Rôma 3 - Bibili 1927 (Omyene)

¹ Sambô ezom̃a nde zi pyagaṉa n’Iju, ge isolo nde nyi re n’ikèra?

² Si re n’isolo ivôlô nkôṽy’edu, pôsô konde mongi wi re kèrô pa w’ayeginyô agamba m’Anyambyè.

³ Ndô ande, gô re nè awèwo wi pa bekelya, gambèṉè itwaṽekelyi saô si be jiliz’ôrèti w’Anyambyè?

⁴ Alwaṉe yeṉo! Anyambyè e ga myô g’ôrèti, n’ôrèti, n’ôm’edu ôṉôki, ga nt’are tèndô pa, inè: Ko wè dwaṉ’ôgôre gw’agambi mo, ko wè keṽa gô be jèkèlyô wè.

⁵ Ndô j’ibe sazô s’adwaṉiz’ôgôre w’Anyambyè, azwè be bulya sè? Anyambyè, e zel’ôgôre gô be sônyè ôgôm̃a? Mi kamba g’ôma.

⁶ Alwaṉe yeṉo! Gambèṉè Anyambyè ko jèkèlye ntye sè?

⁷ Ndô j’ôrèti w’Anyambyè w’awuṉi gw’ivendi nyè n’inôki sam̃, gambèṉè mi p’are pô p’ôgara g’ôm’ombe sè?

⁸ Sambô ntiṉa nde azwè pa dende mbe ko mbya yô bya, ga nte bèrinyô zwè, na ga nte buly’awèwo inè, azwè kamba yeṉo? Ôgara wa mongi mèsoṉo wi re gôre.

⁹ Ndô sè? Azw’are vyagaṉô na waô? Nyawè. Konde azw’are bulya pa inè, Iju ni Grèk waôdu ta, wi re gw’ibe;

¹⁰ ga nt’are tèndô pa, inè: E zel’ôma w’ôgôre, vangaṉ’ôm̃ori;

¹¹ e zel’ôma w’ikôtiza, zel’ôma wi but’Anyambyè;

¹² waôdu wi re jèrwa pa, waôdu wi re fweva pa; e zel’ôma wi dende mbya, vangaṉ’ôm̃ori;

¹³ pôngô yaô n’ôrôngiṉô wa zange; wi temiza n’iṉèm̃è yaô; nduma y’impeṉe yi re gw’iṉumbu yaô;

¹⁴ agwaṉi maô mi re n’isava ni nôṉe ralye;

¹⁵ agôlô maô mi nèga gô pôvize ntyiṉa;

¹⁶ ijiliza n’azingô mi re gw’impoṉo saô;

¹⁷ mpoṉo y’am̃ènjè w’amye yô;

¹⁸ itya s’Anyambyè si zele gw’antyo maô.

¹⁹ Ndô azw’avôrô inè, isam̃u yi bulyô n’ivanga, nyi kamba na waô wi re gw’ivanga, ko ôgwany’edu nunjô, ni ntye yôdu dwaṉ’ôgara g’ôzô w’Anyambyè.

²⁰ Konde e zel’ôzôṉe wi be dwaṉ’ôgôre g’ôzô wè v’ijanj’ivanga, konde imya s’ibe si pila gw’ivanga.

²¹ Ndô vèṉo ôgôre w’Anyambyè wi re wi pa pila gw’ivanga w’atum̃inyô, mbukuṉôgô n’ivanga n’ivogisi,

²² ôgôre w’Anyambyè wi pila gw’ibekelye Yesu‐Krist gôre waôdu wi bekelya, konde e zel’ibangwaṉa.

²³ Konde waôdu wi re fwem̃a pa, avèṉ’isum̃inya s’Anyambyè;

²⁴ wi dwaṉizô agôre mpagaga v’imèpiṉô sè na v’ôlanduṉô wi re gôre Yesu‐Krist.

²⁵ Ayè alôṽyô n’Anyambyè gô dwaṉ’ôraṽô v’ibekelye ntyiṉi yè, gô tum̃iny’ôgôre wè, konde avôzi gô tevuṉ’ibe s’alônge dendyô,

²⁶ g’ômwanja w’isindiṉi sè, gô tum̃iny’ôgôre wè egômbe ziṉo, ko yè dwaṉ’ôgôre, alwaṉiza kè ôma wi bekelye Yesu ôgôre.

²⁷ Sambô ntiṉa yi sôgwa yi re gweṉi? Y’aṉunjô. N’ivanga nyeṉi? N’ivanga ny’ijanja? Nyawè, ndô n’ivanga ny’ibekelya.

²⁸ Sambô azwè teṉiza nè, ôma e dwaṉizô ôgôre n’ibekelya, aranga n’ijanja s’ivanga.

²⁹ Ge Anyambyè are dadyè Anyambyè y’Iju? Ayè aranga kè Anyambyè y’aṉongo?

³⁰ Eñ, ayè kè Anyambyè y’aṉongo, konde ar’Anyambyè mori dadyè, e be dwaṉiza mongi wi re kèrô pa agôre v’ibekelya, na mongi wi re kè izombè agôre v’ibekelya.

³¹ Sambô azwè be jiliz’ivanga vo ibekelya? Alwaṉe yeṉo! Ndô azwè joliza nyô njolizaga.