Rôm̃i 20 - Bibili 1927 (Omyene)

¹ Gw’avoṉi edungu, Pol alatiz’iṉèngi, alèkiza waô ôjaṉi, alubwi yè agènda gô Makedônya.

² Avyagaṉi yè intye mèsoṉo, ntevuṉag’iṉèngi pôlô.

³ Avila vovo aṽyeṉi yè gô ntye yi Grèk; alwaṉi yè vovo agwèli ararô. Ndô gw’arweṉi yè pyèrè gô kweṉa g’ôwatanga gô kènda gô Sirya, awèwo gôr’Iju w’am̃og’erungu gô kôtè. Vovo agenji yè gô fwinya ni Makedônya.

⁴ Agèndi gô jirô gw’Azya ne Sôpatèr, y’avili gô Berea, y’ômwaṉa wi Pirus, n’Aristarkos ni Sekundos, w’avili gô Tesalônika, ni Gayos, y’avili gô Dèrba, ni Timôte, ni Tukikôs, ni Trôfimos, y’avili gw’Azya.

⁵ Wiṉo w’aliwô w’akèndi ni bôsô, awônda zwè gô Trôas.

⁶ Intyugu si mpèmba yi re levèn fo vyagaṉô, aluli zwè n’ôwatanga avila gô Filipi aṽya gô Trôas, ntyugu ôtaṉè gô mpoṉo, alwaṉi zwè vovo ntyugu ôrwageṉô.

⁷ Gô ntyugu nônga yi wiki, gw’avegagi zwè dataṉa pa ta gô moguṉe mpèmba. Pol agambiṉ’iṉèngi keka pa gô kènda bunya, n’ gambi yè kwang’ôgwèra ṉengeṉenge.

⁸ N’avegag’ilamb’inyenge gô nontye y’igôṉô, y’avegagi zwè dataṉa pa.

⁹ N’iwanjo im̃ori, ini nyè ne Yutikus, avegagi dwaṉa pa baru gw’isangala; na gw’alingizi Pol ikambiṉa, agôtyô n’antyôviṉô ampôlô, na gw’am̃ègagi yè, avôswi gô ntye avila gô ndèkè yi ntyarô, n’arômbiṉô yè juwa pa.

¹⁰ Ndô Pol azum̃iṉi, avôswa gôre yè, aviziṉè n’ago mè, awulya inè: Azugyazugyôṉi, konde em̃èṉo zè zi p’are gôre yè.

¹¹ Na gw’arô pandi yè, am̃oguṉi mpèmba anya, n’arô kambi yè na waô ôling’ôla kwang’ayenjiṉa. Avila vovo alubwi yè.

¹² N’aṽagi waô iwanjo bo, n’azindyô waô pôlô.

¹³ Ndô azw’agèndi gô bôsô g’ôwatanga, alula gô kènda gw’Asos, n’eveve gô bonge Pol gôgô, konde aliwô akenji yeṉo, mbelaga gô kènda gôgô ni ntye.

¹⁴ Gw’alataṉi yè na zwè gw’Asos, azw’awongi yè g’ôwatanga, n’agèndi zwè gô Mitilène.

¹⁵ Aluli zwè avila vovo, bunya aṽyeṉi zwè swaswo ni Kyos. Bunya azimbi zwè gô Samos, n’avila vovo kè bunya aṽyeṉi zwè gô Milete.

¹⁶ Pol aliwô akenji gô pyagaṉ’Efèsi ko yè asimba vovo, ko yè averiz’egômbe gw’Azya; konde anegizi gô diwô gô Yerusalèm gô ntyugu yi Pentekôte, j’ajolya.

¹⁷ Ndô Pol arôm̃i avila gô Milete agènda gw’Efèsi gô fwey’aṉèro wi mandô gôre yè.

¹⁸ Gw’aṽyeṉi waô gôre yè, awulinyi waô inè: Avila gô ntyugu nônga y’ayari myè gw’Azya, aṉwèmè aṉw’avôrô nt’alwaṉagi myè na ṉwè egômbe zôdu,

¹⁹ njanjiṉage Rerè n’isônya s’ôkuṽa sôdu, n’antyoṉi, n’azingô m’aṽyeṉi gôre myè avila gw’imôndo s’Iju.

