Rôm̃i 25 - Bibili 1927 (Omyene)

¹ Gw’aṽyeṉi Festus gw’ipangiṉi sè, ntyugu ntyarô vya, avandi yè gô Yerusalèm avila gô Sezare.

² Imiṉisè impôlô n’ayôgô w’Iju w’azozizi Pol gôre yè. N’agweni waô yè inkolo,

³ aṽambyè inè, e ga rôm̃e Pol gô Yerusalèm; nkenjaga waômè gô kondè gô mpoṉo, ayôṉè.

⁴ Ndô Festus awiṉizi nè, Pol e penjavenjô gô Sezare, na inè, ayèmè avegagi gô sunge kènda gôgô.

⁵ N’awulyi yè inè, sambô waô wi re n’inyanga gôre ṉwè wi ga zum̃iṉe na myè, na j’adwaṉe ndaga y’ôgara gôr’ôṉôm̃e mèwoṉo, wi ga zozize yè.

⁶ Festus alwaṉi gôre waô kaô ntyugu eṉanay ntyo igôm̃i, avila vovo azum̃iṉi yè gô Sezare. Bunya, alwaṉi yè baru gw’eka z’ijèkèlya, n’azômbyi yè inè, Pol e ga ṽagô.

⁷ Gw’aṽyeṉi yè, Iju s’avili gô Yerusalèm s’agômbiṉi yè vingô, azozizè n’isam̃u imyenge iyoli yi re waô wi pa jolye dwaṉize yô.

⁸ Ndô Pol agaṉi ôkuṽi wè, awulya inè: Mi pa denda du mbe gw’ivanga ny’Iju, ge gô nagô y’Anyambyè, ge gôre Sezar.

⁹ Ndô gw’aṽeli Festus gô tondy’Iju, awiṉizi Pol inè: Ô bela gô panda gô Yerusalèm, ayèkèlyô gôgô g’ôzô wam̃ g’ômwanja w’isam̃u yiṉo?

¹⁰ Pol awulyi nè: My’are kum̃aṉa pa gw’eka z’ijèkèlya zi Sezar, vovo re myè n’inyanga nyi jèkèlyô. Mi pa dende ndaga mbe gôr’Iju, ga nt’are wè mya pa mbyambye.

¹¹ Sambô ja my’ôyanjisi w’ibe, ge denda pe ndaga yi re myè n’inyanga ny’ijuwa, mi pa bika gô juwa, ndô j’isam̃u yiṉo yi soziza waô myè yi zele rèti, gambèṉè e zel’ôma re n’inyanga nyi piṉa myè gôre waô. Mi ga ge jèkèlyô gôre Sezar.

¹² Vovo Festus, ayè kamba pa n’aṉèro, awiṉizi nè: Ô re bambya pa gô kènda gôre Sezar; ô be kènda gôre Sezar.

¹³ Intyugu sinyèwo vya, aṽyeṉi Agripa y’ôga ni Bèrnike gô Sezare, gô bale Festus.

¹⁴ Gw’alwaṉi waô vovo intyugu inyenge, Festus amyezi ndaga yi Pol gôr’ôga, awulya inè: Vèṉo ar’ôṉôm̃e w’alèkizyô ne Felikisi gô ntyôgô;

¹⁵ gw’avegagi myè gô Yerusalèm, imiṉisè impôlô n’aṉèro w’Iju w’amyezi myè g’ômwanji wè, mbambyaga inè, mi ga ve yè ôgara.

¹⁶ Ndô my’awiṉizi waô inè, e zele ntyale ya Rôma gô piṉ’ôma, kaô mongi sozizè w’abya g’ôzô wè, ko yè dènge mbôra yi kaṉ’ôkuṽi wè g’ômwanja w’isam̃u yi sozizô yè.

¹⁷ Yeṉo gw’alataṉi waô vèṉo, mi pa panga waô gô pengiṉa, ndô bunya my’alwaṉi baru gw’eka z’ijèkèlya, azômbya nè, ôṉôm̃e mèwoṉo e ga ṽagô.

¹⁸ Gw’agum̃aṉi mongi wi sozizè, wi pa sozize yè n’isam̃u imbe, ga nt’avikilyi myè,

¹⁹ ndô w’azozizi yè n’agamba g’ômwanja wi mpoṉo yaô yi saviṉ’Anyambyè, na g’ômwanja w’ôma ini nyè ne Yesu, are juwa pa, ndô Pol e bulya inè, are bo.

²⁰ Gw’avegagi myè ni mpaga nt’are myè ko bambya g’ômwanja w’isam̃u yiṉo, my’aṽambyi yè twa pa e bela gô kènda gô Yerusalèm, ayèkèlyô gôgô g’ômwanja w’isam̃u yiṉo.

²¹ Ndô gw’aṽambyi Pol gô penjavenjô gô jèkèlyô gôre Sezar, my’azômbyi nè, e ga venjavenjô kaô my’atôm̃è gôre Sezar.

²² N’awulinyi Agripa Festus inè: Mi ko tonda kè gô jogo gôr’ôṉôm̃e wiṉo myèmè. Awiṉizi Festus inè, mèṉè, ô be jogo gôre yè.

²³ Yeṉo bunya, Agripa ni Bèrnike w’aṽyeṉi sôngô pa n’aṉag’awenge, ayingiṉa gô mbôra y’ôzozo waô ni kapitèn n’ayôgô wi nkala. Na gw’azômbyi Festus Pol ayinginyô.

²⁴ N’awulyi Festus inè: Ôga Agripa, n’aṉwèdu yi re vèṉo na zwè, aṉwè jeṉ’ôṉôm̃e wiṉo e sozizô gôre myè n’Iju sôdu gô Yerusalèm na vèṉo ta, mbôgiṉaga inè, e zele n’inyanga nyi dwaṉa nyèṉè bo.

²⁵ Ndô my’alèngi nè, e zele denda pe ndaga yi re yè n’inyanga nyi juwa; na gw’aṽambyi yè gô tôm̃ô gôre Sezar, my’agenji gô tôm̃è.

²⁶ Ndô my’azele ni ndaga ya rèti yi tèndiṉe reri yam̃ g’ômwanji wè; yeṉo apanga myè yè gô bôm̃wa gw’azô maṉi, na pôsô g’ôzô wo, ôga Agripa, inè, ayè kotizô pa, myè ko dèng’igamba nyi tènda.

²⁷ Konde mi jeṉa inè, e zele kwèkwè gô piṉ’ôkôte, ko w’arev’isam̃u yi sozizô yè.