Rôm̃i 11 - Bibili 1927 (Omyene)

¹ Ayogyô rôm̃i n’awarerè w’avegagi gô Yuda inè, aṉongo m’abongi kè igamba ny’Anyambyè.

² Na gw’avandi Pyère gô Yerusalèm waô w’avegagi kèrô pa w’azèmbi yè, awulya inè:

³ W’ayingiṉi gôre mongi wi r’izombè, anya na waô.

⁴ Avakilyi Pyère gô bènguṉa nt’arweṉ’igamba. Awulyi yè inè:

⁵ My’avegagi gô nkala yi Yôpa, na gw’agambiṉagi myè, my’avôswi egolaṉi ga gw’antyôviṉô, n’ayinô myè nyinô: ezom̃a egolaṉi g’ôṉamb’ômpôlô kôtô pa gw’intyôrô sô nay, wi sônyô avila g’ôrôṽa aṽya kwanga gôre myè.

⁶ N’avôni myè ôṉamba mèwoṉo, agèlagèla, n’ayeṉi myè inyam̃a si ntye s’impondo inay, n’inyam̃a s’iga, ni vugiṉa yi dandalanda, n’inyoṉi s’igôṉô.

⁷ N’ayogyô myè inyôy nyi bulinya myè inè: Gum̃aṉa, Pyère, yôṉa ko nya.

⁸ Ndô my’awulyi nè: Nyawè, Rera, konde e zel’ezom̃a z’enyanyambyè g’ezom̃a z’isèkè zi re jingiṉa pa ni mori g’ôgwaṉi wam̃.

⁹ Na gô nyongo yi mbaṉi inyôy ny’ayogaṉô avila g’ôrôṽa inè: Ezom̃a zi r’Anyambyè panga pe nkèrè, avôna zô inè, ezom̃a z’isèkè.

¹⁰ Igamba nyiṉo ny’agambyô nyongo ntyarô; n’arô duryô yom̃a yôdu g’ôrôṽa.

¹¹ Na vôna, agum̃aṉi pelè, swaswo n’ômpômbala wi nagô y’avegagi myè, aṉôm̃e ararô w’arôm̃yô avila gô Sezare aṽya gôre myè.

¹² N’awulinyô myè n’Iṉiṉa gô kènda na waô mpaga fo. Aṉôm̃e wiṉo ôrôṽa w’agèndi kè na myè, n’ayingiṉi zwè gô nagô yi Kornelyos.

¹³ Ôma mèwoṉo arakilyi zwè nt’aliwô yè ajeṉi yenjèl gô nagô yè nkum̃aṉaga swaswo na yè, awulya inè: Rôm̃a gô Yôpa, ko kôve Simôn, e fweyô inè, Pyère,

¹⁴ ayè be bulinyo isam̃u yi re wè ko sungiṉô, awè n’inyômbi nyo nyôdu.

¹⁵ Na gw’avakilyi myè gô kamba, Iṉiṉ’Iṽya ny’azum̃iṉi gôre waô, ga nt’azum̃iṉi nyô gôre zwè gw’ipakilya.

¹⁶ N’ayônginyi myè igamba mè nya Rerè, nt’awulyi yè inè: Yôan aṽatizi n’aṉingô, ndô aṉwè be batizyô n’Iṉiṉ’Iṽya.

¹⁷ Ndô gô re nè Anyambyè aveṉi waô ga nt’aveṉi yè zwè, gw’aṽekelyi zwè Rerè Yesu‐Krist, myè, mi ko jolye sir’Anyambyè?

¹⁸ Waô jogo p’isam̃u yiṉo, w’alwaṉi dodo, azum̃iny’Anyambyè, awulya inè: Sambô Anyambyè are pa p’aṉongo kè iniga si nkôndi gw’em̃èṉo.

¹⁹ Waô w’avazanganyô n’ikombiza s’aṉongwi g’ômwanja wi Stefan, w’agèndi kwanga gô Foynike, na gô nenge yi Kiprus, na gw’Antyok, nkambiṉag’igamba kaô gôr’Iju dadyè.

²⁰ Ndô awèwo gôre waô, aṉôm̃e wi Kiprus na wi Kirèni, gw’aṽyeṉi waô gw’Antyok, w’agambi gôre Grèk, nkambiṉaga waô ntyangô mbya ya Rerè Yesu.

²¹ Ôgo wa Rerè w’avegagi na waô, ni ntangô mpôlô y’aṉaga w’aṽekelyi agalwa gôre Rerè.

²² Ntyangô g’ômwanji waô y’aṽyeṉi gw’arôy m’ikirisoṉi si mandô yi Yerusalèm, n’arôm̃i waô Barnabas gô kènda kwanga gw’Antyok.

²³ Gw’aṽyeṉi yè, ko yè jeṉ’imèpiṉô s’Anyambyè, ayeṉi mbya, arevuṉa waôdu inè, wi ga gôte Rerè ngèngèngè n’irèm̃i yaô yôdu.

²⁴ Konde avegag’ôm’ombya, ralye n’Iṉiṉ’Iṽya n’ibekelya. N’agundyô aṉag’awenge gôre Rerè.

²⁵ Avila vovo agèndi Barnabas gô Tarsis gô bute Sol, na gw’alèngyè yè, aṽagi yè gw’Antyok.

²⁶ N’arweṉi nè ômpum̃a wôdudu w’alataṉagi ni mandô, aṉènj’aṉag’awenge. Iṉèngi y’alônge fweyô inè, ikirisoṉi, gw’Antyok.

²⁷ Gw’egômbe mèzoṉo azum̃iṉ’ivogisi avila gô Yerusalèm agènda gw’Antyok.

²⁸ N’ôm̃ori gôre waô, ini nyè ne Agabus, agum̃aṉi, amyeza n’Iṉiṉa inè, e be dwaṉe njaṉa mpôlô gô ntye yôdu. Y’aṽyeṉi gw’egômbe zi Klôdyon.

²⁹ N’agenj’iṉèngi ôm’edu ga nt’avegagi ngulu yè, gô twaz’iṉunguṉa gôr’awarerè w’alwaṉagi gô Yuda.

³⁰ W’alendi yeṉo kè ntwazaga sô gôr’aṉèro n’ago mi Barnabas ni Sol.