Tite 3 - Bibili 1927 (Omyene)

¹ Yônginya waô gô tugiz’ikuṽi yaô gôr’ampenda, na gôr’anyanga, gô dwaṉa n’ijogiṉô, na gô dwaṉa keka pa gw’eṽilô edu eṽya;

² w’aṽèriny’ôma, ndô wi ga lwaṉe n’am̃ènjè, n’ôzim̃a, n’ôkendekende gôr’aṉaga waôdu.

³ Konde azwè kè, azw’avegagi gw’alônga imya fo, ijogiṉô fo, temizô pa, njanjag’aṉongo m’itongiṉa n’ambya mi ntye, ndwaṉaga gw’eguṉu na gô ñandi, bikô pa, ni mbikaṉaga kè.

⁴ Ndô gw’arum̃inyô nkèngo y’Anyambyè y Ôzungè wazô, n’itondi sè gôr’aṉaga,

⁵ azungiṉi zwè, aranga g’ômwanja w’ijanja s’ôgôre si re zwè ko janja, ndô ga nt’are nkèngo yè, vo ijôvuṉa s’ijaṉô ijoṉa n’ipangô ijoṉa s’Iṉiṉ’Iṽya,

⁶ ny’ayiryô yè inyengenyengye gôre zwè vo Yesu‐Krist y Ôzungè wazô,

⁷ inè, azwè dwaṉizô p’agôre v’imèpiṉô sè, azwè ga lwaṉe n’igum̃u iṉivisi y’em̃èṉo za koṉako.

⁸ Igamba nyiṉo nyi re rèti, na mi bela nè, yoliz’isam̃u yiṉo, ko waô wi re bekelya p’Anyambyè p’ikuṽi yaô gô janje ṽilô ṽya. Isam̃u yiṉo yi r’imbya n’isolo gôr’aṉaga.

⁹ Ndô rèndya g’ômwanja w’impaga s’edosu na g’ômwanja w’iyaṉaṉô, na g’ômwanja w’anyôm̃aṉô n’impaga g’ômwanja w’ivanga; konde isam̃u yiṉo yi r’isolo fo n’agamba m’enyale.

¹⁰ Ayè yi sông’inènj’ijèṉè, ayè tevuṉô pe nyongo nônga na yi mbaṉi, ṽangwaṉa avila gôre yè,

¹¹ myagaga nè, ôma ôṉongo mèwoṉo are fweva pa, e fwem̃a, nkeṽizag’ôkuṽi wèmè.

¹² Gô be tôm̃a myè Artemas ge Tukikos gôre wè, yôgô ngwambè gôre myè gô Nikôpôlis; konde my’akenji gô dwaṉa gôgô egômbe z’ifwe.

¹³ Ṉunguṉe Zenas, ôṉènji w’ivanga, n’Apôlos g’ôgèndo waô mbyambye, ko w’aziliṉô ezom̃a.

¹⁴ Mongi yazô wi ga ṉènge kè gô janje ṽilô ṽya gô yom̃a yi r’isolo, ko w’alwaṉa wi pa jaṉ’ilônda.

¹⁵ Waôdu wi re na myè wi sanguṉo, Zanguṉa waô wi tonda zwè gw’ibekelya. Imèpiṉô si ga lwaṉe na ṉwèdu.