Yôan 10 - Bibili 1927 (Omyene)

¹ Giligili mi bulinya ṉwè inè, ayè yi re e pa jingiṉa gô nagô y’adombè n’ômpômbala, ndô e panda ni nkôṽa nyèṉè, ayè n’ôfwe n’ôgwèrisi.

² Ndô ayè yi jingiṉa n’ômpômbala ayè n’ôvenjavenji w’adombè.

³ Ôvenjavenji w’iguge e nunguṉa nyô gôre yè, n’adombè mi jogw’inyôy nyè; e fwey’adombè mèmè n’ana, agèndya mô gw’igala.

⁴ Ayè kogunya p’adombè mèmè môdu, gambèṉè e kènda gô bôsô ya mô, n’adombè mi sôngè, konde m’avôrô inyôy nyè.

⁵ M’azông’ôgènda; ndô mi fanga bô avila gôre yè, konde m’amye anyôy m’agènda.

⁶ Yesu avungiṉi waô nkôgô yiṉo, ndô wi re kôtize nt’avegag’isam̃u y’agambi yè na waô.

⁷ Yeṉo arô bulinyô waô ne Yesu inè: Giligili mi bulinya ṉwè inè, myè n’ômpômbala w’adombè.

⁸ Waôdu w’alônge byeṉi myè ṽyagaga ro waô n’ifwe n’igwèrisi; ndô adombè mi pa pôganyô waô.

⁹ Myè n’ômpômbala. Jog’ôma ajingiṉa na myè, gambèṉè e be sungiṉô; e be jingiṉaga agogwaga, alènga kè inya.

¹⁰ Ôfwe e bya kaô gô jufa, na gô jôṉa, na gô jiliza; my’aṽyeṉi nè, adombè mi ga lwaṉe n’em̃èṉo, ko mô bunyô ambya.

¹¹ Myè n’ôvenjavenj’ômbya w’adombè. Ôvenjavenj’ômbya w’adombè e p’em̃èṉo zè g’ômwanja w’adombè.

¹² Ndô ayè yi janjiṉ’ipa, ndô ayè arang’ôvenjavenji w’adombè, e r’adombè arang’imè, e jeṉ’evengambwa zi bya, ko yè tig’adombè, awanga, n’evengambwa zi kôta mô, avangaṉa mô.

¹³ Ayè yi janjiṉ’ipa e fanga, konde ayè ôma wi janje njanjaga, ko yè aṉak’adombè.

¹⁴ Myè n’ôvenjavenj’ômbya w’adombè. My’avôrô adombè mam̃, n’adombè mam̃ mi mya myè,

¹⁵ ga nte myô myè ne Rerè ni nte mya myè kè Rerè; na mi p’em̃èṉo zam̃ g’ômwanja w’adombè.

¹⁶ Mi p’are kè n’adombè am̃èṉè, mi re mi zele gô nago yiṉo y’adombè; miṉo kè mi ga ṽagô, ko mô jogw’inyôy nyam̃, ko mô dwaṉ’ôlemb’ôm̃ori n’ôvenjavenji kè ôm̃ori.

¹⁷ Yeṉo e tondô myè ne Reri yam̃, konde mi p’em̃èṉo zam̃, ko mi tô bonga zô.

¹⁸ E zel’ôma wi bongiṉa myè zô, ndô mi pa zô myèmè; my’are ni ngulu gô pa zô, my’are ni ngulu kè gô tô bonga zô; ôzômbyô wiṉo my’awongi wô avila gôre Reri yam̃.

¹⁹ N’arô tweṉi mpaga nyèṉè gôr’Iju g’ômwanja w’agamba miṉo.

²⁰ Awenge gôre waô w’awulyi nè: Are n’iṉiṉ’iṽe, ar’eranya; ntiṉa nde yi pôganyô ṉwè yè?

²¹ Am̃ori w’awulyi nè: Miṉo arang’agamba m’ôma wi re n’iṉiṉ’iṽe; iṉiṉ’iṽe nyô ko jolye nunguṉ’antyo m’apoku?

²² N’arweṉi fèti y’imèpya si nagô y’Anyambyè gô Yerusalèm. Z’avegag’egômbe z’ifwe.

²³ N’agombigi Yesu gô nagô y’Anyambyè, gw’evungu zi Salômôn.

²⁴ Yeṉo aṽyeṉ’Iju gôre yè vingôvingô, awulinyè inè: Ôlingô sèṉi wi be dôṽizo zwè mpaga? J’awè ne Krist, wulinya zwè buku.

²⁵ Awiṉizyô waô ne Yesu inè: My’awulinyi ṉwè, ndô aṉwè pa bekelya. Ṽilô yi dendô myè gw’ina nya Reri yam̃, yô takilya g’ômwanji wam̃.

²⁶ Ndô aṉwè pa bekelya, konde aṉwè arang’adombè mam̃.

²⁷ Adombè mam̃ mi jogw’inyôy nyam̃; my’avôrô mô, mô kè mi sônga myè.

²⁸ Mi pa mô em̃èṉo za koṉako; mô kè m’avere du, e zel’ôma wi be paruṉa myè mô avila g’ôgo wam̃.

²⁹ Reri yam̃ yi re pa pa myè mô, ar’ômpôlô vyagaṉô na waôdu; e zel’ôma are ko jolye paruṉa mô avila g’ôgo wa Reri yam̃.

³⁰ Myè ni Rerè azwè n’ezom̃’em̃ô.

³¹ Vovo arô bong’Iju adô gô pungè mô.

³² N’awulinyô waô ne Yesu inè: My’are tum̃inya pa ṉwè ṽilô ṽya yenge avila gôre Reri yam̃: gô ṽilô mèyoṉo aṉwè punga myè adô gô zeṉi?

³³ Awiṉizyô yè n’Iju inè: Azwè pa pungo adô g’ômwanja w’eṽilô eṽya, ndô g’ômwanja w’ipèdy’ Anyambyè, konde awè ôma, ô pang’ôkuṽi wo g’Anyambyè.

³⁴ Awiṉizyô waô ne Yesu inè: E zele tèndô pa gw’ivangi nyaṉi inè: my’awulyi nè aṉwè inyambyè?

³⁵ J’aweyi waô w’agambinyô igamba ny’Anyambyè inè, inyambyè, na j’Irèndo y’ayolye jôṉô,

³⁶ ayè yi re mèpizô pa ne Rerè, arôm̃ô gô ntye yiṉo, aṉwè tô bulinyè inè: Ô pèdy’Anyambyè! Konde my’awulyi nè: Myè Ômwaṉa w’Anyambyè.

³⁷ Ja my’ayanje ṽilô ya Reri yam̃, gambèṉè aṽekelyaṉi myè.

³⁸ Ndô ja my’ajanja yô, vangaṉe aṉw’aṽekelya myè, ṽekelyaṉi ṽilô mèyoṉo, ko ṉwè mya agôtiza inè, Rerè are gôre myè na myè kè gôre Rerè.

³⁹ Arô buti waô gô kôtè, ndô averi avila gw’ago maô.

⁴⁰ N’arô kèndi Yesu gô ntye mori yi Yoridan, gô mbôra y’alônge batizagi Yôan. N’alwaṉi yè vovo.

⁴¹ N’aṽyeṉi aṉag’awenge gôre yè, n’awulyi waô inè: Rèti, Yôan e pa dend’elemba; ndô isam̃u yôdu y’awulyô ne Yôan g’ômwanja w’ôma wiṉo y’avegagi rèti.

⁴² N’awenge w’aṽekelyi yè gô mbôra mèyoṉo.