Rôm̃i 15 - Bibili 1927 (Omyene)

¹ Aṽyeṉ’aṉag’awèwo avila gô Yuda, aṉènj’awarerè inè: J’aṉwè pa kèrô, ga nt’are ntyale yi Môsès, aṉw’ayolye sungiṉô.

² Pol ni Barnabas wi pa kwezakaṉa na waô, n’alôṽi waô mpaga mpôlô na waô; gambèṉè awarerè w’agenji nè, Pol ni Barnabas, n’awèwo gôre waô wi ga vande gô Yerusalèm gôre rôm̃i n’aṉèro g’ômwanja wi mpaga yiṉo.

³ Waô jirô pa ne mandô gô mpoṉo, w’agombiz’ôgèndo waô avyagaṉa gô Foynike na gô Samarya, ntankilyag’ikalwa gôr’aṉongo, n’ayeṉizi waô awarerè waôdu mbya mpôlô.

⁴ Gw’aziṽi waô gô Yerusalèm, w’awongyô ne mandô, ni rôm̃i n’aṉèro, n’arakilyi waô isam̃u yôdu y’alendyô n’Anyambyè vo waô.

⁵ Ndô awèwo avila gô nkumba y’ifarisi w’avegagi bekelya pa, w’agum̃aṉi awulya inè, ar’isolo gôr’aṉongo gô kèrô na gô penjavenj’ivanga nyi Môsès.

⁶ N’alataṉi rôm̃i n’aṉèro gô kèlagèl’igamba mè.

⁷ Gw’aliwô waô w’akambi pôlô, agum̃aṉi Pyère gôre, awulinya waô inè: Awarera, aṉw’are mya pa avila ôling’ôla inè, Anyambyè avinji gôre ṉwè inè, aṉongo wi ga yogw’igamba nyi ntyangô mbya ko waô bekelya vo ôgwaṉi wam̃.

⁸ N’Anyambyè yi my’irèm̃a, arakilyi g’ômwanji waô, ava waô Iṉiṉ’Iṽya ga nt’aveṉi yè gôre zwè;

⁹ e pa panga kè ibangwaṉa ntyo zwè ntyo waô, njombunyag’irèm̃i yaô n’ibekelya.

¹⁰ Sambô vèṉo, ntiṉa nde yi demba ṉwè Anyambyè, awele mpanga gw’impele y’iṉèngi, yi re ireri sazô ge zwè e pa jolye twaṉa yô?

¹¹ Ndô azwè bekelya inè, azwè be sungiṉô vo imèpiṉô sa Rerè Yesu, mbela mèmô ga waô.

¹² N’alwaṉi aṉaga waôdu dodo, avôganyô Barnabas ni Pol, n’arakilyi waô lemba yôdu n’isam̃u yi mamô y’alendyô n’Anyambyè gôr’aṉongo vo waô.

¹³ Gw’am̃azi waô ikamba, Yakobu awiṉizi, awulya inè:

¹⁴ Awarera, vôganyôṉi myè! Simôn are takilya pa nt’alônge bali Anyambyè aṉongo gô pinja avila gô mô aṉaga wi twaṉ’ini nyè.

¹⁵ N’agamba m’ivogisi mi kwezakaṉa n’igamba, ga nt’are tèndô pa inè:

¹⁶ Isam̃u yiṉo vya, mi be fwinya ko mi nongunye nagô yi David yi re pôswa pa, mi be tô nôge nagô yi re sazô pa, ko mi kum̃anya yô,

¹⁷ ko aṉaga wi dèka bute Rerè, n’aṉongo môdu kè mi dagiṉ’ini nyam̃, bulye Yeôva, yi pang’isam̃u yiṉo,

¹⁸ na yi myez isam̃u yiṉo avila gô koṉako.

¹⁹ Sambô igambi nyam̃ nyi re nè, azw’azokolya waô wi kalwa gôr’Anyambyè avila gôr’aṉongo,

²⁰ ndô azwè ga rèndiṉe waô inè, wi ga venjavenj’ikuṽi yaô avila gw’isèkè s’ikaṉa, n’avila g’ôṽelaṉô, ko w’any’inyam̃a si pyarômpyarôgô, ni ntyiṉa.

