Yôan 12 - Bibili 1927 (Omyene)

¹ Ntyugu ôrôṽa Paki gekaga ro, Yesu aṽyeṉi gô Betani, gô mbôra y’avegagi Lazare, y’arôngunyô yè avila gw’ijuwa.

² N’avangiṉi waô yè inya si nkôlô vovo; Marta ayè avengiṉagi tavulu, ndô Lazare avegag’om̃ori gôre waô w’alwaṉi baru na yè gw’inya.

³ N’awongi Marya igwèr’im̃ori ny’agali mi nkangô mi nardi mi njôni mpôlô, azagya mô gw’intyôzô si Yesu, aziza sô n’itwe sè, n’ayônyi nagô ni nkangô y’agali.

⁴ Ôm̃ori w’iṉèngi yè, Yudas Iskaryot, y’ômwaṉa wi Simôn, avegagi kè gô kôtizè, awulyi nè:

⁵ Ntiṉa nde yi r’agali miṉo mi nkangô mi re kôlô ni nkam̃a s’ifura ntyarô, ko sô pô gôr’ikuge?

⁶ Awulyi yeṉo, aranga inè, avegagi n’ikuge isolo, ndô konde avegagi ôfwe, awongaga kè yom̃a y’awelôgô gô puka y’idolè, konde ayè arwaṉagi yô.

⁷ Ndô Yesu awulyi nè: Rigaṉi yè dyè. Are penjavanja p’agali miṉo gô ntyugu y’ibèṉô sam̃.

⁸ Ikuge yi re na ṉwè egômbe zôdu, ndô my’azele na ṉwè egômbe zôdu.

⁹ Aṉag’awenge gôr’Iju w’amyeṉi nè, Yesu are gô Betani; aṽyeṉi waô gôgô, aranga g’ômwanji wè dadyè, ndô gô jeṉe Lazare kè, y’arôngunyô yè avila gw’ijuwa.

¹⁰ Ndô imiṉisè impôlô s’awôndi môndo gô jôṉe Lazare kè,

¹¹ konde awenge gôr’Iju w’alubwi avila gôre waô g’ômwanja wi Yesu, aṽekelyè.

¹² Bunya, aṉag’awenge w’aṽyeṉi gô fèti, gw’ayogyô waô e bulyô inè, Yesu e bya gô Yerusalèm,

¹³ w’awong’ikôgô y’ambila, agènda gô dataṉa na yè, mbôgiṉaga inè: Ôzana! Ôzaviṉô gôre yè yi bya gw’ina nya Rerè, ayè ôga w’Israèl!

¹⁴ N’alèngi Yesu mwô’buru, avandi yè gô wô, alwaṉa baru gô wô, ga nt’are tèndô pa inè:

¹⁵ Arya, awè ’mwamwantô wi Siyôn; vôna, ôgi wo e bya, dwaṉa pa baru g’ômwaṉa wi buru.

¹⁶ Iṉèngi yè yi pa kôtiz’isam̃u yiṉo gw’alônga; ndô gw’avendizyô Yesu, vovo ayônginyi waô inè, isam̃u yiṉo y’arèndyô g’ômwanji wè, na inè, w’alendiṉi yè isam̃u yiṉo.

¹⁷ N’aṉaga waôdu w’avegagi ni Yesu, gw’aweyi yè Lazare avila g’ôrôngiṉô arôngunyè avila gw’ijuwa, w’arakily’igamba g’ômwanji wè:

¹⁸ gô ntiṉa yiṉo aṽyeṉ’aṉaga gô dataṉa na yè, konde w’ayogyô inè, aliwô adendi elemba ziṉo.

¹⁹ Yeṉo awulyaṉ’ifarisi inè: Vônaṉi nt’are ṉwè, ṉwè pa dende mpongo; vônaṉi aṉaga waôdu w’asôngi yè.

²⁰ Avegagi Grèk sinyèwo, gôre mongi w’avandi gô saviṉa gw’egômbe zi fèti,

²¹ aṽyeṉi waô gôre Filipi, y’avili gô Betsayda yi Galile, awulinyè inè: Rera, azwe bele jeṉe Yesu.

²² Agèndi Filipi awuliny’Andru, n’aṽyeṉi Andru ni Filipi awulinye Yesu.

²³ Awiṉizyô waô ne Yesu inè: Igwèra ny’abyeṉi nyi re nè, Ômwaṉa w’ôma e ga vendizyô.

²⁴ Giligili mi bulinya ṉwè inè, intyo nyi bile nyi re pôswa pa gô ntye ja ny’ayuwa, gambèṉè nyi dwaṉa nyô dadyè; ndô ja ny’ajuwa, gambèṉè nyi jaṉ’antyo am̃enge.

²⁵ Ayè yi tond’em̃èṉo zè e be periza zô, n’ayè yi bik’em̃èṉo zè gô ntye yiṉo e be penjavenja zô kwanga gw’em̃èṉo za koṉako.

