledi.

³² Kago ge kadisala, tutuyanina kanaqaviavo giladi kanikie'eqa valea inavetuneni inaketobodedi wete inavelautoliedi inavo, ‘Vakai wayaqimu aivelemu kavagi ge taivetalaqa niwalova waineye taimiamia?’

³³ Side mesaida ge tamo aitoi kanasala inavo, ‘Yau Ieisu kanatovemuli,’ kago ge saku matatabuna inabailedi.

³⁴ “Ligwagwa saku giamaina, we kago naveluluna wete kanavebae inakakava ge kanasala wete inaveligwagwa-vaituqana.

³⁵ Ge mekanavelituqa. Ge kanasala pwayapwaya inagiaveluveluluni wete mosomoso pwasadi taiauda tailomwani pwayapwaya naveluluna paipaina, beqa ilaubwaineni taikata'iwaqayavuleni. “Kago komi metaniqami, guvona kwainoqai vakai aesipupuyeni waimie.”