Yôan 7 - Bibili 1927 (Omyene)

¹ Isam̃u yiṉo vya, Yesu agangaṉagi gô Galile, konde e pa jivira gô dwaṉa gô Yuda, konde Iju w’awutagi gô jôṉè.

² Ni fèti y’Iju, fèti yi nôge saka, y’arweṉi pyèrè.

³ N’awareri yè w’awulinyè inè: Lubwa avila vèṉo, ko kènda gô Yuda, ko iṉèngi yo kè jeṉe ṽilô yi dendô wè.

⁴ E zel’ôma wi janj’ezom̃a gô ntyorya, ko ayèmè bele myô gô bwè: j’aw’adend’isam̃u yiṉo, gambèṉè rum̃iny’ôkuṽi wo gôr’aṉaga.

⁵ Konde vangaṉe awareri yè wi pa bekelye yè.

⁶ Yeṉo awulinyô waô ne Yesu inè: Egômbe zam̃ zi pa twa, ndô egômbe zaṉi zi re keka pa egômbe zôdu.

⁷ Ntye y’ayolye bike ṉwè, ndô yi bika myè, konde mi takilya g’ômwanja wa yô inè, ijanja sa yô si re sibe.

⁸ Vandaṉi, aṉwè, gô fèti yiṉo; mi pa twa gô panda gô fèti yiṉo, konde egômbe zam̃ zi pa keka.

⁹ Ayè bulinya pa waô agamba miṉo, alwaṉi gô Galile.

¹⁰ Gw’avandi awareri yè gô fèti, avandi yè kè gô fèti, aranga zange ndô ntyora.

¹¹ N’awutôgô yè n’Iju gw’egômbe zi fèti, awulya inè: Are na gweṉi?

¹² N’arweṉi ôlagalag’ômpôlô gôr’aṉaga g’ômwanji wè. Awèwo w’awulyi nè: Wiṉo ôm’ombya. Am̃ori w’awulyi nè: Aranga yeṉo, ndô e fwem̃iz’aṉaga.

¹³ Ndô e pa kamb’ôma zange g’ômwanji wè, g’ômwanja w’itya s’Iju.

¹⁴ Ndô gw’arweṉi fèti garegare, Yesu avandi gô nagô y’Anyambyè. N’aṉènji yè.

¹⁵ N’am̃am’Iju, awulya inè: Ôma wiṉo e mya Irèndo sèṉi ayè pa nènga ni mori?

¹⁶ Awiṉizô waô ne Yesu inè: Inènji sam̃, arang’isam̃imè ndô s’ôma w’arôm̃i myè.

¹⁷ Jog’ôma abela gô dende ntondiṉi yè, gambèṉè e be mya g’ômwanja w’inènja twa pa si pila gôr’Anyambyè, ntyo mi kamba myèmè.

¹⁸ Ayè yi kamba ayèmè, e but’ivendi nyèmè; ndô ayè yi but’ivenda ny’ôma w’arôm̃i yè, ôma mèwoṉo are giligili, na gôre yè e zele mbe du.

¹⁹ Môsès e pa pa ṉwè ivanga? Ndô e zel’ôma gôre ṉwè e penjavenj’ivanga. Ntiṉa nde yi buta ṉwè gô jôṉa myè?

²⁰ N’awiṉizi aṉaga inè: Ô re n’iṉiṉ’iṽe. Mande buta gô jôṉo?

²¹ Awiṉizô waô ne Yesu inè: My’alendi elemb’em̃ori, n’am̃ami ṉwèdu.

²² Môsès are pa pa ṉwè ikèra, (aranga inè, s’avili gôre Môsès, ndô s’avili gôr’irerè,) n’aṉwè kèr’ôma gô ntyugu yi soṉo.

²³ Jog’ôma akèrô gô ntyugu yi soṉo, ko ivanga nyi Môsès nyi pa pavô, gambèṉè ntiṉa nde yi bendiṉa ṉwè myè, konde my’are tôliza p’ôma g’ôwenja wi soṉo?

²⁴ Ayèkèlyaṉi ga nte jeṉô, ndô yèkèlyaṉi ijèkèlya sa rèti.

²⁵ Vovo awulyi awèwo wa mongi Yerusalèm inè: Wiṉo arang’ayè yi butô waô gô jôṉè?

²⁶ Na vôna, e kamba zange, ko w’awulinyè ezom̃a! Ko dwaṉa rèti nè, ivangiṉi y’amyeṉi nè, wiṉo ne Krist?

²⁷ Ndô ôma wiṉo, azw’avôrô mbôra y’apilô yè; ndô gô be bye Krist, e zel’ôma wi be mya nkôṽa y’apilô yè.

