Yôan 5 - Bibili 1927 (Omyene)

¹ Isam̃u yiṉo vya, arweṉi fèti y’Iju, n’avandi Yesu gô Yerusalèm.

² Ndô, gô Yerusalèm, pyèrè n’iguge ny’adombè, are mbôra yi sovuṉa yi fweyô gô nkambiṉi y’Ebèr inè, Betesda, ni mbôra mè yi re ni vungu ôtaṉè.

^3-4 Gô vungu yiṉo alwaṉagi aṉag’awenge w’avegagi n’inkaṉi, apoku, ni bôke, na mongi wi jogo awogo.

⁵ Avegagi vovo ôṉôm̃e w’alwaṉi ni nkaṉi agôm̃i m’impum̃’ararô n’impum̃’eṉanay.

⁶ Gw’ayenyô yè ne Yesu dèwa pa bi, amya inè, adwaṉi ni nkaṉi ôling’ôla, awulinyi yè inè: Ô bele tôlizô?

⁷ Awiṉizô yè n’ôma wi jogo inè: Rera, mi zele n’ôma wi fwela myè gô mbôra yi sovuṉa gô sugô aṉingô, ndô ôlingô wi bya myè gôgô, ôm’ômwèṉè e diwô kweṉa myè myè ziṽaga ro.

⁸ Awulinyô yè ne Yesu inè: Nongwa, rômbiṉ’ôdô wo, ko kèndaga.

⁹ N’arôlizyô ôma mè pelè, n’arômbiṉi yè ôdô wè, agèndaga.

¹⁰ N’ôwenja mè w’avegagi soṉo. Yeṉo awulinyi Iju ôma w’ayingyô inè: Nèṉo soṉo, e zele kwèkwè gôre wè gô twaṉ’ôdô wo.

¹¹ Ndô awiṉizi waô inè: Ayè y’atôliza myè abulinya myè inè: Rômbiṉ’ôdô wo, ko kèndaga.

¹² Aṽambyi waô yè inè: Ôma mè mande abulinyo inè: Rômbiṉ’ôdô wo, ko kèndaga.

¹³ Ndô ayè y’arôlizyô e pa my’ebagaṉô z’ôma w’arôlizi yè; konde Yesu aliwô atômbi ôkuṽi wè avila gôr’aṉaga w’avegagi gô mbôra mèyoṉo.

¹⁴ Avila vovo, Yesu aliṽinyi yè gô nagô y’Anyambyè, n’awulinyè yè inè: Vôna, w’atôli; arô dend’ibe nyèṉè, awè vende byeṉô n’ôsam̃u ômbe vyagaṉô na wiṉo.

¹⁵ N’agèndi ôma mè, amyeze Iju inè, ôma w’arôlizi yè ne Yesu.

¹⁶ Gô ntiṉa mèyiṉo Iju w’agombizi Yesu, konde alend’isam̃u yiṉo gô ntyugu yi soṉo.

¹⁷ Ndô Yesu awiṉizi waô inè: Reri yam̃ e janja kwanga gw’egômbe ziṉo; myè kè mi janja.

¹⁸ Gô ntiṉa yiṉo Iju w’arô buti vyagaṉô gô jôṉè, konde e pa jôṉa dadyè ntyugu yi soṉo, ndô aweyi Anyambyè inè, Reri yè kè, mpangag’ôkuṽi wè mbela mô n’Anyambyè.

¹⁹ Yeṉo awiṉizi Yesu, awulinya waô inè: Giligili mi bulinya ṉwè inè, Ômwaṉa ayolye dend’ezom̃a ayèmè, ndô kaô nte jeṉè Rerè e denda; n’ezom̃’edu zi dendô ne Rerè, zô kè zi dendô n’Ômwaṉa mbela mô.

²⁰ Konde Rerè e tond’Ômwaṉa, arevè isam̃u yôdu yi dendô yè; e be tevè kè isam̃u impôlô vyagaṉô na yiṉo, ko ṉwè m̃ama.

²¹ Konde ga nte tôngunye Rerè mongi wi re juwa pa alwaṉiza waô bo, yeṉo kè Ômwaṉa e dwaṉiza waô wi belô yè bo.

²² Konde Rerè e pa jèkèly’ôma, ndô are pa p’ijèkèlya sôdu gôr’Ômwaṉa,

²³ inè, aṉaga waôdu wi ga lub’Ômwaṉa ga nte duba waô Rerè. Ayè yi re e pa dub’Ômwaṉa, e pa duba kè Rerè y’arôm̃i yè.

