Ôsea 7 - Bibili 1927 (Omyene)

¹ Gw’aṽeli myè gô jing’Israèl, ibe s’Efrayim n’ibe si Samarya s’awôm̃wi, konde w’ayanj’itemiza; ôfwe ayingiṉi, ni nkondo y’ayiraṉi gw’igala.

² Wi pa pikilya gw’irèm̃i yaô inè, mi jônginy’ibe saô sôdu; vèṉo ijanji saô si kômbiṉa waô, si re g’ôzô wam̃.

³ Wi jeṉiz’ôga igeṽa n’ibe saô, n’ivangiṉi n’inôki saô.

⁴ Waôdu belaṉi, egolaṉi g’inyogo nyi jeg’ôgôṉi ne ôvikisi: e tiga gô jeg’ôgôṉi avila gw’ibinde mpèmba kwanga kaô y’apanda.

⁵ Gô ntyugu y’ôgi wazô, ivangiṉi yi pang’ikuṽi yaô gô jogw’inkaṉi vo ibuṉa s’ivè; ôga e nyonyuṉ’ôgo gôr’izèlyisi.

⁶ Wi kekiz’irèm̃i yaô g’inyogo gô bônda; ôvikisi waô e dèwa ôgwèra wôdu, n’ibanga inyogo nyi pya ga ôgôṉi wi bam̃iṉa.

⁷ Waôdu wi re mpyô ga inu, ayiliz’iyèkèli yaô; agi waô waôdu wi pôswa: e zel’ôma gôre waô e dagiṉa myè.

⁸ Efrayim e bunduṉ’ôkuṽi wè n’aṉongo, Efrayim ôlega wi re wi pa kaluṉô.

⁹ Agènda w’anyeṉi ngulu yè, ko yè amya nyô; idômbiṉa s’akôti yè, ko yè amya nyô.

¹⁰ Ekale z’Israèl zi takilya gôre yè; wi pa fwinya gôre Yeôva, Anyambyè yaô, wi pa butè g’ômwanja w’isam̃u yiṉo yôdu.

¹¹ Efrayim are ga ibembe ny’ôtem̃u, ikôtiza fo; wi dagiṉa Egipt, wi kènda gw’Asur.

¹² Ja w’akènda, mi be diry’isingi nyam̃ gôre waô, mi be sônya waô gô ntye ga inyoṉi s’ôrôṽa; mi be sônya waô ôgôm̃a, ga nt’amyezô waô gô mandô yaô.

¹³ Azile gôre waô, konde wi fanga myè! Ijiliza gôre waô, konde wi pava gôre myè! My’arô sungiṉi waô, ndô wi kamb’agamba m’inôka gôre myè.

¹⁴ Wi pa tônga gôre myè n’irèm̃i yaô, ndô wi deṉa gw’adô maô; wi dataṉa gô dèng’ibile n’ôbuka, ko waô sanjiṉa avila gôre myè.

¹⁵ My’are sônya pa waô ôgôm̃a, my’are joliza p’ago maô; ko waô bônde mbe gôre myè.

¹⁶ Wi pa fwinya gôr’Ôma w’Igôṉô; wi r’egolaṉi g’elendiṉa z’itemiza. Ivangiṉi yaô yi be pôswa n’ôkwara w’iwora, g’ômwanja w’ipèdya s’iṉèm̃è yaô. Siṉo si be panga waô gô sèlyô gô ntye y’Egipt.