²⁸ Na gw’aṉènjagi Yesu gô nagô y’Anyambyè, arôngi nè: Aṉw’avôrô myè, aṉw’avôrô kè mbôra y’avilyô myè: Mi pa bya kè myèmè, ndô ayè y’arôm̃i myè are giligili, n’aṉwè pa myè.

²⁹ My’avôrô yè; konde my’avili gôre yè, ayè kè ay’arôm̃i myè.

³⁰ Yeṉo awuti waô gô kôtè, ndô e pa taly’ôma ôgo gôre yè, konde igwèri nyè nyi pa diwô ny’atweṉi.

³¹ Awenge gôr’aṉaga w’avegagi vovo w’aṽekelyi yè, n’awulyi waô inè: Gô be bye Krist, e be dende lemba vyagaṉô ni nt’ar’ôma wiṉo denda pa?

³² Ifarisi s’ayogyô aṉaga wi dagalag’isam̃u yiṉo g’ômwanji wè. Vovo imiṉisè impôlô n’ifarisi w’arôm̃’aṉaga gô kôtè.

³³ Awulyi Yesu inè: Mi p’are na ṉwè vo mw’ôlingô, gambèṉè my’akènda gôr’ôma w’arôm̃i myè.

³⁴ Aṉwè be buta myè ko ṉwè alènga myè, n’aṉwè ayolye bye gô mbôra yi re myè.

³⁵ Vovo awulyaṉ’Iju inè: Ôma wiṉo e be kènda na gweṉi, ko zwè alèngè? E be kènda gôre mongi wi re pazangaṉa pa gôre Grèk, aṉènje Grèk?

³⁶ Igamba nyiṉo nyi pivya sèṉi nyi bulyô yè inè: Aṉwè be buta myè ko ṉwè alènga myè, n’aṉwè ayolye bye gô mbôra yi re myè?

³⁷ Gô ntyugu num̃uṉa, ntyugu mpôlô yi fèti, Yesu agum̃aṉi gôre, arônga inè: Jog’ôma ajeṉ’esôve, e ga ṽye gôre myè, ko yè jonga.

³⁸ Ayè yi bekelya myè, e be pôv’iloṽi y’aṉingô ma bo avila gw’iwum̃u nyè ga nte buly’Irèndo.

³⁹ Awuly’igamba nyiṉo g’ômwanja w’Iṉiṉ’Iṽya ny’avegagi gô pô gôre waô w’aṽekelyi yè, konde Iṉiṉ’Iṽya nyi pa diwô ny’apenyô, konde Yesu e pa diwô apendizyô.

⁴⁰ Awenge gôr’aṉaga, gw’ayogyô waô agamba miṉo, w’awulyi nè: Giligili wiṉo n’ôvogisi mèwoṉo.

⁴¹ Am̃ori w’awulyi nè: Wiṉo ne Krist. Ndô am̃ori w’awulyi nè: Sambô Krist e be bya avila gô Galile?

⁴² Irèndo yi pa bulya inè, Krist e bya avila gô mbuṽe yi David, n’avila gô nkala yi Betelèm y’alwaṉôgô David?

⁴³ Yeṉo arweṉi mpaga gôr’aṉaga g’ômwanji wè.

⁴⁴ Awèwo gôre waô w’aṽeli gô kôtè, ndô e pa taly’ôma ôgo gôre yè.

⁴⁵ Vovo awinyi aṉaga mè w’arôm̃yô gô kôtè awinya gôr’imiṉisè impôlô n’Ifarisi. Na w’awulinyi waô mongi w’arôm̃i waô inè: Ntiṉa nde yi re ṉwè e pa bage yè?

⁴⁶ N’awiṉizi aṉaga w’arôm̃yô inè: Pa kamb’ôma yeṉo ni mori, ga nte kamb’ôma mèwoṉo.

⁴⁷ Ifarisi s’awiṉizi waô inè: Aṉwè kè aṉw’afwem̃izyô?

⁴⁸ Ar’ôma gôre mongi pangiṉa ge gôr’ifarisi are yè bekelya pa?

⁴⁹ Ndô aṉaga wiṉo wi re w’amye ivanga, wi re savô pa!

⁵⁰ Nikôdèmô, ayè y’aṽyeṉi gôre Yesu ôgwèra, avegagi kè ôm̃ori gôre waô, awulinyi waô inè:

⁵¹ Ivangi nyazô nyi keṽiz’ôma ny’alônge jogw’agambi mè amya nt’are yè denda pa?

⁵² Awiṉizi waô yè inè: Awè kè mwô’Galile? Gèlagèla, gambèṉè ô be jeṉa nè, agogwe ôvogisi avila gô Galile.

⁵³ N’agèndi waô ôm’edu gô nagô yèmè.