Tite 2 - Bibili 1927 (Omyene)

¹ Ndô awè, wuly’isam̃u yi kekaṉa n’inènj’ibya.

² Wulya nè, aṉèro wi ga lwaṉe zima, gôre, n’ôkeli, ngèngèngè gw’ibekelya, na gw’itonda, na gw’isindiṉa.

³ Wulya nè, antô aṉèro wi ga lwaṉe ni mpangiṉi yi kekaṉa n’isam̃u yi nkèrè, arang’iṽèrinyi ge inyôngi s’ivè; ndô wi ga lwaṉ’iṉènji y’isam̃u imbya,

⁴ ko waô nènj’ilèngwaṉi y’antô gô tond’aṉôm̃e saômè, n’awaṉi waômè,

⁵ ko waô dwaṉa zima, ni nkèrè, mbandam̃iṉag’inagô saômè, ni nkèngo, n’ijogiṉ’aṉôm̃e saômè, ko igamba ny’Anyambyè ny’avèdyô.

⁶ Revuṉa kè awanjo aṉôm̃e gô dwaṉa zima,

⁷ ntum̃inyag’ôkuṽi womè gw’isam̃u yôdu egèṉizô zi ṽilô ṽya, nènjaga mbyambye, n’inyanga, n’igamb’iṽya,

⁸ ntyèmbo fo, k’ôlôvalôvi jeṉe ntyoṉi, ko ay’alèng’igamb’iṽe gô bulya g’ômwanji wazô.

⁹ Revuṉ’inyôngô gô jogiṉô ireri saômè na gô tondya waô g’ôsam̃u edu,

¹⁰ ko w’awiṉiz’igamba ge jufa, ndô wi ga lwaṉ’egômbe zôdu aṉaga wi re ko bekelyô g’ôsam̃u edu, ko inènja s’Anyambyè y’Ôzungè wazô bimbyô g’ôsam̃u edu.

¹¹ Konde imèpiṉô s’Anyambyè si re tum̃inyô pa, si bag’isungiṉô gôr’aṉaga waôdu.

¹² Si nènja zwè gô tig’ijoliṉ’Anyambyè, n’itongiṉa si ntye, alwaṉa n’imya, n’ôgôre, n’ijanjiṉ’Anyambyè gô ntye ya tè yiṉo,

¹³ mbôndag’igum̃u iṽya, n’itum̃inyô s’ivenda ny’Anyambyè mpôlô n’Ôzungè wazô Yesu‐Krist,

¹⁴ aveṉ’ôkuṽi wèmè g’ômwanji wazô, gô danduṉa zwè avila gw’ifwem̃a sôdu, na gô dôṽya gôre yè aṉaga jombunyô pa ne yè ni mpyô gô ṽilô ṽya.

¹⁵ Wuly’isam̃u yiṉo, ko tevuṉa azèmba n’inyanga nyôdu. Ôm’edu avèdyo.