Ôsea 14 - Bibili 1927 (Omyene)

¹ Israèl, winya gôre Yeôva, Anyambyè yo, konde w’apôswi n’ibe so.

² Wongaṉi na ṉwè agamba, ko fwinyaṉi gôre Yeôva. Wulinyaṉi yè inè: Nyez’ibe sôdu, ko bonga zwè ni mbya! Azwè be jiriṉo intyagô gw’inyanga nyi jir’inyam̃a, azwè be po isum̃inya s’iṉumbu yazô.

³ Mw’Asur e ze sungiṉe zwè, azwè ze pande gw’ikavala, n’azwè ze bulye nyèṉè gw’ijanja s’ago mazô inè: Aṉwè ne Anyambyè yazô! konde inyam̃uṉa si dèng’ipôgiṉa gôre wè.

⁴ Mi be jing’ipavi saô, mi be tonda waô pôlômè, konde eguṉu zam̃ z’akegwi avila gôre waô.

⁵ Mi be dwaṉa ga ômpèmbè gôr’Israèl, e be punjiṉa g’ilanga, e be koguny’iramba ga Liban.

⁶ Ampari mè mi be nyonywa; e be dwaṉa n’eranga z’erere zi yôlivi, ni nkangô yi Liban.

⁷ Wi be fwinya gô dwaṉa gw’iviri nyè, wi be tôlize frômènte, avunjiṉa g’ôgoli; wi be dwaṉa n’elum̃i z’ivè nyi Liban.

⁸ Efrayim, ezande zi re na myè gô tô denda n’ikaṉa? mi be pôganyô yè, mi be pônè, mi be dwaṉa gôre yè ga ôgana ôvezô, ô be dèng’ilôndi yo avila gôre myè.

⁹ Ayè yi re n’imya e ga ṽandam̃iṉe gw’isam̃u yiṉo! ayè yi re n’ôkeli e ga gôtize yô! konde impoṉo si Yeôva si re gôre; agôre wi be kangaṉa gô sô, ndô ivavisi yi be pôswa gô sô.