Yôan 9 - Bibili 1927 (Omyene)

¹ Gw’avyagaṉi Yesu, ayeṉi ôma w’avegag’ipoku avila gw’ayanyô yè.

² N’aṽambyô yè n’iṉèngi yè kotè yiṉo inè: Ôṉènji, mande ayanj’ibe, ôma wiṉo mbè izombi yè, gw’ayanyô yè ipoku?

³ Awiṉizi Yesu inè: Arang’ayè ge izombi yè, waô ayanj’ibe, ndô arweṉi yeṉo inè, ijanja s’Anyambyè si ga rum̃inyô gôre yè.

⁴ Mi ga yanje ṽilô y’ôma w’arôm̃i myè gô p’ar’ôm̃anda; ôgwèra wi bya, vovo e zel’ôma re ko jolye janja.

⁵ Ôlingô wi re myè gô ntye yiṉo, myè n’ôzange wi ntye yiṉo.

⁶ Ayè kamba pa yeṉo, arôny’igwaṉa gô ntye, avange ntyèngè ndèli n’igwaṉa. N’agili yè ntyèngè mè gw’antyo m’ipoku, awulinyè inè:

⁷ Gènda, ayôvuṉa gw’everô zi Silôa (ina mènyoṉo nyi pivya inè, itôm̃ô). N’agèndi yè, ayôvuṉa, aṽya kè njeṉaga.

⁸ Irangaṉô yè na waô w’ayeṉi yè gw’alônga inè, aṉègiragi, w’awulyi nè: Wiṉo arang’ayè y’alwaṉagi baru aṉègiraga?

⁹ Am̃ori w’awulyi nè: Ayè ne yè. Am̃ori nè: Nyawè, ndô ar’egolaṉi ga yè. Ayèmè awulyi nè: Myè ne yè.

¹⁰ Yeṉo awulinyi waô yè inè: Antyo mo m’aṉunguṉô sèṉi?

¹¹ Awiṉizi yè inè: Ôma wi fweyô inè, Yesu, apangi ntyèngè ndèli, agila yô gw’antyo mam̃, awulinya myè inè: Gènda gw’everô zi Silôa, ko jôvuṉa. Akènda myè gôgô, ayôvuṉa, ajeṉa myè.

¹² Awulinyi waô yè inè: Ôma mèwoṉo are na gweṉi? Awiṉizi yè inè: My’amye.

¹³ N’aṽagi waô gôr’ifarisi ayè y’avegag’ipoku.

¹⁴ Ndô ntyugu mè y’avangi Yesu ntyèngè ndèli aṉunguṉ’ antyo m’ôma mè y’avegagi soṉo.

¹⁵ Yeṉo arô bambyô kè ne ifarisi nt’alèngi yè ngulu yi jeṉa. N’awulinyi yè waô inè: Agili ntyèngè ndèli gw’ antyo mam̃, ayôvuṉi myè, ayeṉa.

¹⁶ Yeṉo awèwo gôr’ifarisi w’awulyi nè: Ôma wiṉo e pa pila gôr’Anyambyè, konde e pa penjavenje ntyugu yi soṉo. Ndô am̃ori w’awulyi nè: Ôm’ombe ko jolye dende lemba ôṉongo wiṉo sèṉi? N’arweṉi mpaga gôre waô.

¹⁷ N’arô bulinyi waô ipoku inè: Ô bulya sèṉi g’ômwanji wè, gô re nè aṉunguṉi antyo mo? Awiṉizi yè inè: Ayè ôvogisi.

¹⁸ Ndô Iju wi pa bekelya g’ômwanji wè inè, avegag’ipoku, na inè, antyo mè m’aṉungunyô, kaô gw’aweyi waô izombi y’ôma w’avenyô ngulu gô jeṉa.

¹⁹ W’aṽambyi waô inè: Wiṉo n’ômwaṉi waṉi wi bulyô ṉwè inè, ayanyô ipoku? Sambô vèṉo e jeṉa sèṉi?

