Yôan 16 - Bibili 1927 (Omyene)

¹ My’are bulinya pa ṉwè isam̃u yiṉo, ko y’alwaṉa gôre ṉwè ibaku.

² Wi be tômba ṉwè avila gw’inagô si soṉo; rèti igwèra nyi bya nyi be pikily’ôm’edu e jôṉa ṉwè inè, e janjiṉ’Anyambyè.

³ Wi be dendiṉa ṉwè isam̃u yiṉo konde wi zele mya pe Rerè ge myè.

⁴ My’are bulinya pa ṉwè isam̃u yiṉo, inè, gô be by’igwèra mènyoṉo, ko ṉwè jônginya inè, my’awulinyi ṉwè yô. Mi pa kamba na ṉwè isam̃u yiṉo avila gw’ipakilya, konde my’avegagi na ṉwè.

⁵ Ndô vèṉo mi kènda gôre yè y’arôm̃i myè, ndô e zel’ôma gôre ṉwè e bambya myè inè: Ô kènda gweṉi?

⁶ Ndô gô re nè my’are bulinya pa ṉwè isam̃u yiṉo, ekèṽa z’ajôny’irèm̃i yaṉi.

⁷ Vanga yeṉo, mi bulinya ṉwè ôrèti inè, are mbya gôre ṉwè inè, mi ga gènde, konde ja my’agènda, gambèṉè ôzindyô aṽye gôre ṉwè; ndô ja my’akènda, gambèṉè mi be tôm̃a wô gôre ṉwè.

⁸ Na gô be bya wô, wi be surye ntye g’ômwanja w’ibe, na g’ômwanja w’ôgôre, na g’ômwanja w’ijèkèlya:

⁹ g’ômwanja w’ibe, konde wi pa bekelya myè;

¹⁰ g’ômwanja w’ôgôre, konde mi kènda gôre Rerè, ko ṉwè ayeṉa myè nyèṉè;

¹¹ na g’ômwanja w’ijèkèlya, konde ôvangiṉi wi ntye yiṉo e jèkèlyô.

¹² Mi p’are n’isam̃u imyenge gô bulinya ṉwè, ndô aṉw’ayolye sindiṉe yô vèṉo.

¹³ Ndô gô be diwô ôzindyô abyeṉi, wô n’Iṉiṉa ny’ôrèti, gambèṉè nyi be kèndya ṉwè g’ôrèti wôdu; konde nyi ze kambe nyômè, ndô nyi be bulya isam̃u yôdu yi be jogo nyô, amyeza ṉwè kè isam̃u yi re gô bya.

¹⁴ Nyi be pendiza myè, konde nyi be bong’isam̃u yam̃, amyeza ṉwè yô.

¹⁵ Isam̃u yôdu yi re na Rerè, yô iyam̃; yeṉo abulya myè inè, nyi bong’isam̃u yam̃, amyeza ṉwè yô.

¹⁶ Kwè, gambèṉè aṉw’arô jeṉe myè nyèṉè; kwè, gambèṉè kè aṉwè be tô jeṉa myè, konde mi kènda gôre Rerè.

¹⁷ Yeṉo awèwo gôr’iṉèngi yè w’awulyaṉi nè: Igamba nyiṉo nyi pivya sèṉi ny’abulinyè zwè inè: Kwè, gambèṉè aṉw’arô jeṉe myè nyèṉè; na inè, kwè, gambèṉè kè aṉwè be tô jeṉa myè; na inè, konde mi kènda gôre Rerè?

¹⁸ Yeṉo awulyi waô inè: Igamba nyiṉo nyi pivya sèṉi nyi bulyô yè inè: Kwè? Azwè pa mya nte kambè.

¹⁹ Yesu amyeṉi nè, wi bela gô bambyè, n’awulinyi yè waô inè: Aṉwè bambyaṉa g’ômwanja w’igamba mè ny’abulyô myè inè: Kwè, gambèṉè aṉw’arô jeṉe myè nyèṉè, na inè, kwè, gambèṉè kè aṉwè be tô jeṉa myè.

²⁰ Giligili, mi bulinya ṉwè inè, aṉwè be deṉ’edingô ko ṉwè sèla, ko ntye yi be jeṉ’igeṽa; aṉwè be dwaṉa n’ekèṽa, ndô ekèṽi zaṉi zi be kalw’igeṽa.

²¹ Gô duk’ômwantô gô jaṉa, e dwaṉa n’ekèṽa, konde igwèri nyè ny’asiṽi; ndô j’ômwaṉa ajaṉô, e pa tô jônginy’izongo nyèṉè g’ômwanja w’igeṽa nyi jeṉô yè inè, ôma ajanyô gô ntye.

²² Aṉwè kè, aṉw’are n’ekèṽa vèṉo; ndô mi be tô jeṉa ṉwè, ko irèm̃i yaṉi jeṉ’igeṽa, n’igeṽi nyaṉi e zel’ôma wi be bongiṉa ṉwè nyô.

²³ Gô ntyugu mèyoṉo aṉwè ze bambye myè ezom̃a. Giligili mi bulinya ṉwè inè, ezom̃’edu zi be bambyô ṉwè gôre Rerè gw’ini nyam̃, e be pa ṉwè zô.

²⁴ Kwanga gw’egômbe ziṉo aṉwè pa bamby’ezom̃a gw’ini nyam̃. Ṽambyaṉi, gambèṉè aṉwè be pô, ko igeṽi nyaṉi jônya.

²⁵ My’are ṉwè bulinya p’isam̃u yiṉo n’inkôgô. Ndô igwèra nyi bya nyi re my’arô kambe na ṉwè nyèṉè n’inkôgô, ndô mi be bulinya ṉwè zange g’ômwanja wa Rerè.

²⁶ Gô ntyugu mèyoṉo, aṉwè be bambya gw’ini nyam̃, ndô mi pa bulinya ṉwè inè, mi be kambiṉe Rerè g’ômwanji waṉi,

²⁷ konde Rerè ayèmè e tonda ṉwè, konde aṉw’are tonda pa myè, aṽekelya inè, my’avili gôr’Anyambyè.

²⁸ My’aṽyeṉi avila gôre Rerè, aṽya gô ntye yiṉo; ndô vèṉo mi tô tige ntye, agènda gôre Rerè.

²⁹ Awulinyô yè n’iṉèngi yè inè: Vôna, vèṉo ô kamba zange, ô pa kôṽa du nkôgô.

³⁰ Ndô vèṉo azw’avôrô inè, w’avôrô isam̃u yôdu, na inè, ô zele n’isolo inè, ôm’edu e ga ṽambye wè; gw’igamba nyiṉo azwè bekelya inè, w’avili gôr’Anyambyè.

³¹ Awiṉizyô waô ne Yesu inè: Vèṉo aṉwè bekelya?

³² Vônaṉi, igwèra nyi bya, rèti ny’abyeṉi kè, nyi be pazangaṉô ṉwè ôm’edu gô nkôṽi yèmè, ko ṉwè tiga myè anka; ndô my’azele anka, konde Rerè are na myè.

³³ My’are ṉwè bulinya p’isam̃u yiṉo, ko ṉwè dwaṉa n’am̃ènjè gôre myè. Aṉwè be jeṉe njuke gô ntye yiṉo; ndô zindyaṉ’irèm̃i yaṉi, my’are keṽa pe ntye yiṉo.