Ôsea 4 - Bibili 1927 (Omyene)

¹ Vôganyôṉ’igamba nyi Yeôva, aṉwè awaṉa w’Israèl! Konde Yeôva are n’ôzozo n’alwaṉi wi ntye, konde e zel’ôrèti, ge nkèngo, ge imya s’Anyambyè gô ntye.

² Are kaô itang’irangô n’inôka, ijôṉa, ijufa n’ôṽelaṉô, mbaô n’ôyôṉaṉô.

³ Yeṉo ntye yi be dwaṉa n’iwoga, waôdu wi dwaṉa gô yô wi be konga, waô n’inyam̃a s’iga n’inyoṉi s’ôrôṽa, vangaṉe intyuè si mbeṉe si be doṽa.

⁴ Ndô alwaṉ’ôma gô sungakaṉa, na gô sèmbe ntyèmbo; konde iṉongo nyo nyi re ga waô wi jôm̃aṉa n’imiṉisè.

⁵ Ô be pôswa ôm̃anda, ôvogisi kè na wè aṉwè be pôsw’ôgwèra, mi be jilize ngi yo.

⁶ Iṉongo nyam̃ ny’ajilizyô, konde ny’asiliṉô imya. Gô re nè ô re fala p’imya, myè kè mi be falo, ko wè alwaṉe miṉisè yam̃; konde ô re deṽaṉa p’ivanga ny’Anyambyè yo, mi be deṽaṉa kè awaṉi wo.

⁷ Gw’awuṉi waô pôlô, w’ayanj’ibe vyagaṉô gôre myè: mi be kaluṉ’ivendi nyaô gô ntyoṉi.

⁸ Wi nya ibe s’iṉongo nyam̃, ko waô nak’ibe saô.

⁹ Vovo be dwaṉe miṉisè ga iṉongo; mi be sônya waô ôgôm̃a ga nt’ar’impoṉo saô. Mi be pa waô ga nt’ar’ijanji saô.

¹⁰ Wi be nya ko w’ayôra, wi be belaṉa ko w’awuṉa, konde wi re tiga pe Yeôva n’ampangi mè.

¹¹ Ôṽelaṉô, ivè n’ôbuka yi periz’ôgu.

¹² Iṉongo nyam̃ nyi bamby’imôndo gôr’ikaṉi saô, n’ôtôngô wa mongi siṉo wi kamba na sô; konde iṉiṉa ny’ebelaṉi nyi fwem̃iza waô, ko waô belaṉa bô avila gôr’Anyambyè yaô.

¹³ Wi jir’intyagô gô sôsôlô y’inômba, wi peze yom̃a yi nkangô gô sanômba, gw’intiṉa s’imbilinga, na s’igana, na si rere yi re iviri nya yô nyi r’iṽya. Yeṉo awaṉi waṉi antô wi belô, n’antô w’awaṉi waṉi wi kôkô.

¹⁴ Mi ze sônye awaṉi waṉi antô ôgôm̃a konde wi belô, ge antô w’awaṉi waṉi konde wi kôkô, konde waômè wi jèrwa n’ôṽelaṉô, ayire ntyagô n’antô wi vôve. Iṉongo ny’item̃u nyi kènda gw’iperô.

¹⁵ J’awè Israèl w’ap’ôkuṽi wo g’ôṽelaṉô, Yuda alwaṉe ôgara; agèndaṉi gô Gilgal, ge panda gô Bèt‐Avèn, ge tang’ôrangô inè: Yeôva are bo!

¹⁶ Konde Israèl are pava pa ga mwô’nyare nyantô yi kegwagegwa, gambèṉè Yeôva e be nyeza waô ga mw’idombè gw’imbôr’impôlô.

¹⁷ Efrayim are diṽa pa gw’ikaṉa, rigè diyè!

¹⁸ Ijongi saô s’amaṉi, wi piṉ’ikuṽi yaô g’ôṽelaṉô; ivangiṉi yaô yi nake ntyoṉi.

¹⁹ Ômpunga wi be kôrè gw’ampavi mè, ko waô jeṉe ntyoṉi g’ômwanja w’intyagô saô.