Ruti 1 - Bibili 1927 (Omyene)

¹ Gw’egômbe z’iyèkèli, arweṉi njaṉa gô ntye. N’agènd’ôṉôm̃e wi Betelèm, yi Yuda, ayè n’ômwantô wè n’awaṉi wè aṉôm̃e aṽaṉi gô dwaṉa gô ntye yi Môab.

² Ina ny’ôṉôm̃e mè ne Elimelèk, n’ina ny’ômwantô wè ne Naômi, n’ana m’awaṉi wè aṽaṉi ne Maklon ni Kiljon; w’avegag’awaṉa w’Efrat, yi Betelèm, yi Yuda. N’aṽyeṉi waô gô ntye yi Môab, alwaṉa vovo.

³ N’ayuwi Elimelèk, y’ôṉôm̃e wi Naômi, n’arigaṉi yè n’awaṉi wè aṽaṉi.

⁴ N’ayômbi waô antô avila gw’antô wi Môab, im̃ori ini nyè ne Orpa, n’ina ny’ôm̃ori ne Ruti; n’alwaṉi waô vovo pyèrè n’igôm̃i ny’impum̃a.

⁵ N’ayuwi Maklon ni Kiljon waôdu aṽaṉi, ni Naômi arigyô ne awaṉi wè aṽaṉi n’ôṉôm̃u wè.

⁶ Avila vovo agum̃aṉi yè, ayè n’antô w’awaṉi wè, ko yè dubwa avila gô ntye yi Môab, konde ayogyô gô ntye yi Môab inè, Yeôva abali aṉagi wè, ava waô inya.

⁷ N’agogwi yè avila gô mbôra y’alwaṉôgô yè, ayè n’antô w’awaṉi wè aṽaṉi na yè; n’agèndi yè gô mpoṉo gô fwinya gô ntye yi Yuda.

⁸ Vovo awulinyi Naômi antô w’awaṉi wè aṽaṉi inè: Gèndaṉi, ko fwinyaṉi ôm’edu gô nagô yi ngi yè! Yeôva e ga lendiṉe ṉwè nkèngo, ga nt’are ṉwè dendiṉa pa waô wi re juwa pa na gôre myè.

⁹ Yeôva e ga vange ṉwè gô dènga ôm’edu ijowa gô nagô y’ôṉôm̃e! N’azombyi yè waô. N’arômbiṉi waô anyôy maô, aleṉa;

¹⁰ n’awulinyi waô yè inè: Nyawè, ndô azwè be kènda na wè gôr’aṉagi wo.

¹¹ N’awulyi Naômi inè: Awam̃, winyaṉi! Ntiṉa nde yi be kènda ṉwè na myè? Mi p’are n’awaṉ’aṉôm̃e gw’iwum̃u nyam̃ wi re ko jômba ṉwè?

¹² Winyaṉi, awam̃, ko kèndaṉi! My’arô dèng’ôṉôm̃e, konde my’adômbiṉi. Arwe nè mi ko bulya inè: My’are n’igum̃u, konde ôgwèra wa ṉèṉo wiṉo mi be dwaṉa n’ôṉôm̃e, ko mi jaṉ’awaṉ’aṉôm̃e,

¹³ gavoṉo aṉwè ko pengiṉa waô kaô w’apôm̃a, aṉwè ko bika gô jômba? Nyawè, awam̃! konde mi jeṉe njuke mpôlô g’ômwanji waṉi, konde ôgo wi Yeôva w’anyonywi gô sira myè.

¹⁴ N’arômbiṉi waô anyôy maô, arô deṉa. N’azombyi Orpa ngwè y’ôṉômu wè, ndô Ruti aliṽi gôre yè.

¹⁵ N’awulinyi Naômi Ruti inè: Vôna, mwano afwinyi gôr’aṉagi wè na gôr’inyambyè sè; winya kè ga nt’afwinya mwano.

¹⁶ N’awiṉizi Ruti nè: Aṽangatya myè gô tigo, na gô fwinya bô avila gôre wè! Nkôṽa yi kèndô wè mi be kènda yô, nkôṽa yi be dwaṉô wè mi be dwaṉa gô yô; aṉagi wo wi be dwaṉ’aṉagi wam̃, n’Anyambyè yo yi be dwaṉ’Anyambyè yam̃;

¹⁷ mbôra yi be juwo mi be juwa gô yô, ko mi bèṉô vovo. Yeôva e ga lendiṉe myè yeṉo, na vyagaṉô kè, j’ôsam̃u ômwèṉè wi re ko bangunya myè avila gôre wè kaô ijuwa s’abya gôre myè!

¹⁸ Gw’ayeṉi Naômi inè, Ruti are kenja pa gô kènda na yè, arigi gô kamba na yè.

¹⁹ N’agèndi waô aṽaṉi ta kwanga gw’aziṽi waô gô Betelèm! Na gw’ayingiṉi waô gô Betelèm, nkala yôdu y’azugyô g’ômwanji waô, n’antô w’awulyagi nè: Wiṉo ne Naômi?

²⁰ N’awulinyi yè waô inè: Aweyaṉi myè inè, Naômi, ndô weyaṉi myè inè, Mara, konde Ôngulungulumè are jônya pa myè ni nôṉe.

²¹ My’agogwi buṉô pa, ndô Yeôva e fwiṉiza myè ago areṽô. Ntiṉa nde yi re ṉwè ko fweya myè inè, Naômi, gôre Yeôva dendiṉa pa myè mbe, na inè, Ôngulungulumè are jeṉiza pa myè azingô?

²² Yeṉo awinyi Naômi n’ômwantô w’ômwaṉi wè, Ruti, ya mwô’Môab, awinya avila gô ntye yi Môab. N’aṽyeṉi waô gô Betelèm gw’ipakilya si teṉô ni orze.