Rôm̃i 28 - Bibili 1927 (Omyene)

¹ Gw’awôm̃wi zwè gô ntye, azw’amyeṉi nè nenge yi fweyô nè, Melita.

² Aṉaga wi ntye mè aṉaga w’iga w’arum̃inyi zwè nkèngo mpôlô; n’aṽaki waô ôgôṉi, awonga zwèdu, konde ningô y’aṉogi, n’egômbe mèzoṉo z’avegag’ifwe.

³ Pol, ayè kum̃inya p’ita ny’isakilya, aweli sô g’ôgôṉi, n’ômpeṉe w’agogwi g’ômwanja wi mpyô, aṉôm̃e Pol g’ôgo.

⁴ Gw’ayeṉ’aṉaga mèwoṉo w’iga ayeṉ’ôm̃amba bata g’ôgo wi Pol, w’awulyaṉi nè: Rèti, ôṉôm̃e wiṉo ôyôṉisi, konde ôgôre wi pa jivirè tôla, vangaṉ’asungiṉô avila gô ntyuṽa.

⁵ Ndô Pol anyèny’ôm̃amba gw’inu, ko ayè alènge nkaza.

⁶ Aṉaga mèwoṉo w’avengiṉagi nè, e be dum̃a ge pôswa gô ntye, ayuwa pelè; ndô gw’avengiṉi waô ôling’ôla, ko w’ayeṉe njuke yi bya gôre yè, w’agaluṉ’ipikilyi saô, awulya inè, ayè anyambyè.

⁷ Pyèrè ni mbôra mèyoṉo, avegagi ntye y’aṉivyô n’ôma w’avegagi gw’ewônjô zi nenge, ini nyè ne Publyus; n’awongyè zwè ayanjiṉa zwè ôlund’ômpôlô, ntyugu ntyarô.

⁸ Rerè yi Publyus avegag’egômbe mèzoṉo bi n’ijôrô n’evamba; n’ayingiṉi Pol gôre yè, agambiṉa, araly’ago mè gôre yè, ayingè.

⁹ Ayè denda pa yeṉo, aṽyeṉi mongi mori w’avegagi n’ijogo gô nenge, n’arôlizyô waô.

¹⁰ N’alubi waô zwè pôlô mè, na gw’aluli zwè avila vovo, w’aweli g’ôwatanga yom̃a y’avegagi na zwè n’isolo.

¹¹ Agwèli ararô vya, aluli zwè avila gô nenge n’ôwatanga w’Alekisandrya w’aliwô w’apyagaṉi egômbe z’ifwe gô nenge, w’avegagi n’elingilyô inè, Dyoskuros.

¹² Azimbi zwè gô Kurakusa, alwaṉi zwè vovo ntyugu ntyarô.

¹³ Avila vovo avingwi zwè aṽya gô Regyon; bunya avyeṉ’ômpunga wi Sud, na gô ntyugu yi mbaṉi awôm̃wi zwè gô Pôtyôlos,

¹⁴ alèngi zwè awarerè vovo w’aṽambyi zwè gô dwaṉa na waô ntyugu ôrwageṉô. Na yeṉo aṽyeṉi zwè gô Rôma.

¹⁵ Awarerè w’ayogyô waô g’ômwanji wazô w’aṽyeṉi avila gô Rôma gô dataṉa na zwè kwanga gô mbôra yi r’igôliṉô ny’Apyus, ni nagô ntyarô si simbô n’agènda. Na gw’ayenyô waô ne Pol, aveṉi Anyambyè akeṽa, azindy’ôrèm̃a.

¹⁶ Gw’aṽyeṉi zwè gô Rôma, Pol arigyô gô dwaṉa gô nagô yèmè ni sozè mori y’avenjavenjagi yè.

¹⁷ Ntyugu ntyarô vya, Pol alatizi ayôgô w’Iju; na gw’alataṉi waô awulinyi waô agamba miṉo inè: Awarera, vangaṉe mi pa diwô my’adend’ezom̃a zi re zi zele kwèkwè gôr’aṉaga ge gw’intyale s’ireri sazô, my’agôty’ôkôte gô Yerusalèm aṉozô gw’ago ma Rôma.

¹⁸ Waô kotiza pa myè, w’aṽeli gô dèkiza myè dyè, konde e pa pegage ntiṉa gôre myè yi re myè ko juwa.

¹⁹ Ndô Iju s’aṽiki, yeṉo arigaṉi gôre myè dadyè gô bambyô gô ke jèkèlyô gôre Sezar, aranga nè, my’avegagi ni ndaga yi soziz’iṉongo nyam̃imè.

²⁰ Gô ntiṉa yiṉo afweya myè ṉwè gô jeṉa ṉwè na gô kamba na ṉwè, konde my’are tagô pa n’izungakaṉô nyiṉo g’ômwanja w’igum̃u ny’Israèl.

²¹ Awiṉizi waô yè inè: Azwè pa dèng’ezangô avila gô Yuda g’ômwanji wo; guṉu kè pa by’ôma avila gôr’awarerè are takilya pa ge kambe ndaga mbe g’ômwanji wo.

²² Ndô azwè bele jogo avila gôre wè nte pikilyo, konde g’ômwanja wi nkumba yiṉo, azw’avôrô inè, mbôry’edu yi sirô.

²³ Aretiṉi waô yè ntyugu, n’awenge w’aṽyeṉi gôre yè gô nagô yè. Pol agambiṉi waô g’ômwanja w’iṉongo ny’Anyambyè, ntankilyaga, ni ntevaga waô g’ômwanja wi Yesu, avila gw’ivanga nyi Môsès, n’avila gw’ivogisi kè. Ikambiṉa s’alwaṉi pil’ibanga kwanga nkôlô.

²⁴ Awèwo w’aṽekely’isam̃u y’awulyô yè, n’awèwo wi pa bekelya.

²⁵ Na gw’alubwi waô, ndô wi pa kwezangaṉa, vovo Pol agundi gô kamba na waô kaô agamba miṉo inè: Iṉiṉ’Iṽya nyi re kamba pa mbyambye gôr’ireri sazô vo Yezaya y’ôvogisi mè:

²⁶ Gènda gôr’aṉaga wiṉo, awulya inè: Aṉwè be jogo n’arôy maṉi, ko ṉw’agôtiza; aṉwè be jeṉa n’antyo maṉi, ko ṉw’azilya.

²⁷ Konde irèm̃a y’aṉaga wiṉo y’atweṉi dosu; w’ajoliz’arôy maô gô jogo, w’aṉunji antyo maô, waô vende jeṉa n’antyo maô, ayogo n’arôy maô, agôtiza n’irèm̃i yaô, agalwa, ko mi jinga waô.

²⁸ Sambô myaṉi nè, isungiṉa s’Anyambyè siṉo si re tôm̃ô pa gôr’aṉongo, na waô wi be pôganyô.

²⁹ Gw’awulyi yè agamba miṉo, Iju s’avazangaṉi alôṽage mpaga waô na waô.

³⁰ Pol alwaṉ’impum̃a y’impundu mbaṉi gô nagô y’avenyôgô yè ipa. Awongagi yè waôdu w’aṽyeṉigi gô jeṉè,

³¹ nkambiṉag’iṉongo ny’Anyambyè ni nènjaga g’ômwanja wa Rerè Yesu‐Krist ni nkagandè yôdu; e pa pegaga kè ôma w’alegi yè.