Yôsua 1 - Bibili 1927 (Omyene)

¹ Môsès, yi nyôngô yi Yeôva, juwa pa, Yeôva awulinyi Yôsua, y’ômwaṉa wi Nun, nyôngô yi Môsès, inè:

² Môsès, yi nyôngô yam̃, ajuwi; ndô vèṉo gum̃aṉa, ko dalye Yoridan yiṉo, awè n’iṉongo nyiṉo nyôdu, gô jingiṉa gô ntye yi pô myè gôr’awaṉa w’Israèl.

³ Mbôry’edu yi be jarô n’agandô m’intyôzô saṉi, mi pa ṉwè yô, ga nt’awulinyi myè Môsès.

⁴ Aṉwè be nive ntye avila gw’itôve ni Liban kwanga g’ôrèmb’ômpôlô, ôrèmbo wi Ferat, ntye yôdu y’Èti, na kwanga gô ntyuṽa mpôlô gô nkôṽa yi kènda ni nkômbe.

⁵ E zel’ôma wi be kum̃aṉa g’ôzô wo, ôlingô wi be dwaṉô wè bo. Mi be dwaṉa na wè, ga nt’alwaṉi myè ni Môsès; my’arige wè du, ge myè falo.

⁶ Yola ko sindy’ôrèm̃a, konde awè be niviz’iṉongo nyiṉo ntye y’arangyô myè ôrangô gôr’ireri saô gô pa waô.

⁷ Kaô dadyè yola azindy’ôrèm̃a mbyambye, ayanja ko bekelyô ga nt’ar’ivanga nyôdu ny’azômbyô wè ne nyôngô yam̃ Môsès; agegwa avila gô nyô gô nôm̃yè ge gô nyantwè, ko wè kekiz’ôsam̃u edu wi be kenjô‐wè.

⁸ Ko ezangô ziṉo z’ivanga z’alubwa du avila g’ôgwaṉi wo; ndô gèlagèla zô ôm̃anda n’ôgwèra ko wè janja aṽekelyô ga nt’ar’ezom̃’edu zi re tèndô pa gô zô; gambèṉè ô be keṽa gw’isam̃u yo, ko wè kekiza.

⁹ Mi pa sômbya wè inè: yola ko sindy’ôrèm̃a? Arya du ge tatam̃iṉa, konde Yeôva, Anyambyè yo, are na wè g’ôsam̃u edu wi be dendô wè.

¹⁰ N’aveṉi Yôsua ôzômbyô wiṉo gôr’iyôfisyè s’iṉongo mè:

¹¹ Gèndaṉi g’ôlakô, ko sômbyaṉ’iṉongo inè: Gekizaṉ’inya, konde gô ntyugu yi ntyarô aṉwè be dalye Yoridan yiṉo gô kè keṽe ntye yi pô ṉwè ne Yeôva, Anyambyè yaṉi, gô niva.

¹² N’awulinyi Yôsua mongi Rubèn, ni mongi Gad, n’ereṉe zi mbuṽe yi Manase inè:

¹³ Yônginyaṉi ga nt’azômbyô ṉwè ne Môsès, nyôngô yi Yeôva, gw’awulyi yè inè: Yeôva, Anyambyè yaṉi, are pa pa ṉwè ntye yiṉo.

¹⁴ Antô waṉi, awaṉi waṉi n’ilembi yaṉi y’inyam̃a yi be tigaṉa gô ntye y’avenyô ṉwè ne Môsès g’ôzamba wiṉo wi Yoridan; ndô aṉwèdu, aṉôm̃e wi ngulu, aṉwè be kènda keka pa n’imyanga y’igoṽi gô bôsô y’awareri yaṉi, ko ṉwè nunguṉa waô,

¹⁵ kaô Yeôva ap’ijowa gôr’awareri yaṉi ga nt’avenyô ṉwè, ko waô dwaṉa kè gô nive ntye yi pô waô ne Yeôva, Anyambyè yaṉi. Avila vovo aṉwè tô fwinya gô nive ntye yi re ṉwè dènga pa, y’avenyô ṉwè ne Môsès, nyôngô yi Yeôva, g’ôzamba wiṉo wi Yoridan, gô nkôṽa yi tongwa ni nkômbe.

¹⁶ N’awiṉizi waô Yôsua inè: Azwè be dend’ôsam̃u edu wi re wè sômbya pa zwè, azwè be kènda kè nkôṽy’edu yi be tôm̃ô zwè.

¹⁷ Azwè be jogiṉô wè gw’isam̃u yôdu, ga nt’ayogiṉô zwè Môsès. Kaô dadyè Yeôva, Anyambyè yo, e ga lwaṉe na wè, ga nt’alwaṉi yè ni Môsès!

¹⁸ Ôm’edu wi be pav’ôzômbyô wo, ko yè ayogiṉ’ôsam̃u edu wi be sômbyo yè, gambèṉè e be sônyô ôgôm̃a gô jôṉô. Dadyè yola ko sind’ôrèm̃a!