²⁶ Jog’ôm’edu ajanjiṉa myè, e ga zônge myè; ni mbôra yi re myè, gôgô be dwaṉa kè nyôngô yam̃. Jog’ôm’edu ajanjiṉa myè, e be dubô ne Reri yam̃.

²⁷ Ndô vèṉo iṉiṉi nyam̃ nyi jeṉe njuke. Na mi ga wulye sèṉi? ... Rera, zungiṉa myè avila gw’igwèra nyiṉo? ... Ndô gô ntiṉa yiṉo aṽyeṉi myè kwanga gw’igwèra nyiṉo.

²⁸ Rera, vendiz’ini nyo! Vovo aṽyeṉ’inyôy avila g’ôrôṽa inè: My’are pendiza pa nyô, mi be tô pendiza nyô kè.

²⁹ Aṉaga w’avegagi vovo, ayogo nyô, w’awulyi nè, akambe njalitôṽa. Ndô am̃ori w’awulyi nè: Akambe yenjèl na yè.

³⁰ Yesu awulinyi waô inè: Inyôy nyiṉo nyi pa bya gô ntiṉi yam̃, ndô gô ntiṉi yaṉi.

³¹ Vèṉo r’ijèkèlya si ntye yiṉo; vèṉo ôvangiṉi wi ntye yiṉo e be tômbô.

³² Na myè, ja my’ atômbiṉô avila gô ntye, gambèṉè mi be dur’aṉaga waôdu gôre myè.

³³ Agambi yeṉo gô teve njuwiṉi yi be juwô yè.

³⁴ Awiṉizyô yè n’aṉaga inè: Azw’are jogo pa gw’ivanga inè, Krist e dwaṉa gô koṉako; ndô ô bulya inè: Ômwaṉa w’ôma e ga ṽanyô sèṉi? Ômwaṉa w’ôma wiṉo mande?

³⁵ Awulinyô waô ne Yesu inè: Ôzange wi p’are gôre ṉwè vo mw’ôlingô. Gangaṉaṉi, gô p’are ṉwè n’ôzange, ko mpiri y’agôta ṉwè: ayè yi kangaṉa gô mpiri e pa mye nkôṽa yi kèndô yè.

³⁶ Ôlingô wi p’are ṉwè n’ôzange, ṽekelyaṉi ôzange, ko ṉwè dwaṉ’awaṉa w’ôzange. Yesu bulya p’agamba miṉo, agèndi yè, azombuṉa waô.

³⁷ Vangaṉe aliwô adendi lemba yenge yeṉo gw’azô maô, wi pa bekelye yè,

³⁸ ko igamba ny’agambyô ne Yezaya y’ôvogisi twa rèti inè: Rera, mande are bekelya p’ikambiṉi sazô? N’ôgo wa Rerè wi re tum̃inyô pa gôre mande?

³⁹ Gô ntiṉa yiṉo kè wi pa jolye bekelya, konde Yezaya arô bulyi nè:

⁴⁰ Are nunja p’antyo maô, are joliza p’irèm̃i yaô, waô vende jeṉa n’antyo maô, agôtiza n’irèm̃i yaô, agalwa, ko mi jinga waô.

⁴¹ Yezaya awulyi agamba miṉo, konde ayeṉ’ivendi nyè, n’agambi yè g’ômwanji wè.

⁴² Ndô vangaṉe yeṉo, awenge gôr’ivangiṉi w’aṽekelyi yè; ndô g’ômwanja w’ifarisi wi pa mème yè, waô vende tômbô avila gô nagô yi soṉo.

⁴³ Konde w’arond’isum̃inya s’aṉaga vyagaṉô n’isum̃inya s’Anyambyè.

⁴⁴ Arôngi Yesu inè: Ayè yi bekelya myè, e pa bekelya myè, ndô gôre yè y’arôm̃i myè;

⁴⁵ n’ayè yi jeṉa myè, e jeṉ’ayè y’arôm̃i myè.

⁴⁶ My’are bya p’ôzange gô ntye, inè, ôm’edu e bekelya myè alwaṉe gô mpiri.

⁴⁷ Jog’ôma ajogw’agambi mam̃, ko avenjavenja mô, my’ayèkèlye yè, konde mi pa bya gô jèkèlye ntye yiṉo, ndô gô sungiṉe ntye.

⁴⁸ Ayè yi bika myè ko awong’agambi mam̃ are n’ôma wi jèkèlyè; igamba nyi re myè kamba pa, nyômè nyi be jèkèlyè gô ntyugu yi num̃uṉa.

⁴⁹ Konde mi pa kamba myèmè; ndô Rerè y’arôm̃i myè, ayèmè are pa pa myè ôzômbyô nt’are myè gô bulya, ni nt’are myè gô kamba.

⁵⁰ My’avôrô kè inè, ôzômbyô mè n’em̃èṉo za koṉako. Yeṉo isam̃u yi bulyô myè, mi bulya yô ga nt’are Rerè bulinya pa myè.