Ôsea 6 - Bibili 1927 (Omyene)

¹ Yôgôṉi, azwè ga winyeṉi gôre Yeôva! Konde are jôkuṉa pa, ndô e be jinga zwè; are bôla pa, ndô e be kôriṉe vôri yazô.

² E be tôliza zwè gô ntyugu mbaṉi; na gô ntyugu yi ntyarô e be nongunya zwè, ko zwè dwaṉa bo g’ôzô wè.

³ Azwè ga mye, azwè ga wute gô mye Yeôva; ibyi sè si re rèti ga s’ijenja s’ôwenja. E be bya gôre zwè ga ningô, ga ningô yi ntyèla yi tèṽize ntye.

⁴ Mi be dendiṉo ande, awè Efrayim? Mi be dendiṉo ande, awè Yuda? Ômbyi waṉi wi re g’evindi z’ibanga, ga ômpèmbè wi sunge pyagaṉa.

⁵ Yeṉo mi be bôla waô n’ivogisi, mi be jôṉa waô n’agamba m’ôgwaṉi wam̃, n’ijèkèlyi sam̃ si be kogwa g’ôzange.

⁶ Konde mi tond’ômbya arang’intyagô, n’imya s’Anyambyè si re vyagaṉô n’intyagô si pezô.

⁷ Wi re g’aṉaga wi re pava pe njeka; vovo wi re dwaṉa p’ibekelyô fo gôre myè.

⁸ Galaad ne nkala y’iyanjisi y’ibe, yi re ni lingilyô yi ntyiṉa.

⁹ Nkumba y’imiṉisè yi re ga nkondo yi re gw’ebônda, njôṉaga gô mpoṉo yi Sikèm; konde w’apiṉ’ikuṽi yaô gô janj’ibe.

¹⁰ My’are jeṉa p’isam̃u y’ererya gô nagô y’Israèl; vovo Efrayim e belaṉa, Israèl e feva.

¹¹ Gôre wè kè Yuda egômbe z’iteṉa zi re kekizyô pa gôre wè, gô be fwiṉiza myè ikôte y’iṉongo nyam̃.