²⁴ Giligili mi bulinya ṉwè inè, ayè yi jogw’igambi nyam̃, aṽekely’ôma w’arôm̃i myè, are n’em̃èṉo za koṉako, aṽye kè gw’ijèkèlya, ndô are pyagaṉa pa avila gw’ijuwa agènda gw’em̃èṉo.

²⁵ Giligili mi bulinya ṉwè inè, igwèra nyi bya, nye nyiṉo kè, nyi be jogo mongi wi re juwa pa inyôy ny’Ômwaṉa w’Anyambyè; na waô wi be jogo nyô wi be dwaṉa bo.

²⁶ Konde ga nt’are Rerè n’em̃èṉo g’ôkuṽi wèmè, yeṉo kè are pa p’Ômwaṉa gô dwaṉa n’em̃èṉo g’ôkuṽi wè.

²⁷ Are pè pa k’inyanga nyi jèkèlya, konde ayè n’Ômwaṉa w’ôma.

²⁸ Am̃amaṉi g’ômwanja w’igamba nyiṉo; konde igwèra nyi bya nyi be jogo waôdu wi re gw’irôngiṉô ayogw’inyôy nyè, ko waô kogwa.

²⁹ Waô wi re denda pe mbya wi be tôngwa gw’em̃èṉo, ndô waô wi re denda pe mbe wi be tôngwa g’ôgara.

³⁰ My’ayolye dend’ezom̃a myèmè: mi jèkèlya nte jogo myè; n’ijèkèlyi sam̃ si r’ôgôre, konde mi pa bute ntondiṉi yam̃imè, ndô ntondiṉi y’ôma w’arôm̃i myè.

³¹ Ja my’atakilya g’ômwanja w’ôkuṽi wam̃imè, agambi mam̃ mi zele rèti.

³² Ar’ôm’ômwèṉè wi takilya g’ômwanji wam̃, my’avôrô kè inè, agamba mi takilyô yè g’ômwanji wam̃ mi re rèti.

³³ Aṉw’are tôm̃a pa gôre Yôan, n’arakilyi yè ôrèti.

³⁴ Agamba mi bongô myè mi pa pila gôr’ôma; ndô mi buly’isam̃u yiṉo inè, aṉwè ga zungiṉô.

³⁵ Yôan avegagi lambi yi bam̃iṉa aṽamba, arondi ṉwè gô jeṉe mbya g’ôzange wè vo mw’ôlingô.

³⁶ Ndô my’are n’agamb’ampôlô vyagaṉô na mi Yôan, konde ṽilô yi re Rerè pa pa myè gô denda, ṽilô mèyoṉo yi dendô myè; yô takilya g’ômwanji wam̃ inè, Rerè ayè re tôm̃a pa myè.

³⁷ Ni Rerè kè y’arôm̃i myè, ayèmè re takilya pa g’ômwanji wam̃. Aṉwè pa jogw’inyôy nyè ni mori, ge jeṉ’ôzô wè,

³⁸ n’igambi nyè nyi pa dwaṉa gôre ṉwè, konde aṉwè pa bekely’ôma wi re yè tôm̃a pa.

³⁹ Aṉwè kèlagèl’Irèndo, konde aṉwè pikilya inè, gô yô aṉw’are n’em̃èṉo za koṉako, n’Irèndo yiṉo yô takilya g’ômwanji wam̃.

⁴⁰ N’aṉwè pa bela gô bya gôre myè gô dèng’em̃èṉo!

⁴¹ Mi pa bong’inyanga avila gôr’aṉaga.

⁴² Ndô my’avôrô ṉwè inè, aṉwè aze n’itonda s’Anyambyè gw’ikuṽi yaṉi.

⁴³ My’are bya pa gw’ina nya Reri yam̃, ndô aṉwè pa bonga myè; j’abya ôm’ômwèṉè gw’ina ny’ôkuṽi wèmè, aṉwè be bongè.

⁴⁴ Aṉwè be bekelya sèṉi, aṉwè yi pô inyanga ôm̃ori n’ôm̃ori, ndô aṉwè pa but’inyanga nyi pila gôr’Anyambyè dadyè?

⁴⁵ Avikilyaṉi nè, mi be soziza ṉwè g’ôzô wa Rerè; ôma wi be soziza ṉwè, ne Môsès yi dôṽiṉô ṉwè igum̃u.

⁴⁶ Konde arwe nè aṉwè bekelye Môsès, gavoṉo aṉw’atô bekelya myè kè, konde arèndi g’ômwanji wam̃.

⁴⁷ Ndô j’aṉw’aṽekelya nt’are yè tènda pa, gambèṉè aṉwè be bekely’agambi mam̃ sèṉi?