Yôan 6 - Bibili 1927 (Omyene)

¹ Isam̃u yiṉo vya, Yesu agèndi gô ntye mori y’eliṽa zi Galile, zô n’eliṽa zi Tiberyade.

² N’azôngyô yè n’aṉag’awenge, konde w’ayeṉi lemba y’alendyô yè gôre waô w’ayogyô inkaṉi.

³ N’avandi Yesu gô nômba, alwaṉa vovo baru ayè n’iṉèngi yè.

⁴ Ndô Paki, yi fèti y’Iju, y’arweṉi pyèrè.

⁵ Gw’arômbiṉi Yesu antyo mè, ayeṉ’aṉag’awenge wi bya gôre yè, awulinyi Filipi inè: Azwè be kôl’inya na gweṉi, ko aṉaga wiṉo nya?

⁶ Awulyi yeṉo gô kèṉizè, konde ayèmè amyeṉi nte be dendè.

⁷ Awiṉizyô yè ne Filipi inè: Inya si re ko kôlô ni nkam̃a s’ifura mbaṉi s’ageke gôre waô gôr’ôm’edu gô bonga ’mwezom̃a.

⁸ Ôm̃ori avila gôr’iṉèngi yè, Andru ya mwô’ngwè wi Simôn Pyère, awulinyi yè inè:

⁹ Vèṉo r’ômwaṉa wi re n’amunga mi mpèmba ataṉè ni ntyuè mbaṉi, ndô yom̃a yiṉo ande gôr’aṉag’awenge wiṉo?

¹⁰ Awulyi Yesu inè: Lwaṉizaṉi aṉaga barugebaru. Avegagi kè am̃aṉi am̃enge gô mbôra mèyoṉo. Yeṉo alwaṉi waô barugebaru; w’avegagi pyèrè ni ntozèny s’aṉaga ôtaṉè.

¹¹ Yeṉo awongi Yesu amunga mè mi mpèmba, n’ayè pa p’akeṽa, ageriṉi waô w’avegagi barugebaru, n’aveṉi yè waô kè intyuè nt’aṽeli waô.

¹² Gw’ayôri waô, awuliny’iṉèngi yè inè: Gum̃inyaṉi nkizi y’adèka, ko aver’ezom̃a.

¹³ Yeṉo agum̃inyi waô yô, ayôny’igôm̃i ny’itôndô n’itôndô mbaṉi yi nkizi y’arigaṉi avila gw’amunga mi mpèmb’ataṉè m’anyenyô ne waôdu.

¹⁴ Gw’ayeṉi aṉaga mè elemba z’alendyô ne Yesu, w’awulyi nè: Giligili wiṉo n’ôvogisi mè wi bya gô ntye yiṉo.

¹⁵ Gw’amyeṉi Yesu inè, wi bela gô bya gô kôtè ni ngulu avangè ôga, arô tômbi ôkuṽi wè, agènda gô nômba ayè anka.

¹⁶ Gw’arweṉi nkôlô, iṉèngi yè y’azum̃iṉi gw’eliṽa.

¹⁷ N’agweṉi waô gw’elende, alaly’eliṽa agènda gô Kapèrnaum. N’ayili ôwenja, ndô Yesu e pa diwô abyeṉi gôre waô.

¹⁸ N’azingi ôgulônkangwè ômpôlô, n’aṽendi eliṽa.

¹⁹ Waô nuga p’agôm̃i m’inanda ambaṉi ni nand’ôtaṉè ntyo agôm̃i m’inanda ararô, ayeṉi waô Yesu e jar’eliṽa aṽya pyèrè n’elende; n’aryeṉi waô.

²⁰ Ndô Yesu awulinyi waô inè: Ne myè, aryaṉi!

²¹ Yeṉo aṽeli waô gô bongè gw’elende, n’aziṽi elende pelè gô ntye y’agèndyô waô.

²² Aṉaga w’arigaṉi gô ntye mori y’eliṽa gw’ayeṉi waô inè, e re pegeg’elend’ezèṉè vovo, kaô em̃ori, na inè, Yesu e pa kweṉa n’iṉèngi yè gw’elende mè, ndô inè, w’agèndi waô dadyè.

²³ Bunya gw’aṽyeṉi lende mori avila gô Tiberyade pyèrè ni mbôra y’anyeṉi waô mpèmba, Rerè pa p’akeṽa,

²⁴ gw’ayeṉ’aṉaga inè, Yesu ge iṉèngi yè wi re pegege vovo, waômè w’agweṉi gô lende mèyoṉo agènda gô Kapèrnaum gô bute Yesu.

²⁵ Na gw’alèngi waô yè gô ntye mori y’eliṽa, w’awulinyi yè inè: Ôṉènji, w’aṽyeṉi egômbe zeṉi?

