Luke 13 - Maiadomu

Kago ge tainuavila mwaqitana taiwapa

¹ Tutuyanina waineye tomo'otoqa tupwaidiavo imai Ieisu waineye me Galili valeadi ivesipupuyeni ivo, “Me Galili tupwaidiavo ilugu Temupolo naqeneye ielomu Yaubada waineye we Pailato Gabemani naloina beqa natolauqaviavo imai iluvewapadi.”

² We Ieisu ivonedi ivo, “Kwadanuani tomo'otoqanidiavo iwapa dikapoina bwaigiotoqina we me Galili tupwaidiavo saiqanaqa? Kwadanuani no lamunina paipaina iveviqa?

³ Gebuka! We aivonemi, kago mikapoina waidie'eqa ge kwainuavila, komi matatabumi kwaiwapa.

⁴ We basenaqaida kwayagovi tomo'otoqa 18 imiamia Sailoami Ielusalema naqeneye we vanuqa kaniakwanina ibeku iluvewapadi. Kwadanuani tomo'otoqanidiavo iwapa dikapoina bwaigiotoqina we me Ielusalema tupwaidiavo saiqanaqa?

⁵ Gebuka! We aivonemi, kago mikapoina waidie'eqa ge kwainuavila, komi matatabumi kwaiwapa.”

⁶ We Ieisu vonawakedubalaeqa tomo'otoqa ivonedi ivo, “Tamo tomoqo nabagula waineye modaba itovotovoi. Tutuya puedi waidie inaqonaqo vuana paipaina we ikikisakavai.

⁷ Beqa nabagula kanatokisavekavina ivoneni ivo, ‘Diqaba kaitonu naqedie amaimai wayaqigu vuana aikewadi we ge tamo adababaneni. Beqa kitalaqayavuleni, ge inatovotovoi pwayapwaya inagogogovi.’

⁸ “We bagula kanatokisavekavina ivesipupu ivo, ‘Tomwaya kubaileni, naqaida lamuna aigenali wete kaupapa aisevali lamuna aiveivuya.

⁹ Matautauda taikiseni diqaba tamoqana naqeneye. Kago inavuaqa giamaina inatovotovoi, we kago gebuka kitalaqi.”

Ieisu vavine dumwedi kobwakobwana ikavegiagiamaidi

¹⁰ Tamo Kaiata Kabaveyawai waineye Ieisu iekaivevena sinagogi waineye.

¹¹ Sinagoginina waineye tamo vavina imiamia diqaba 18 naqedie vaitabu kapoidi iekuniqedi, we dumwedi ikobwa ge kanasala inatonova.

¹² Tutuyanina Ieisu ikisedi iqoledi inaqo waineye ivonedi ivo, “Vavine, kamiviqa waineye'eqa Yaubada gunabeida iketoyavumi.”

¹³ Matautauda Ieisu vavine igiatovonidi vedimadimanaeqa dumwedi itonova medimwasana Yaubada ididigeni.

¹⁴ We sinagogi kanatogumeta ikiseni kanakapoka ioqala paina Ieisu ikakavegiagiamai Kaiata Kabaveyawai waineye. Beqa togumetanina tomo'otoqa waidie ivesipupu ivo, “Kaiata 6 naqedie tailitulituqa. Kago kwaiviqa wayaqimi kwaivegiagiamai, kaiatanidiavo waidie kwaimai, we Kaiata Kabaveyawai waineye gebuka.”

¹⁵ We Ieisu togumetanina navona ibaivilai ivo, “Komi tokatupoe! Komi Kaiata Kabaveyawai tamoqana tamoqana waidie kwanaqonaqo mibulumakauvo wete midonikivo kwayavuyavudi kadivanuqa waidie kwanawenawedi kwaeyemudi, we kaia lituqanina.

¹⁶ Wete vavine dede tamo Ebelamo tubuna, we Seitani iyoqonidi imiamia diqaba 18 naqedie. Banikodiqa Yaubada iketoyavudi kadiyoqona waineye'eqa Kaiata Kabaveyawai waineye kanalaubwaina o gebuka? Avona-mwaqitana, kanalaubwaina.”

¹⁷ Dede mesaida Ieisu ivesipupuyedi kanatovedumwekaikaivo vovodi imayaqa, we tomo'otoqa matatabudi kaia imwasana-otoqa kabanuavilele Ieisu ivalabubunidi paipaidi.

Ieisu ivonawakedubala kailugu bilana wete isiti paipaidi

¹⁸ Matautauda Ieisu tomo'otoqa waidie ivesipupu ivo, “Vakai vonawakedubala beqa aivonemi Yaubada natomo'otoqa inaloinedi paipaina?

