Rôma 2 - Bibili 1927 (Omyene)

¹ Sambô ô ze ni ntyongwè, awè yi jèkèlya: konde gô ndaga yi jèkèlyo am̃ori, ô p’ôkuṽi womè ôgara; konde awè yi jèkèlya ô dend’isam̃u mèmô.

² Azw’avôrô inè, ijèkèlya s’Anyambyè si re rèti gôre waô wi dend’isam̃u ôṉongo wiṉo.

³ Ndô awè, yi jèkèlya waô wi dend’isam̃u ôṉongo wiṉo, ô denda yô kè mbela mô, ô pikilya nè, ô be jolye fang’ijèkèlya s’Anyambyè?

⁴ Ge awè ô pèdya ibuṉa s’ômbyi wè, n’isindiṉi sè, n’isile benda, ko w’amya inè, ômbya w’Anyambyè wi kèndyo gw’iniga si nkôndi?

⁵ Ndô ga nt’are njoliṉi yo n’ôrèm̃a wi re wi pa nige nkôndi, ô kenjiṉ’ôkuṽi womè eguṉu gô ntyugu y’eguṉu na y’itum̃inya s’ijèkèlya sa rèti s’Anyambyè,

⁶ e be p’ôm’edu ga nt’ar’ijanji sè:

⁷ gôre waô wi but’ivenda, n’ôlubô, n’itwayuwa vo isindiṉa gw’ijanj’ibya, e be p’em̃èṉo z’egômbe zôdu;

⁸ ndô gôre waô wi dôṽ’impaga, ko w’ayogiṉ’ôgiligili, ndô wi jogiṉô ibe, e be dwaṉ’eguṉu ni ngambi.

⁹ Ndô azile n’azingô gw’iṉiny’edu ny’ôma wi janj’ibe, gw’alônga gôre mw’Iju, na gôre mwô’Grèk kè!

¹⁰ Ivenda, n’ôlubô, n’am̃ènjè gôr’ôm’edu wi dende mbya, gw’alônga gôre mw’Iju, na gôre mwô’Grèk kè!

¹¹ Konde Anyambyè e zele n’ôma wa simôsimô.

¹² Waôdu wi re fwem̃a pa ivanga fo wi be jilizô k’ivanga fo, na waôdu wi re fwem̃a pa gw’ivanga wi be jèkèlyô kè n’ivanga.

¹³ Konde arang’iyogisi y’ivanga yô be dwaṉ’agôre g’ôzô w’Anyambyè, ndô iyanjisi y’ivanga yô be dwaṉizô agôre.

¹⁴ Gô dend’aṉongo wi re wi zele n’ivanga alenda gô njaṉi yaô isam̃u y’ivanga, mongi siṉo wi re wi zele n’ivanga, wi re n’ivanga gw’ikuṽi yaômè;

¹⁵ wi tum̃iny’eṽilô z’ivanga zi re tèndô pa gw’irèm̃i yaô, n’irèm̃i yaô kè yi takilya, n’ipikilyi saô si soziza waô ntyo gô kaṉa waô.

¹⁶ E be twa yeṉo gô ntyugu yi be jèkèly’Anyambyè isam̃u yi ntyorya y’aṉaga vo Yesu‐Krist, ga nt’are Ntyangô yam̃ Mbya.

¹⁷ Ndô awè yi fweyô ne mw’Iju, aṽekely’ivanga, azôgwa n’Anyambyè;

¹⁸ awè y’avôrô kè ntondiṉi yè, avinja kè isam̃u yi r’imbya, konde ô re nènjô pa n’ivanga;

¹⁹ awè yi pikily’ôkuṽi wo inè, ô kèndy’apoku, ôzange wa mongi wi ro gô mpiri,

²⁰ ôṉènji wa mongi wi r’item̃u n’ôrevi wa mongi wi r’imya fo, konde gw’ivanga ô dèng’imya n’ôrèti;

²¹ sambô awè yi nènj’am̃ori, ô pa nènj’ôkuṽi womè? Awè yi kambiṉa inè, ayufa, ô jufa!

²² Awè yi bulya nè, aṽela wi ngaṉi, ô bela wi ngaṉi! Awè yi bik’ikaṉa, ô kwère yom̃a y’ôrunda!

²³ Awè yi sogwa n’ivanga, ô pèdy’Anyambyè n’ipav’ivanga!

²⁴ Konde ina ny’Anyambyè nyi pèdyô gôr’aṉongo gô ntiṉi yaṉi ga nt’are tèndô pa.

²⁵ Ikèra si re n’isolo, j’aw’adend’ivanga; ndô j’awè w’apav’ivanga, gambèṉ’ikèri so s’atweṉ’ôzombè.

²⁶ Sambô j’ôzombè apenjavenj’isômbya s’ivanga, gambèṉè ôzombè wè wi pa dwaṉa ga ikèra?

²⁷ Ôma wi r’ôzombè gô njaṉô yè, wi dend’ivanga, ave wè ôgara, awè yi re n’ôrèndo w’ivanga n’ikèra, ndô ô pav’ivanga?

²⁸ Mw’Iju arang’ayè yi re yeṉo g’ôkuṽa dadyè; n’ikèra kè aranga mèsoṉo si re g’ôzôṉe.

²⁹ Ndô mw’Iju ne yè yi re yeṉo gô gare ntye; n’ikèra kè ne s’ôrèm̃a, ga nt’ar’iṉiṉa, aranga ga nt’ar’ôrèndo. Isum̃inya sa mw’Iju wiṉo si pa pila gôr’aṉaga, ndô gôr’Anyambyè.