²⁶ N’awiṉizyô waô ne Yesu inè: Giligili mi bulinya ṉwè inè, aṉwè buta myè, aranga konde aṉw’ayeṉi lemba, ndô konde aṉw’anyeṉi mpèmba ayôra.

²⁷ Ayanjaṉi gô dèng’inya si maṉe maṉaga, ndô g’ômwanja w’inya mè si dwaṉa gw’em̃èṉo za koṉako, si be pô ṉwè n’Ômwaṉa w’ôma; konde ayè re dingilyô pa ne Rerè, Anyambyè, n’elingilyô zè.

²⁸ Vovo awulinyi waô yè inè: Azwè ga lende ande gô janje ṽilô y’Anyambyè?

²⁹ Awiṉizyô waô ne Yesu inè: Eṽilô z’Anyambyè ze ziṉo inè, aṉwè ga ṽekelye ôma wi re yè tôm̃a pa.

³⁰ Awulinyi waô yè inè: Sambô elemba nde zi dendô wè, ko zwè jeṉa zô, aṽekelyo? Ô dend’ande?

³¹ Ireri sazô s’anyeṉi manu gw’itôve, ga nt’are tèndô pa inè: Aveṉi waô mpèmba avila g’ôrôṽa gô nya.

³² Yeṉo awulinyô waô ne Yesu inè: Giligili, mi bulinya ṉwè inè, arange Môsès aveṉi ṉwè mpèmba avila g’ôrôṽa, ndô Reri yam̃ ayè pa ṉwè mpèmba ya rèti avila g’ôrôṽa;

³³ konde mpèmba y’Anyambyè ne yô yi sum̃iṉa avila g’ôrôṽa av’em̃èṉo gô ntye yiṉo.

³⁴ N’awulinyi waô yè inè: Rera, va zwè mpèmba mè egômbe zôdu.

³⁵ Awulinyô waô ne Yesu inè: Myè ne mpèmba y’em̃èṉo. Ayè yi bya gôre myè arô jogo njaṉa nyèṉè, n’ayè yi bekelya myè arô jeṉ’esôve nyèṉè.

³⁶ Ndô my’awulinyi ṉwè inè, aṉw’are jeṉa pa myè, ndô aṉwè pa bekelya.

³⁷ Ôm’edu e pô myè ne Reri yam̃ e bya gôre myè, n’ayè yi bya gôre myè, my’awiṉize yè du;

³⁸ konde my’are sum̃iṉa pa avila g’ôrôṽa, aranga gô dende ntondiṉi yam̃, ndô ntondiṉi y’ôma w’arôm̃i myè.

³⁹ Ni ntondiṉi y’ôma w’arôm̃i myè ye yiṉo inè, my’averiz’ôma avila gôr’aṉaga waôdu wi re yè pa myè, ndô inè, mi ga rôngunye waô gô num̃uṉa.

⁴⁰ Ntondiṉi ya Reri yam̃ ye yiṉo inè, ôm’edu e jeṉ’Ômwaṉa aṽekelyè e be dwaṉa n’em̃èṉo za koṉako, na mi be tôngunyè gô ntyugu num̃uṉa.

⁴¹ N’alagalag’Iju g’ômwanji wè, konde awulyi nè: Myè ne mpèmba y’azum̃iṉi avila g’ôrôṽa.

⁴² N’awulyi waô inè: Wiṉo arange Yesu mè, y’ômwaṉa wi Yôsèf, are reri yè ni ngi yè azw’avôrô waô? Sambô ntiṉa nde yi bulyè inè: My’azum̃iṉi avila g’ôrôṽa?

⁴³ N’awiṉizyô waô ne Yesu inè: Alagalagaṉi aṉwè n’aṉwè.

⁴⁴ E zel’ôma wi bya gôre myè, kaô Rerè y’arôm̃i myè adurè, na mi be tôngunyè kè gô ntyugu num̃uṉa.

⁴⁵ Are tèndô pa kè gô yangô y’ivogisi inè: Waôdu wi be nènjô n’Anyambyè. Yeṉo ôm’edu kè are jogo pa gôre Rerè awong’inènji sè e bya gôre myè.

⁴⁶ Aranga nè Rerè are jeṉô pa n’ôm’edu, kaô ayè y’avili gôre Rerè.

⁴⁷ Giligili mi bulinya ṉwè inè: Ayè yi bekelya myè, are n’em̃èṉo za koṉako.

⁴⁸ Myè ne mpèmba y’em̃èṉo.

⁴⁹ Ireri saṉi s’anyeṉi manu gw’itôve, n’ayuwi waô.

