Rôm̃i 12 - Bibili 1927 (Omyene)

¹ Gw’egômbe mèzoṉo, Erod y’ôga, anyonyuṉ’ago mè gô jeṉiz’awèwo gô mandô njuke,

² n’ayôṉi yè Yakobu, ya mwô’ngwè wi Yôan, n’ôkwara.

³ Gw’ayeṉi yè inè, igamba mè ny’arondy’Iju, arô kôti kè Pyère. Avegag’intyugu si nyô mpèmba yi re levèn fo.

⁴ Ayè kôtè pa, aweli yè gô ntyôgô, avè gô penjavenjô n’inkumba nay s’isozè nay, aṽeli gô kogunyè gôr’ aṉaga Paki pyagaṉa pa.

⁵ Yeṉo Pyère avenjavenjô gô ntyôgô, ni mandô y’agambiṉagi Anyambyè pôlô g’ômwanji wè.

⁶ Ôgwèra mè w’avegagi j’ôwenja kôze, gambèṉè Erod akogunyè, Pyère avegagi tagô pa n’azungakaṉô ambaṉi, dèwa pa gô garegare yi sozè mbaṉi; n’ivenjavenji y’avegagi swaswo n’ômpômbala gô bandam̃iṉe nagô yi ntyôgô.

⁷ Na vôna, yenjèl ya Rerè y’aṽyeṉi pyèrè na yè, n’aṽamb’ôzange gô nagô yi ntyôgô. N’awôli yenjèl Pyère g’ôṽanja, ayèm̃è, awulya inè: Ṉongwa ngwambè! N’azodw’azungakaṉô avila gw’ago mè.

⁸ N’awulinyô yè ne yenjèl inè: Liry’ôtumbi wo, ko fwel’intyôzô s’atanga gw’intyôzô so. N’alendi yè yeṉo. N’arô bulinyô yè ne yenjèl inè: Wore ngoy yo, ko sônga myè.

⁹ N’agogwi Pyère, azôngè, ndô e pa mya inè, ôsam̃u wi dendô ne yenjèl wi re rèti, ndô avikilyi nè, e jeṉe nyinô.

¹⁰ Gw’avyagaṉi waô ivengiṉô ilônga na nya mbaṉi, w’aṽyeṉi gw’iguge ny’ômwanga nyi kènda gô nkala, n’aṉunguṉi nyô gôre waô nyômè; agogwi waô, avyagaṉ’igal’im̃ori. Vovo yenjèl y’alubwi pelè avila gôre Pyère.

¹¹ Gw’alwaṉi Pyère nju, awulyi nè: Vèṉo my’avôrô rèti nè, Rerè are tôm̃a pa yenjèl yè, ko yô tômba myè avila g’ôgo w’Erod n’avila gw’isam̃u yôdu yi bôndô n’Iju.

¹² Ayè pikilya p’igamba mbyambye, agèndi gô nagô yi Marya, yi ngwè yi Yôan, aweyôgô kè inè, Mark, mbôra y’avegag’aṉag’awenge dataṉa pa agambiṉaga.

¹³ Gw’alôkagi Pyère iguge ny’evungu, aṽyeṉi nyôngô nyantô ini nyè ne Rôda, gô pôganyô.

¹⁴ Amyeṉi yè inyôy nyi Pyère; ndô g’ômwanja w’igeṽa ny’ayenyô yè e pa nunguṉ’iguge, ndô avali yè mangô gô bulya inè, Pyère e kum̃aṉa g’ômpômbala.

¹⁵ Awulinyi waô yè inè: Ô re nkende. Ndô awulyi buku inè, igamba nyi re du rèti yeṉo. N’awulyi waô inè: Yô ne yenjèl yè.

¹⁶ Ndô Pyère avegagi ndôkaga. N’aṉunguṉi waô iguge, am̃ama gw’ayeṉi waô yè.

¹⁷ Avèpô waô ne Pyère ôgo inè, wi ga lwaṉe dodo; n’arakilyi yè waô nt’akogunyô yè ne Rerè avila gô nagô yi ntyôgô, n’awulyi yè inè: Myezaṉ’isam̃u yiṉo gôre Yakobu na gôr’awarerè. Avila vovo agogwi yè, agènda gô mbôra nyèṉè.

¹⁸ Gw’ayenj’ôwenja arweṉi edungu evôlô gôr’isozè g’ômwanja wi Pyère.

¹⁹ Na gw’awutyô yè n’Erod, ko yè alèngè, agotiz’ivenjavenji, azômbya inè, yi ga yôṉô. Avila vovo azum̃iṉi yè avila gô Yuda agènda gô Sezare gô dwaṉa gôgô.

²⁰ N’avegagi Erod benda pa pôlô na mongi Tir na mongi Sidôn. Ndô w’aṽyeṉi n’ôrèm̃’ômô gôre yè; na waô panga pe Blaste, y’ôvenjavenji wi nagô y’ôga, gô dwaṉe ndeg’ waô, w’aṽambyi am̃ènjè, konde ntye yaô y’alèngag’inya avila gô ntye y’ôga.

²¹ Na gô ntyugu y’aretyô yè, Erod, bora p’ingoy sè s’ôga, alwaṉi baru gw’eki zè, agamba na waô.

²² N’arôngi aṉaga inè: Nyiṉo inyôy ny’anyambyè, aranga ny’ôma!

²³ Na v’igamba ny’agwaṉa yenjèl ya Rerè y’awôli yè, konde e pa p’isum̃inya gôr’Anyambyè. N’anyenyô yè n’igu, azul’ômwèy.

²⁴ Ndô igamba ny’Anyambyè ny’avendi mpendaga vyagaṉô, ni ntangô y’iṉèngi y’agundyô.

²⁵ Barnabas ni Sol, maza p’eṽilô zaô, w’awinyi avila gô Yerusalèm, awonga na waô Yôan, yi fweyô kè inè, Mark.