Yôan 21 - Bibili 1927 (Omyene)

¹ Isam̃u yiṉo vya, Yesu arô tum̃inyi ôkuṽi wè gôr’iṉèngi, g’ôsaṽa w’eliṽa zi Tiberyade. N’awôm̃unyi yè yeṉo inè:

² Simôn Pyère, ni Tôma, aweyôgô inè, Didime, ni Natanaèl, y’avili gô Kana yi Galile, n’awaṉa wi Zebeday, n’iṉèng’im̃ori mbaṉi yi Yesu, w’avegagi mbôra mô.

³ N’awulinyô waô ne Pyère inè: Mi ke jôṉ’intyuè. Awulinyi waô yè inè: Azwè kè azwè be kènda na wè. N’agogwi waô agweṉa gw’elende, ndô ôgwèra mèwoṉo wi pa jôṉ’ezom̃a.

⁴ Ayenjiṉa, Yesu agum̃aṉi g’ôzègè, ndô iṉèngi yi pa mya inè, ayè ne Yesu.

⁵ Awulinyô waô ne Yesu inè: Awaṉa, aṉw’are n’ezom̃a zi nya? Awiṉizi waô yè inè: E zele.

⁶ N’awulinyi yè waô inè: Vungaṉ’elôṽa g’ôzir’ôṉôm̃yè w’elende, gambèṉè aṉwè be jôṉa. Yeṉo avungi waô zô, gambèṉè wi pa jolya gô tô dura zô g’ômwanja w’ibuṉa s’intyuè.

⁷ Vovo ôṉèngi mè w’arondyô ne Yesu, awulinyi Pyère inè: Woṉo ne Rerè! Na gw’ayogyô Pyère inè, woṉo ne Rerè, awori ngoy yè mpôlô, aliry’ôtumbi wè, konde avegagi tele, n’avôswi yè gô mbeṉe.

⁸ Ndô iṉèng’im̃ori y’aṽyeṉi n’elende, ndurag’elôṽa ralye n’intyuè, konde wi re pegege bô ni ntye, w’avegagi ntyanjô pyèrè n’agôm̃i m’iguṽa ataṉè.

⁹ Na gw’ayèzi waô gô ntye, w’ayeṉi vovo ebeke z’ôgôṉi ni ntyuè dimbiṉô pa gô zô ni mpèmba.

¹⁰ N’awulinyô waô ne Yesu inè: Ṽagaṉ’intyuè si re ṉwè jôṉa pa.

¹¹ Yeṉo agweṉi Simôn gw’elende, alur’elôṽa gô ntye ralye n’intyuè impôlô, nkam̃a n’agôm̃i m’intyuè ataṉè ni ntyuè ntyarô; ndô vangaṉe s’alwaṉ’inyenge yeṉo, elôṽa zi pa jarwa.

¹² Awulinyô waô ne Yesu inè: Yôgôṉi, ko nyaṉi. Na gôr’iṉèngi e re pegeg’ôma w’aṽambyi yè inè: Awè mande? Konde w’amyeṉi nè, ayè ne Rerè.

¹³ N’aṽyeṉi Yesu awonge mpèmba, ava waô yô, ni ntyuè kè mbela mô.

¹⁴ Yiṉo ne nyongo yi ntyarô y’arum̃inyi Yesu ôkuṽi wè gôr’iṉèngi yè, ayè tôngwa pa avila gw’ijuwa.

¹⁵ Waô nya pa, Yesu awulinyi Simôn inè: Simôn, y’ômwaṉa wi Yôna, ô tonda myè vyagaṉô na mongi siṉo? Awiṉizyè yè inè: Èñ, Rera, w’avôrô inè, mi tondo. Yesu awulinyi yè inè: Nyez’aw’adombè mam̃.

¹⁶ N’arô bulinyè yè nyongo yi mbaṉi inè: Simôn, y’ômwaṉa wi Yôna, ô tonda myè? Awiṉizyô yè ne Pyère inè: Èñ, Rera, w’avôrô inè, mi tondo. Yesu awulinyi yè inè: Nyez’adombè mam̃.

¹⁷ N’awulinyè yè nyongo yi ntyarô inè: Simôn, y’ômwaṉa wi Yôna, ô tonda myè? Pyère ayeṉ’ekèṽa konde Yesu awulinyi yè nyongo yi ntyarô inè, ô tonda myè? N’awiṉizyè yè inè: Rera, w’avôrô isam̃u yôdu, w’avôrô inè, mi tondo. Yesu awulinyi yè inè: Nyez’adombè mam̃.

¹⁸ Giligili mi bulinyo inè, gw’avegagi wè erumbe, w’alirag’ôtumbi wo, agangaṉe mbôry’edu y’arondyô wè; ndô gô be dômbiṉo, ô be nyonyuṉ’ago mo, ko ôm̃ori diryo ôtumba, arwaṉo gô mbôra yi re wè pa bele kènda.

¹⁹ Awulyi yeṉo gô tev’ôṉongo w’ijuwa wi be pendize Pyère Anyambyè. Ayè kamba pa yeṉo, awulinyè yè inè: Zônga myè.

²⁰ Pyère agegwi, ayeṉ’ôṉèngi mèwoṉo w’arondyô ne Yesu e sônga waô, ayè y’ayèzi gô ntôṉô yi Yesu gw’avegagi waô gô tavulu, awulya inè: Rera, mande be kôtizo?

²¹ Yeṉo gw’ayenyô yè ne Pyère, awulinyi yè Yesu inè: Ndô wiṉo, Rera, e be twa sèṉi gôre yè?

²² Awulinyô yè ne Yesu inè: Ja my’abela nè, e ga lwaṉe kwanga gw’ibyi sam̃, ande gôre wè? Zônga wè myè.

²³ Yeṉo agènd’igamba gôr’awarerè inè, ôṉèngi mèwoṉo e ze juwe. Ndô Yesu e pa bulinye Pyère inè, e ze juwe, ndô inè: Ja my’abela nè, e ga lwaṉe kwanga gw’ibyi sam̃, ande gôre wè?

²⁴ Wiṉo n’ôṉèngi mèwoṉo wi takilya g’ômwanja w’isam̃u yiṉo, na wi re yô tènda pa kè. N’azw’avôrô inè, agambi mè mi re rèti.

²⁵ Yesu arô dend’isam̃u imyèṉè imyenge; yi re ôma tô tènda yô yôdudu, mi pa tanga nè, ntye yô ko jolye keka ni yangô y’arô tèndyô.