⁵⁰ Yiṉo ne mpèmba yi sum̃iṉa avila g’ôrôṽa, yi re jog’ôma anya yô ayuwe du.

⁵¹ Myè ne mpèmba ya bo y’azum̃iṉi avila g’ôrôṽa. Jog’ôma anye mpèmba yiṉo, e be dwaṉa bo egômbe zôdu, ni mpèmba yi be pô myè, yô n’ôzôṉe wam̃, wi be pô myè gw’em̃èṉo zi ntye yiṉo.

⁵² Yeṉo alôṽaṉag’Iju mpaga, awulya inè: Ôma wiṉo ko jolye pa zwè ôzôṉe wè gô nya sèṉi?

⁵³ Vovo Yesu awulinyi waô inè: Giligili mi bulinya ṉwè inè, j’aṉw’ any’ôzôṉe w’Ômwaṉa w’ôma, ayonge ntyiṉi yè, gambèṉè aṉwè azele n’em̃èṉo gw’ikuṽi yaṉi.

⁵⁴ Ayè yi ny’ôzôṉe wam̃ ayonge ntyiṉi yam̃ are n’em̃èṉo za koṉako; na mi be tôngunyè kè gô ntyugu num̃uṉa.

⁵⁵ Konde ôzôṉe wam̃ n’inya sa rèti, ni ntyiṉi yam̃ n’ijonga sa rèti.

⁵⁶ Ayè yi ny’ôzôṉe wam̃ ayonge ntyiṉi yam̃ e dwaṉa gôre myè, myè kè mi dwaṉa gôre yè.

⁵⁷ Ga nt’arôm̃yô myè ne Rerè ya bo, ko mi dwaṉa bo vo Rerè, yeṉo kè ayè yi nya myè e be dwaṉa bo vo myè.

⁵⁸ Yiṉo ne mpèmba y’azum̃iṉi avila g’ôrôṽa. Aranga ga nt’anyeṉ’ireri saṉi manu, ayuwa: ayè yi nye mpèmba yiṉo e be dwaṉa bo gô koṉako.

⁵⁹ Yesu awuly’isam̃u yiṉo gw’aṉènjagi yè gô nagô yi soṉo gô Kapèrnaum.

⁶⁰ Yeṉo awenge gôr’iṉèngi yè gw’ayogyô waô igamba nyiṉo, w’awulyi nè: Nyiṉo igamb’iyoli, mande re ko jolye pôganyô nyô?

⁶¹ Ndô gw’amyeṉi Yesu g’ôrèm̃i wè inè, iṉèngi yè w’adagalaga g’ômwanja w’igamba mè, awulinyi yè waô inè; Igamba nyiṉo nyô bendya ṉwè?

⁶² Na j’aṉwè tô jeṉ’Ômwaṉa w’ôma e panda gô mbôra y’avegôgô yè gw’alônga, gambèṉè? ...

⁶³ Iṉiṉa nyi dwaṉiza bo, ôzôṉe wi pa nunguṉe mpongo. Agamba mi re myè bulinya pa myè ṉwè mô n’iṉiṉa n’em̃èṉo.

⁶⁴ Ndô ar’awèwo gôre ṉwè wi re wi pa bekelya. Konde Yesu amyeṉi avila gw’ipakilya waô wi re wi pa bekelya, n’ayè y’avegagi gô kôtizè.

⁶⁵ N’arô bulyi yè inè: Gô ntiṉa yiṉo yô re myè bulinya pa ṉwè inè, e zel’ôma re ko bya gôre myè, kaô apô ngulu ne Rerè.

⁶⁶ Avila gw’egômbe mèziṉo, awenge gôr’iṉèngi yè w’awinyi ni nyum̃a, ko w’arô kangaṉa na yè nyèṉè.

⁶⁷ Yeṉo Yesu awuliny’iṉèngi yè inè: Aṉwè kè, aṉwè bele dubwa?

⁶⁸ Simôn Pyère awiṉizi yè inè: Rera, azwè be kènda gôre mande? Ô re n’agamba m’em̃èṉo za koṉako.

⁶⁹ N’azw’are bekelya pa amya kè inè, awè ne Krist, y’Ômwaṉa w’ôrunda w’Anyambyè.

⁷⁰ Awiṉizyô waô ne Yesu inè: Aranga myè re pinja pa ṉwè ôṉambaṉi? N’ôm̃ori gôre ṉwè n’iṉiṉ’iṽe!

⁷¹ Agambi g’ômwanja wi Yudas Iskaryot, y’ômwaṉa wi Simôn; konde ayè avegagi gô kôtizè, ayè kè avegagi ôm̃ori gôr’igôm̃i n’aṽaṉi.