²¹ Konde avila gw’ampôm̃’alônga, Môsès gô nkaly’edu are n’aṉaga wi kambiṉè, yangô yè ntanguṉôgô soṉo edu gw’inagô si soṉo.

²² Gambèṉè rôm̃i n’aṉèro, ni mandô yôdu w’ayeṉi mbya gô pinj’aṉaga avila gô nkumbi yaô arôm̃a gw’Antyok, ni Pol ni Barnabas, Yudi, aweyôgô inè, Barsabas, ni Silas aṉaga w’anyanga gôr’awarerè.

²³ N’arèndi waô ezangô ava zô waô inè: Rôm̃i, n’aṉèro, n’awererè, gôr’awarerè wi re gôr’aṉongo, wi re gw’Antyok, gô Sirya, na gô Kilikya, mbôlôaṉi!

²⁴ Gô re nè, azw’are jogo pa inè, awèwo wi re dubwa pa avila gôre zwè, wi re sokolya pa ṉwè n’agambi maô azugyazugy’aṉiṉi maṉi, wi re wi pa sômbyô ne zwè,

²⁵ azwè du dataṉa pa ta, azw’avikilyi nè, are mbya, gô pinj’aṉaga arôm̃a waô gôre ṉwè ni Barnabas ni Pol, awareri yazô wi tondô,

²⁶ aṉaga wino wi re dimbiṉa pe m̃èṉo yaô g’ômwanja w’ina nya Reri yazô Yesu‐Krist.

²⁷ Yeṉo azw’are tôm̃a pe Yudi ni Silas, waômè kè wi be bulinya ṉwè isam̃u mèmô n’ôgwaṉa.

²⁸ Konde ajenyô mbya gôr’Iṉiṉ’Iṽya na gôre zwè inè, azw’arwaṉiza ṉwè irwaṉô inyèṉè ivôlô vyagaṉô n’isam̃u yiṉo yi re n’isolo inè:

²⁹ Ṽangunyaṉ’ikuṽi yaṉi avila gô ṽèrè yi jirô gw’ikaṉa, n’avila gô ntyiṉa, n’avila gw’inyam̃a si jôṉô mpyarôgô, n’avila g’ôṽelaṉô; e be dwaṉa mbyambye gôre ṉwè gô penjavenj’ikuṽi yaṉi avila gw’isam̃u yiṉo.

³⁰ Yeṉo arôm̃yô waô, agènda gw’Antyok, n’alatizi waô aṉaga ava waô ezangô.

³¹ Waô tanguṉa pa zô, awarerè w’ayeṉi mbya, azindyô irèm̃a.

³² Yudi ni Silas, waômè kè w’avegag’ivogisi, w’arevuṉi waô ayoliza waô n’agamb’am̃enge.

³³ Waô dwaṉa pa gôgô ôlingô wa kwè, awarerè w’arôm̃i waô n’am̃ènjè awinya gôre mongi w’arôm̃i waô.

³⁴ Ndô Silas agenji gô tigaṉa.

³⁵ Pol ni Barnabas w’alwaṉi gw’Antyok, nènjaga nkambiṉage ntyangô mbya y’igamba nya Rerè, waô n’awèṉè awenge kè.

³⁶ Intyugu sinyèwo pyagaṉa pa, Pol awulinyi Barnabas inè: Azwè ga winye gô bal’awarerè gw’inkala sôdu s’agambiṉi zwè igamba nya Rerè, ko zwè jeṉa nte denda waô.

³⁷ Barnabas aṽeli gô bonga kè Yôan, aweyôgô inè, Mark;

³⁸ ndô Pol e pa jeṉa kwèkwè gô bonga na waô ayè y’alubwi gôre waô avila gô Pamfilya, ko yè agènda na waô gw’eṽilô zaô.

³⁹ N’arweṉi mpaga mpôlô gôre waô, y’avangi waô gô bangwaṉa. N’awongi Barnabas Mark gô kènda na yè; aluli waô n’ôwatanga agènda gô Kiprus.

⁴⁰ Ndô Pol awongi Silas, agènda; awarerè w’aveṉi yè gw’imèpiṉô sa Rerè.

⁴¹ N’avyagaṉi yè gô Sirya na gô Kilikya, njolizag’imandô.