Yôna 1 - Bibili 1927 (Omyene)

¹ Igamba nyi Yeôva ny’aṽyeṉi gôre Yôna, y’ômwaṉ’ôṉôm̃e w’Amitay, inè:

² Gum̃aṉa, ko kènda gô Ninive, nkala mpôlô mèyoṉo, arônga gô sira yô! konde ibe sa yô s’apandi kwanga gôre myè.

³ Ndô Yôna agum̃aṉi gô fanga gô Tarsis, bô avila g’ôzô wi Yeôva. N’azum̃iṉi yè gô Yafô, n’aliṽinyi yè ôwatanga wi kènda gô Tarsis; n’aveṉi yè ipa s’ôgèndo, agweṉa g’ôwatanga gô kènda gô Tarsis na waô w’akweṉagi kè, bô avila g’ôzô wi Yeôva.

⁴ Ndô Yeôva azingiz’ômpung’ômpôlô gô mbeṉe, n’arweṉ’ôgul’ômpôlô gô mbeṉe. Yeṉo ôwatanga w’arweṉi gô dom̃iṉa.

⁵ Aryeṉi mongi w’ôwatanga, arôngi waô ôm’edu gôr’anyambyè yè, n’avungi waô igumba ny’avegagi g’ôwatanga gô mbeṉe, ko wô javura. Ndô Yôna aliwô asum̃iṉi g’ômpulungu w’ôwatanga, alèwa bi, alèwi yè antyôviṉô ampôlômè.

⁶ Yeṉo aṽyeṉ’ôma wi tev’ôronga gôre yè, awulinyè inè: Ntiṉa nde yi dèwo? Ṉongwa, ko dagiṉ’Anyambyè yo! vende twa Anyambyè e be pikilya zwè, ko zw’ayuwa.

⁷ N’awulyaṉi waô na waô inè: Yôgôṉi, azwè ga vungeṉ’ezôga, ko zwè mye ntiṉa ya mande yi re njuke yiṉo gôre zwè. N’avungi waô ezôga, n’agôt’ezôga gôre Yôna.

⁸ Vovo awulinyi waô yè inè: Wulinya zwè njuke yiṉo zwè dènga yô ntiṉa ya mande. Ô janje ṽilô nde, ô pila na gweṉi? Ntye yo ne yeṉi, n’awè iṉongo nde?

⁹ N’awiṉizi yè waô inè: Myè mw’Ebèr, mi tye Yeôva, Anyambyè y’ôrôṽa, y’avangi mbeṉe ni ntye.

¹⁰ N’aryeṉ’aṉôm̃e wiṉo ntyeṉi mbe, awulinyi waô yè inè: Ntina nde yi re wè denda p’ôsam̃u wiṉo? Konde aṉôm̃e wiṉo w’amyeṉi nè, awangi avila g’ôzô wi Yeôva, konde adiwô amyezi waô.

¹¹ N’awulinyi waô yè inè: Azwè ga lende wè sè, ko mbeṉe dimbiṉa zwè ôdèmbè? Konde mbeṉe y’abendagi pôlô vyagaṉô, apôswi ôgulônkangwè ômpôlô.

¹² N’awulinyi yè waô inè: Wongaṉi myè, ko pungaṉi myè gô mbeṉe, ko mbeṉe dimbiṉa ṉwè ôdèmbè; konde my’avôrô nè, ôgulônkangwè ômpôlô wiṉo wi re bya pa gôre ṉwè ntiṉa na myè.

¹³ Ndô aṉôm̃e wiṉo w’aṉugi pôlô gô bag’ôwatanga gô ntye, ndô wi pa jolya, konde mbeṉe y’aṽendiṉi waô pôlô vyagaṉômè.

¹⁴ Vovo alagiṉi waô Yeôva awulya inè: Yeôva, kokolo avanga zwè gô pera gô ntiṉa y’em̃èṉo z’ôma wiṉo, ko azoziza zwè gô ntyiṉa yi r’ôgara fo! Konde awè Yeôva, ô denda ga nte belo.

¹⁵ Yeṉo awongi waô Yôna, avungè gô mbeṉe. N’arigi mbeṉe ibenda.

¹⁶ N’aryeṉ’aṉaga wiṉo Yeôva pôlô, n’ayiri waô ntyagô gôre Yeôva avangaṉ’impangaṉô.