Rôm̃i 17 - Bibili 1927 (Omyene)

¹ Avyagaṉi Pol ni Silas gw’Amfipôlis n’Apôlônya, n’aṽyeṉi waô gô Tesalônika; vovo avegagi nagô yi soṉo y’Iju.

² N’ayingiṉi Pol gôre waô, ga nt’avegagi ntyale yè. N’alôṽagi yè mpaga na waô, avila gw’Irèndo, soṉo ntyarô,

³ mbènguṉaga ni ndwaṉizaga inè, avegag’isolo gôre Krist gô juwa na gô tôngwa avila gw’ijuwa. Na inè, Yesu yiṉo yi kambiṉa myè ṉwè, ayè ne Krist.

⁴ Awèwo gôre waô w’ayiviri, aliṽa gôre Pol ni Silas, n’awenge kè gôre Grèk w’alubag’Anyambyè w’ayiviri, n’awenge kè gôr’antô w’inyanga.

⁵ Ndô Iju s’ayônyi ni ñandi awong’ aṉag’aṽe wi nkala, alatize nkumba y’aṉaga, n’ayivi waô edungu gô nkala yôdu. N’ayiraṉi waô gô nagô yi Yazon gô jôṉa yô, n’awuti waô Pol ni Silas gô kogunya waô gôr’aṉaga.

⁶ Gw’arweṉi nè, wi pa dènga waô, w’aluri Yazon n’awarerè awèwo gw’azô m’ivangiṉi yi nkala, mbôgiṉaga inè: Aṉaga wiṉo, wi re sugyazugya pe ntye, wi re bya pa gunu kè, n’ayinginyô waô ne Yazon.

⁷ Mongi siṉo waôdu wi pav’ampanga mi Sezar, mbulyaga inè, ar’ôg’ômwèṉè, wô ne Yesu.

⁸ N’aryezi waô aṉaga n’ivangiṉi yi nkala n’agamba miṉo,

⁹ waô bonga pe puṉu, avila gôre Yazon na mongi mori, w’alèkizi waô dyè.

¹⁰ Azunge kèndiz’awarerè agèndize Pol ni Silas ôgwèra gô Berea. Gw’aṽyeṉi waô gôgô w’ayingiṉi gô nagô yi soṉo y’Iju.

¹¹ Ndô Iju mèsoṉo s’avegag’aṉagaṉagye vyagaṉô na sa Tesalônika, konde w’awong’igamba n’itond’ipôlô, agèlagèl’Irèndo ntyugw’edu, gô mya twa pa isam̃u mèyoṉo yi bulyô waô yi re yeṉo.

¹² Yeṉo awenge gôre waô w’aṽekelyi, n’antô awenge w’anyanga wi Grèk, n’aṉôm̃e kè.

¹³ Ndô gw’amyeṉ’Iju si Tesalônika inè, Pol e kambiṉa kè igamba ny’Anyambyè gô Berea, w’aṽyeṉi gôgô ntumbaga ni nsonkolyaga kè aṉaga.

¹⁴ N’azunge kèndiz’awarerè agèndize Pol gô ntyuṽa, n’alèki Silas ni Timôte gô Berea.

¹⁵ Mongi w’agèndi gô jire Pol w’agèndizi yè kwanga gw’Atèn. Na gw’azômbyô waô ne Pol inè, Silas ni Timôte wi ga ṽye ngwambe gôre yè, w’awinyi.

¹⁶ Gw’avengiṉôgô waô ne Pol gw’Atèn, iṉiṉi nyè ny’azokolyô gw’ayeṉi yè nkala mèyoṉo ralye n’ikaṉa.

¹⁷ Yeṉo agambagi yè n’Iju na mongi w’alubag’Anyambyè gô nagô yi soṉo, ntyugw’edu kè gw’igôliṉô n’aṉaga w’alataṉi na yè vovo.

