Yôan 3 - Bibili 1927 (Omyene)

¹ Avegag’ôma gôr’ifarisi, ini nyè ne Nikôdèmô, ôm̃ori avila gôr’ivangiṉi y’Iju.

² Ayè mèwoṉo aṽyeṉi gôre Yesu ôgwèra, awulinyè inè: Rabi, azw’avôrô inè, awè n’ôṉènji w’avili gôr’Anyambyè; konde zel’ôma re ko jolye dende lemba yiṉo yi dendô wè, kaô Anyambyè adwaṉa na yè.

³ Awiṉizyô yè ne Yesu inè: Giligili mi bulinyo inè, kaô ôma ajaṉô ijaṉô ijoṉa, ayolye jeṉ’iṉongo ny’Anyambyè.

⁴ Nikôdèmô awulinyi yè inè: Ôma ko jolye jaṉô sèṉi j’atweṉi mbôlô? Ayè ko jolye tô jingiṉa gw’iwum̃u nyi ngi yè nyongo yi mbaṉi ayaṉô?

⁵ Awiṉizi Yesu inè: Giligili mi bulinyo inè, kaô ôm’ajaṉô n’aṉingô n’Iṉiṉa ayo lye jingiṉe gw’iṉongo ny’Anyambyè.

⁶ Ezom̃a zi re jaṉô pa n’ôzôṉe zô n’ôzôṉe, n’ezom̃a zi re jaṉô pa n’Iṉiṉa zô n’iṉiṉa.

⁷ Am̃ama konde my’abulinyo inè: Aṉwè ga yaṉô ijaṉô ijôna.

⁸ Ômpunga wi pèviṉa gô nkôṽa yi bela wô, ô jogo kè inyôy nya wô; ndô w’amye nkôṽa yi pila wô, ge nkôṽa yi kènda wô. Yeṉo r’ôm’edu are jaṉô pa n’Iṉiṉa.

⁹ Awulinyô yè ne Nikôdèmô inè: Isam̃u yiṉo ko dwaṉa sèṉi?

¹⁰ Awiṉizyô yè ne Yesu inè: Awè n’ôṉènji w’Israèl ko w’amya isam̃u yiṉo!

¹¹ Giligili mi bulinyo inè, azwè buly’isam̃u yi myô zwè, arakily’isam̃u yi re zwè jeṉa pa; ndô aṉwè pa bong’agambi mazô.

¹² Ja my’abulinya ṉwè isam̃u yi ntye yiṉo, ko ṉw’aṽekelya, aṉwè be bekelya sèṉi, ja my’abulinya ṉwè isam̃u y’ôrôṽa?

¹³ E zel’ôma re panda pa g’ôrôṽa, kaô ayè y’azum̃iṉi avila g’ôrôṽa, ayè n’Ômwaṉa w’ôma re g’ôrôṽa.

¹⁴ Na ga nt’arômbiṉi Môsès ôm̃amba gw’itôve, yeṉo kè Ômwaṉa w’ôma e ga rômbiṉô,

¹⁵ inè, ôm’edu e bekelyè e ga lwaṉe n’em̃èṉo za koṉako.

¹⁶ Konde itonda s’arondi Anyambyè aronde ntye yiṉo s’avangi yè gô p’Ômwaṉi wè w’ikika inè, ôm’edu e bekelyè avere, ndô e ga lwaṉe n’em̃èṉo za koṉako.

¹⁷ Konde Anyambyè e pa tôm̃’Ômwaṉi wè gô ntye yiṉo inè, e ga yekelye ntye, ndô inè, ntye yi ga zungiṉô vo yè.

¹⁸ Ayè yi bekelyè e pa pô ôgara; ndô ayè yi re pa bekelya, are pô p’ôgara, konde e pa bekely’ina ny’Ômwaṉa w’ikika w’Anyambyè.

¹⁹ Ni mpeṉi y’ôgara mè ye yiṉo inè, ôzange wi re bya pa gô ntye, ko aṉaga tonde mpiri vyagaṉô n’ôzange, konde ijanji saô s’avegagi s’ibe.

²⁰ Konde ôm’edu e dende mbe e bik’ôzange, e pa bya kè g’ôzange, ijanji sè si vende dènge ntyèmbo;

²¹ ndô ayè yi dend’ôrèti e bya g’ôzange, ko ijanji sè jeṉaṉa, konde si re janjô pa gôr’Anyambyè.

²² Isam̃u yiṉo vya, aṽyeṉi Yesu n’iṉèngi yè gô ntye yi Yuda; alwaṉi yè vovo na waô, aṽatizaga.

²³ Yôan kè aṽatizagi gw’Enon, pyèrè ni Salim, konde vovo avegagi aṉingô am̃enge; n’aṽyeṉi aṉaga vovo gô batizô.

²⁴ Konde Yôan e pa diwô afwelyô gô ntyôgô.

²⁵ N’alôṽaṉ’iṉèngi yi Yôan mpaga na mwô’Ju g’ômwanja w’ijombunya.

²⁶ Aṽyeṉi waô gôre Yôan, awulinyè inè: Ôṉènji, ayè y’avegagi na wè gô ntye mori yi Yoridan, arakilyô wè g’ômwanji wè, vôna, e batiza, n’aṉaga waôdu wi bya gôre yè.

²⁷ Awiṉizi Yôan inè: Ôm’ayolye dèng’ezom̃a kaô z’apô yè avila g’ôrôṽa.

²⁸ Aṉwèmè, aṉw’arakilyi g’ômwanji wam̃ inè, my’awulyi nè: Myè arange Krist, ndô mi re tôm̃ô pa gô bôsô yè.

²⁹ Ayè yi re n’ômwantô wi jômbô ne ôṉôm̃e wi jômba; ndô ndegô y’ôṉôm̃e wi jômba, e kum̃aṉa vovo, e jogw’agambi mè, e jeṉe mbya mpôlô g’ômwanja w’inyôy ny’ôṉôm̃e wi jômba: sambô mbyi yam̃ yiṉo y’akeki.

³⁰ E ga vende mpendaga, ndô myè, mi ga gonge.

³¹ Ayè yi pila gw’igôṉô are gw’ewônjô za waôdu; ayè yi pila gô ntye ayè ezom̃a zi ntye, e kamba kè g’ezom̃a zi ntye. Ayè yi pila gw’igôṉô are gw’ewônjô za waôdu,

³² e takilya g’ômwanja w’isam̃u yi re yè jeṉa pa na yi re yè jogo pa, ndô e zel’ôma wi bong’agambi mè.

³³ Ayè yi re bonga p’agambi mè are jivira p’igamba nyiṉo inè, Anyambyè ayè ôma w’ôrèti;

³⁴ konde ayè yi re tôm̃ô pa n’Anyambyè e kamb’agamba m’Anyambyè, konde Anyambyè e pa pè Iṉiṉa n’egèṉizô.

³⁵ Rerè e tond’Ômwaṉa, are pa pa kè yom̃a yôdu gw’ago mè.

³⁶ Ayè yi bekely’Ômwaṉa are n’em̃èṉo za koṉako, ndô ayè yi re pa bekely’Ômwaṉa ayeṉ’em̃èṉo, ndô eguṉu z’Anyambyè zi dwaṉa gôre yè.