¹⁹ Kanakisa mesaida kailugu bilana siaiotoqina tamo tomoqo ikewai natanoqe ibaguli. Itabwa ivebwaiga welavi bwaigiotoqina we manuqa imaimai dimaneye ieqiuva.”

²⁰ We Ieisu ivelautoli-vaituqanedi ivo, “Vakai vonawakedubala beqa aivonemi Yaubada natomo'otoqa inaloinedi paipaina?

²¹ Kanakisa mesaida isiti siaina vevine pwalawa beigi kaitonu waidie ikata'iwaqi ivilai, we isitinina ilugu pwalawa matatabuna itubuqa ivebwaiga.”

Awa simomona

²² Tutuyanina Ieisu inaqonaqo Ielusalema, kedeye taoni wete vanuqa siaidi waidie iekaivevena.

²³ We tamo tomoqo Ieisu ivelautolieni ivo, “Tomwaya, Iave tomo'otoqa puedi inaketoyavudi o gebuka?”

²⁴ Ieisu navelautoli ibaivilai ivo, “Kwaivekautovona-veluveluluna kavagi awa simomona waineye kwailugu Yaubada Nakabaloina waineye. Aivonemi kawaie tomo'otoqa puedi wayaqidi inalugu awanina waineye we ge kadisala.

²⁵ Tutuyanina waineye tonivanuqa inatovoi awa inatutubodai we maleweye kwaitovoi kwaitututukeke kwaivelautoli kwanavo, ‘Tomwaya, wayaqima awa kisibaleni paipaima.’ “We Tomwaya mivona inabaivilai inavo, ‘Ge adayagovimi wete ge adayagovi vakaiebei kwamai.’

²⁶ “We komi kwanavo, ‘Taiauda takani wete tayemu, we mataoni kadikedeye kuekaivevena waimeye.’

²⁷ “We inabaivila inavo, ‘Ge adayagovimi wete ge adayagovi vakaiebeida kwamai. Kwanaqo komi tokapoina!’

²⁸ “Tutuyanina waineye kwaikisedi Ebelamo, Aisake, Iakobo wete palopitavo matatabudi Yaubada Nakabaloina naqeneye inamiamia, we komi inatawemi kwaiobu kalamulie kwaitaitaiqa wete niqomi inaekalaguniguni.

²⁹ We tomo'otoqa puedi inamai pwayapwaya kanamatatabu waineye, bolimanaeqa (isiti), youyaeqa (wesiti), kotalaeqa (noti) wete kwaibogaeqa (sauti) inalugu dikabamia inakewai Yaubada Nakabaloina naqeneye taiauda inakani-velautaubama.

³⁰ We gumanidiavo deqoina iemuli tutuya imaimai inagumeta, wete gumanidiavo deqoina igumegumeta tutuya imaimai inavemuli.”

Ieisu inua-kapo Ielusalema paipaina

³¹ No tutuyanina waineye tupwaidiavo Palisivo imai Ieisu ivoneni ivo, “Kini Elodi wayaqina inaluvewapamu beqa kideqa kinaqo sulineye.”

³² Ieisu divona ibaivilai ivo, “Elodi nayagova mesaida koukou walawalakai. Kwainaqo kwaivoneni kwanavo, ‘Kaigodi wete kawaie Ieisu vaitabu kapoidi tomo'otoqa iekuniqedi inakwavinedi inasauyedi wete toviqa inakavegiagiamaidi we kaiata kanavetonu waineye nalituqa inavekakavadi.’

³³ We aivonemi, deqoina wete kawaie anaqonaqo we tamo kaiata inakawananaqai kawakawaie ailekwa Ielusalema. Yaubada napalopitavo matatabudi no waineye iluvewapadi, beqa yau ilaubwainegu wete aiwapa no waineye.”

³⁴ Ieisu itaiqavolovoloqa ivo, “Aioi, me Ielusalema, me Ielusalema, Yaubada napalopitavo kwaluluvewapadi wete natopalimatamatana ietunedi waimie gileueqa kwaluluvewapadi. Kamukamu natudiavo papedie iedodoqidi, wete yau mesaida, tutuya puedi wayaqigu aivedodoqimi we kwabailegu.

³⁵ Tutuya dede waineye inaqonaqo Yaubada mivanuqa inabaileni, we yau ge wete kwaikisekisegu kanaketoava aivila aimai we no tutuyanina waineye kwaididigegu kwanavo, ‘Yaubada ivonavenapwayeweni gumanina Iave kanawavaqaeqa imaimai!”