¹⁸ N’aṉaga w’imya awèwo wi fweyô inè, epikuryan ni stôyike w’agum̃aṉi alôṽe mpaga na yè. N’awulyi awèwo inè: Ôgambagambi wiṉo e bulya sèṉi? Am̃ori w’ayogyô yè e kambiṉe Yesu n’itôngwa avila gw’ijuwa w’awulyi nè: Ar’egolaṉi g’ôma wi kambiṉ’inyambyè inyoṉa.

¹⁹ N’agôti waô yè, aṽagè gô mbôra yi fweyô inè, Aryôpagos, awulya inè: Azwè ko mya nt’ar’inènj’ijoṉa siṉo si nènjô wè?

²⁰ Konde ô panga zwè gô jogw’isam̃u imyoṉa. Sambô azwè bela gô mya nte pivya isam̃u yiṉo.

²¹ Ndô Atèn waôdu, n’agènda w’alwaṉagi gw’Atèn, wi pa periz’egômbe zaô g’ôsam̃u ômwèṉè, kaô du gô bulya, ntyo gô jogw’agamb’am̃oṉa.

²² N’agum̃aṉi Pol gô garegare y’Aryôpagos, awulya inè: Aṉwè aṉôm̃e w’Atèn, gw’isam̃u yôdu mi jeṉa nè, aṉwè saviṉa pôlô.

²³ Konde gw’arèkagi myè gô nkali yaṉi, na gw’avônagi myè yom̃a yi saviṉô ṉwè, my’ayeṉi kè mbôra yi jirô intyagô y’avegagi n’irèndo yiṉo inè: Gôr’anyambyè yi re yi pa myô! Sambô ezom̃a zi saviṉô ṉwè imya fo, zô myeza myè ṉwè.

²⁴ Anyambyè y’avangi ntye ni yom̃a yôdu yi re gô yô, ayè kè Ôvangiṉi w’ôrôṽa ni ntye, e pa dwaṉa du gw’inagô si nôgô n’ago m’aṉaga;

²⁵ ayè e pa janjiṉô n’ago m’aṉaga, konde ayèmè e p’em̃èṉo gôr’aṉaga waôdu, n’ômwèy wi felô zwè, ni yom̃a yôdu.

²⁶ Are panga pa kè, avila gôr’ôm̃ori, aṉongo m’aṉaga môdu gô dwaṉa gô ntye yôdu, agenja kè gômbe yaô n’ikaô yi be dwaṉô waô;

²⁷ inè, wi ga wut’Anyambyè vendetwa waô ko bwatawata alèngè, vangaṉe e zele bô gôr’ôm’edu gôre zwè,

²⁸ konde gôre yè dènga zwè em̃èṉo, agangaṉa, alwaṉa kè bo. Ga nt’ar’awèwo kè gôr’inyembi saṉi bulya pa inè: Azwè kè azw’awaṉi wè.

²⁹ Sambô gô re nè, azw’awaṉa w’Anyambyè, azw’aronde pikilya inè, ôkuku w’Anyambyè wi r’egolaṉi ga sika ya teṉateṉa ge ya pupu, ge g’idô, pangô pa n’ikèngè n’avôṉô m’aṉaga.

³⁰ Egômbe z’avegag’aṉaga imya fo, Anyambyè avôzi zô, ndô vèṉo e myez’aṉaga waôdu gô mbôry’edu inè, wi ga galwe,

³¹ konde are teta pe ntyugu yi be jèkèlyè ntye ga nt’ar’ôgôre, vo ôma mè wi re yè dôṽya pa, are myeza pa kè aṉaga yeṉo ni tôngunyè avila gw’ijuwa.

³² Gw’ayogyô waô g’ômwanja w’itôngunyô sa mongi wi re juwa pa, awèwo w’azèlyi, n’am̃ori w’awulyi nè: Azwè be tô pôganyô wè g’ômwanja w’igamba nyiṉo egômb’ezèṉè.

³³ Yeṉo agogwi Pol avila gôre waô.

³⁴ Ndo aṉag’awèwo w’aliṽi na yè aṽekelya; gôre waô avegagi Deni, y’ôma w’Aryôpagos, n’ômwantô ini nyè ne Damaris, n’am̃ori kè na waô.