²⁰ Aṉw’avôrô inè, mi pa nimba gô takilya ṉwè agamba môdu m’avegagi na ṉwè isolo, na inè, mi pa tya gô kambiṉa ṉwè ntyangô mbya na gô nènja ṉwè gw’azô m’aṉaga na gw’inagô,

²¹ nènjag’Iju ni Grèk iniga si nkôndi gôr’Anyambyè n’ibekelya gôre Reri yazô Yesu‐Krist.

²² Na vèṉo, vônaṉi, mi kènda gô Yerusalèm, kôrô pa n’Iṉiṉa, ko my’amya isam̃u yi be twa gôre myè gôgô;

²³ dadyè Iṉiṉ’Iṽya nyi siṉa myè inè, mi bôndô n’igôrô n’azingô gô nkaly’edu.

²⁴ Ndô mi pa tang’emèṉo zam̃ ezom̃a, ge panga zô njôni gôre myè, kaô dadyè inè, mi ga zukiz’ôlembyaṉô wam̃ n’igeṽa, n’eṽilô zam̃ zi miṉisè z’avenyô myè ne Rerè Yesu, gô kambiṉe ntyangô mbya y’imèpiṉô s’Anyambyè.

²⁵ Na vèṉo, my’avôrô inè, aṉwèdu y’agèndiṉô myè nkambiṉag’iṉongo ny’Anyambyè, aṉwè ze tô jeṉ’ôzô wam̃ nyèṉè.

²⁶ Yeṉo mi takilya gôre ṉwè ṉèṉo wiṉo inè, my’are pupu avila gô ntyiṉi yaṉi aṉwèdu;

²⁷ konde my’are kambiṉa pa ṉwè igamba ny’Anyambyè nyôdu, ko my’aṉimb’ezom̃a.

²⁸ Sambô ṽandam̃iṉaṉ’ikuṽi yaṉimè, n’ôlemba wôdu wi re ṉwè dôṽyô pa n’Iṉiṉ’Iṽya ivenjavenji, gô nyeze mandô ya Rerè, y’agôlyô yè ni ntyiṉi yèmè.

²⁹ My’avôrô inè, myè kènda pa, inyam̃’imbendi si be jingiṉa gôre ṉwè, si re si ze tig’ôlemba gô tôla,

³⁰ na gôre ṉwèmè kè e be nongw’aṉaga wi be nènj’isam̃u imbe gô dur’iṉèngi gô sônga waô.

³¹ Sambô ṽandam̃iṉaṉi, ko jônginyaṉi nè, vo impum̃’irarô, mi pa tiga gô tevuṉ’ôm’edu gôre ṉwè n’antyoṉi ôgwèra n’ôm̃anda.

³² Na vèṉo, mi tiga ṉwè gôr’Anyambyè na gw’igamba ny’imèpiṉô sè, nyi re ni ngulu yi jolya ṉwè aṉiviza ṉwè ta na waôdu wi re mèpizô pa.

³³ Mi pa jônguṉe sika ya pupu ge ya teṉateṉa, ge ingoy s’ôm’edu.

³⁴ Aṉwèmè aṉw’avôrô inè, ago mam̃ miṉo m’ayanjiṉi myè, na waô w’avegagi na myè, yom̃a y’avegagi na zwè isolo.

³⁵ Gw’isam̃u yôdu my’arevi ṉwè nt’are ṉwè gô janja na gô nunguṉ’alèli, na gô jônginy’agamba ma Rerè m’awulyô yèmè inè: Gô pa yi re n’ôzaviṉô vyagaṉô na gô pô.

³⁶ Ayè kamba pa yeṉo, alôṽi akotolo, agambiṉa na waôdu.

³⁷ N’aleṉi waôdu pôlô ayèza g’ômpele wi Pol, azombè,

³⁸ njeṉag’ekèṽa pôsô g’ômwanja w’igamba ny’awulyô yè inè, wi ze tô jeṉ’ôzô wè nyèṉè. N’ayiri waô yè kwanga g’ôwatanga.