²⁰ Awiṉiz’izombi yè inè: Azw’avôrô inè, wiṉo n’ômwaṉi wazô, na inè, ayanyô ipoku;

²¹ ndô nte jeṉè vèṉo, ge ôma w’aṉunguṉ’antyo mè, azw’amye yè. Atweṉi ôṉèro, ṽambyaṉi ayèmè, e be kamba g’ômwanja w’ôkuṽi wèmè.

²² Izombi yè y’agambi yeṉo konde y’aryeṉ’Iju; konde Iju w’aliwô w’akenji nè, jog’ôma amèma nè, Yesu ne Krist, gambèṉè e be tômbô avila gô nagô yi soṉo.

²³ Yeṉo awuly’izombi yè inè: Atweṉi ôma, ṽambyaṉi yèmè.

²⁴ Yeṉo arô fweyi ifarisi nyongo yi mbaṉi ôma w’ayanyô ipoku, awulinyè inè: Zum̃iny’Anyambyè; azw’avôrô inè, ôma wiṉo ôm’ombe.

²⁵ Awiṉizi yè inè: Jog’ayè ôm’ombe, mi pa mya; my’avôrô ôsam̃u ôm̃ori inè, my’avegag’ipoku, ndô vèṉo mi jeṉa.

²⁶ Awulinyi waô yè inè: Alendi ande gôre wè? Aṉunguṉi antyo mo sèṉi?

²⁷ Awiṉizi yè waô inè: My’are ṉwè bulinya pa, ndô aṉwè pa jogo; aṉwè bela tô jogo sèṉi? Aṉwè bela kè gô dwaṉ’iṉèngi yè?

²⁸ N’aroṽi waô yè awulya inè: Awè n’ôṉèngi wè; ndô azwè, azwè iṉèngi yi Môsès.

²⁹ Azw’avôrô inè, Anyambyè agambi ni Môsès; ndô ôma wiṉo azw’amye nkôṽa y’avili yè.

³⁰ Ôma mè awiṉizi waô inè: Ar’igamba nyi mamô inè, aṉwè pa mye nkôṽa y’avili yè, ndô aṉunguṉi antyo mam̃.

³¹ Azw’avôrô inè, Anyambyè e pa pôganyô aṉag’aṽe; ndô jog’ôma adubè alende ntondiṉi yè, gambèṉè Anyambyè apôganyô yè.

³² Ntye yiṉo ga pakilye pa jogaṉô inè, ar’ôma re nunguṉa p’antyo m’ôma w’ayanyô ipoku.

³³ Arwe nè ôma wiṉo e pa pila gôr’Anyambyè, gavoṉo ayolye dend’ezom̃a.

³⁴ Awiṉizi waô yè inè: W’ayanyô gw’ibe sitevô, ndô ô tô nènja zwè! N’azugi waô yè gw’igala.

³⁵ Ayogyô Yesu inè, w’asugi yè; n’alataṉi yè na yè, awulinyè yè inè: Ô bekely’Ômwaṉa w’Anyambyè?

³⁶ Awiṉizi yè inè: Ayè mande, Rera, ko mi bekelyè?

³⁷ Awulinyô yè ne Yesu inè: Ô re yè jeṉa pa, ne yè yi kamba na wè.

³⁸ N’awulyi yè inè: Rera, mi bekelya. N’azavinyè yè.

³⁹ Avila vovo Yesu awulyi nè: My’are bya pa gô ntye yiṉo gw’ijèkèlya, inè, waô wi re wi pa jeṉa wi ga yeṉe, na waô wi jeṉa, wi ga galw’apoku.

⁴⁰ Ifarisi sinyèwo s’avegagi na yè, gw’ayogyô waô agamba miṉo, w’awulinyi yè inè: Azwè kè azw’are apoku?

⁴¹ Awiṉizyô ne Yesu inè: Arwe nè aṉw’are apoku, gavoṉo aṉwè pa tô dwaṉa n’ibe. Ndô vèṉo aṉwè bulya inè: Azwè jeṉa. Yeṉo ibe saṉi si dwaṉa.