Yudi 1 - Bibili 1927 (Omyene)

¹ Yudi, nyôngô yi Yesu‐Krist, na mwô’ngwè wi Yakobu, gôre waô wi re fweyô pa, wi tondô gôr’Anyambyè ya Rerè, avenjavenjô gôre Yesu‐Krist:

² nkèngo, n’am̃ènjè n’itonda si ga wuṉizô gôre ṉwè!

³ Mongi tondô, gw’aṽeli myè pôlô gô tèndiṉa ṉwè g’ômwanja w’isungiṉa si re gôre zwèdu, my’ajeṉ’isolo vèṉo gô tèndiṉa ṉwè nuginyaga ṉwè gô nwa pôlô g’ômwanja w’ibekelya s’avenyô gôr’iyombwi nyongo mô.

⁴ Konde re jingiṉa p’aṉag’awèwo n’avôṉô gôre ṉwè, wi re dôṽyô p’egômb’elônga g’ôgara wiṉo, aṉag’aṽe, wi kaluṉ’imèpiṉô s’Anyambyè yazô gw’isèkè, alande reri yazô mô n’Ôvangiṉi Yesu‐Krist.

⁵ Mi bela gô jônginya ṉwè, gôre ṉwè yi my’isam̃u yiṉo yôdu mbyambye, inè, Rerè, ayè sungiṉa p’aṉaga avila gô ntye y’Egipt, avila vovo ayilizi waô wi pa bekelya;

⁶ n’iyenjèl s’arweṉi si pa penjavenj’anyangi maômè, ndô s’arig’elumbi zaô, Rerè are penjavenja pa sô gô mpiri gw’igôrô ya koṉako kwanga gw’ijèkèlya si ntyugu mpôlô;

⁷ ga Sôdoma ni Gômora n’inkal’impôlô s’avegagi vingôvingô, waô pa p’ikuṽi yaô na waô g’ôṽelaṉô, na gw’intyal’imbe s’ôzôṉe, wi re dôṽyô p’elingilyô, njeṉag’azingô m’ôgôṉi wa pèkèpèkè.

⁸ Vangaṉe yeṉo, aṉaga wiṉo kè, wi durô n’ipikilyi saô s’enyalè, wi fweviz’izôṉe yaô mbela mèmô, avèdy’inyanga aroṽ’ampenda.

⁹ Ndô Mikèl yenjèl mpôlô mè, gw’azozi yè ni Satan azungakaṉa na yè ôkuṽa wi Môsès, aryeṉi gô sozizè n’ôroṽô, ndô awulyi nè: Rerè e ga zèmbe wè!

¹⁰ Ndô mongi siṉo wi kamba n’iroṽô isam̃u yi re waô wi pa mya, wi fweviz’ikuṽi yaô gw’isam̃u yi myô waô ni njaṉi g’inyam̃a si re si zele n’igu.

¹¹ Azile gôre waô! konde wi re sônga pe mpono yi Kayin, w’apali mangô gw’ifwem̃a si Balaam g’ômwanja w’ipa, w’ajilizyô gw’ipava si Kôre.

¹² Mongi siṉo ne abôke gw’igeṽe yaṉi y’itonda, gô nya waô na ṉwè, nyezag’ikuṽi yaômè pôlô vyagaṉô. Wiṉo ne vindi yi r’aṉingô fo, yi pèvizô n’impunga; rere y’eṉôm̃ô yi r’ilônda fo, juwa pe nyongo mbaṉi, tôduṉô pa n’iramba;

¹³ ikeṽ’iṽendi yi mbeṉe, njirag’ampuṉi mi ntyoṉi yaômè; igègèṉi yi bôlangaṉa, gôre waô wi re pigiṉô mpiri ya bogubogu gô koṉako.

¹⁴ Na g’ômwanja wa mongi siṉo avogi Enok kè, y’ôma w’ôrwageṉô avila gôr’Adam, awulya inè: Vônaṉi Rerè abyeṉi n’igôm̃i ny’intozèny s’iyombwi yè,

¹⁵ gô dend’ijèkèlya gôre waôdu, na gô sury’aṉag’aṽe waôdu g’ômwanja w’ijanj’ibe sôdu si re waô janja pa, na g’ômwanja w’agamba môdu m’iroṽô mi r’aṉag’aṽe kamba pa gô sirè.

¹⁶ Wiṉo n’aṉaga wi fum̃avum̃a, alagalaga, wi dwaṉa ga nt’ar’itongiṉi saôm̃è, wi re n’agwaṉa mi kamb’agamba m’ôvagasu, waô kè wi dwaṉa n’aṉaga wa sim̃ôsim̃ô g’ômwanja w’inyeṉa.

¹⁷ Ndô aṉwè, mongi tondô, yônginyaṉ’isam̃u y’alônge kambyô ne rôm̃i y’Ôvangiṉi wazô Yesu‐Krist.

¹⁸ W’awulinyi ṉwè inè, gw’egômb’eṉum̃uṉa e be by’izèlisi, nkangaṉaga ga nt’ar’itongiṉi saômè ibe;

¹⁹ wiṉo ne waô wi pang’ibangwaṉa, aṉaga wi sônga kaô ibela s’ôkuṽa, wi zele kè n’Iṉiṉa.

²⁰ Ndô aṉwè, mongi tondô, ṉuginyaṉ’ikuṽi yaṉimè gw’ibekelyi saṉi si nkèrè mpôlô, nkambiṉaga n’Iṉiṉ’Iṽya,

²¹ ko penjavenjaṉ’ikuṽi yaṉi gw’itonda s’Anyambyè, mbôndage nkèngo y’Ôvangiṉi wazô Yesu‐Krist gw’em̃èṉo za koṉako.

²² Lwaṉaṉi ni nkèngo gôre waô wi re n’impaga;

²³ zungiṉaṉ’am̃ori n’itya, nswagaga waô avila g’ôgôṉi, mbikaga vangaṉ’ingoy saô fwevizô pa n’ôzôṉe.

²⁴ Vèṉo, gôre yè yi re ko jolye penjavenja ṉwè avila gw’ipôswa sôdu alôṽya ṉwè g’ôzô w’ivendi nyè ntyèmbo fo na gw’igeṽ’ivôlô,

²⁵ gôr’Anyambyè dadyè, y’Ôzungè wazô, ga lwaṉ’ivenda, n’inyanga, n’ipangiṉa, ni ngulu, vo Yesu‐Krist y’Ôvangiṉi wazô, gômbe yôdu ṽyagaga ro, na vèṉo, na gw’egômbe zôdu! Amèn!