Yôan 15 - Bibili 1927 (Omyene)

¹ Myè n’ôgoli wa rèti, ni Reri yam̃ n’ôma wi penjavenja wô.

² Ivary’edu nyi re gôre myè nyi re nyi pa jaṉ’ilônda, e tômba nyô; n’ivary’edu nyi jaṉ’ilônda, e sènga nyô, ko nyô tô jaṉ’ilônda vyagaṉô.

³ Vèṉo aṉw’are pupupu, g’ômwanja w’igamba nyi re myè kambiṉa pa ṉwè.

⁴ Lwaṉaṉi gôre myè, gambèṉè mi be dwaṉa kè gôre ṉwè. Ga nt’ar’ivari ny’ayolye jaṉ’ilônda nyômè, kaô ny’adwaṉa bata g’ôgoli, yeṉo kè aṉw’ayolye jaṉ’ilônda, kaô aṉw’adwaṉa gôre myè.

⁵ Myè n’ôgoli, aṉwè n’ampari. Ayè yi dwaṉa gôre myè, na myè gôre yè, ayè jaṉ’ilônd’imyenge, konde aranga myè aṉw’ayolye dende mpongo.

⁶ Jog’ôma alwaṉa gôre myè, gambèṉè afalô, egolaṉi g’ivari, ayôm̃a; ko aṉaga kum̃inya mô, avunga mô g’ôgôṉi, ko mô pya.

⁷ J’aṉw’adwaṉa gôre myè, ko agambi mam̃ dwaṉa gôre ṉwè, ṽambyaṉi ôsam̃u edu wi belô ṉwè, gambèṉè wi be pô gôre ṉwè.

⁸ J’aṉw’ajaṉ’ilônd’imyenge, gambèṉè Reri yam̃ e be pendizyô gô ndaga yiṉo, na yeṉo be dwaṉa ṉwè iṉèngi yam̃.

⁹ Ga nt’are myè tondô pa ne Reri yam̃, yeṉo re myè tonda pa ṉwè. Lwaṉaṉi gw’itondi sam̃.

¹⁰ J’aṉw’apenjavenj’isômbyi sam̃, gambèṉè aṉwè be dwaṉa gw’itondi sam̃, ga nt’are myè penjavenja p’isômbya sa Reri yam̃, alwaṉa gw’itondi sè.

¹¹ My’are ṉwè bulinya p’isam̃u yiṉo inè, igeṽi nyam̃ nyi ga lwaṉe gôre ṉwè, na inè igeṽi nyaṉi nyi ga yônye.

¹² Wiṉo n’ôzômbyô wam̃ inè: Rondaṉaṉi, ga nt’are myè tonda pa ṉwè.

¹³ E zel’itonda sipôlô vyagaṉô na siṉo inè, gôr’ôma gô p’em̃èṉo zè g’ômwanja w’indegô sè.

¹⁴ Aṉwè n’indegô sam̃, j’aṉw’adend’isam̃u yi sômbya myè ṉwè.

¹⁵ Mi pa fweya ṉwè nyèṉè inè, inyôngô, konde nyôngô amye nte dende reri yè; ndô my’are fweya pa ṉwè inè, indegô, konde my’are myeza pa ṉwè isam̃u yôdu y’ayogyô myè avila gôre Reri yam̃.

¹⁶ Arang’aṉwè avinji myè; ndô my’avinji ṉwè, alôṽya ṉwè, ko ṉwè kènda, ayaṉ’ilônda, ko ilôndi yaṉi dwaṉa, gô ntiṉa nè, ôsam̃u edu wi be bambyô ṉwè gôre Rerè gw’ini nyam̃, e be pa ṉwè wô.

¹⁷ Mi sômbya ṉwè isam̃u yiṉo inè, rondaṉaṉi.

¹⁸ Je ntye y’abika ṉwè, myaṉi nè, y’aṽiki myè yô ṽikaga ro ṉwè.

¹⁹ Arwe nè, aṉw’aṉaga wi ntye yiṉo, gavoṉo ntye y’atô tond’aṉagi wèmè; ndô gô re nè, aṉwè arang’aṉaga wi ntye yiṉo, na inè, my’avinji ṉwè avila gô ntye yiṉo, yeṉo ntye yi bika ṉwè.

²⁰ Yônginyaṉ’igamba ny’awulinyi myè ṉwè inè: Nyôngô yi zel’ômpôlô vyagaṉô na reri yè. Ja w’agombizi myè, gambèṉè wi be kombiza ṉwè kè; ja w’avenjavenj’igambi nyam̃, gambèṉè wi be penjavenj’inyaṉi kè.

²¹ Ndô wi be dendiṉa ṉwè isam̃u yiṉo yôdu g’ômwanja w’ini nyam̃, konde w’amye ôma w’arôm̃i myè.

²² Arwe nè mi pa bya agamba na waô, gavoṉo wi pa tô dwaṉa n’ibe; ndô vèṉo wi zele ni ntyongwè g’ômwanja w’ibe saô.

²³ Ayè yi bika myè, e bika kè Reri yam̃.

²⁴ Arwe nè mi pa denda gôre waô ṽilô yi re yi pa dendô n’ôm’ômwèṉè, gavoṉo wi pa tô dwaṉa n’ibe; ndô vèṉo wi re jeṉa pa yô, ko waô bika myè ni Reri yam̃ ta.

²⁵ Ndô yi re twa pa yeṉo, ko igamba nyi re tèndô pa gw’ivangi nyaô twa rèti inè: W’aṽiki myè ntiṉa fo.

²⁶ Gô be diwô ôzindyô abyeṉi, wi be tôm̃ô myè gôre ṉwè avila gôre Rerè, wô n’Iṉiṉa ny’ôrèti nyi pila gôre Rerè, nyô be takilya g’ômwanji wam̃;

²⁷ n’aṉwè kè, aṉwè be takilya, konde aṉw’are dwaṉa pa na myè avila gw’ipakilya.