Ôsea 13 - Bibili 1927 (Omyene)

¹ Gw’agambag’Efrayim, avegag’ererya; avendi ôkuṽi wèmè gôr’Israèl. Ndô arweṉ’ôgara vo Baal, n’ayuwi yè.

² Ndô vèṉo wi re kaô ndendag’ibe, wi pangiṉ’ikuṽi yaômè ikaṉa si jirô waô ni siki yaô ya pupu, n’ikaṉa si pangô waô n’ikôtizi saômè; sôdu ijanja s’akèngèkèngè. Wi bulya g’ômwanja wa sô inè: waô wi jir’intyagô wi ga zombe awônyare!

³ Yeṉo wi be dwaṉa g’evindi z’ibanga, ga ômpèmbè wi sunge pyagaṉa, ga wulu yi pèvizô n’ômpunga avila gw’irèṽiṉô ny’ilônda, ga ôtutu wi kogwa gô windè.

⁴ Na myè, myè ne Yeôva, Anyambyè yo, avila gô ntye y’Egipt. Ô pa my’Anyambyè nyèṉè kaô myè, e zel’ôzungè kaô myè.

⁵ My’amyeṉi wè gw’itôve, gô ntye ya kaka.

⁶ W’ayôri g’ôrôve waô; w’ajôri, n’avend’irèm̃i yaô; yeṉo wi re deṽaṉa pa myè.

⁷ Mi be dwaṉa gôre waô ga liyoni; mi be bèmba waô ga njègo gô mpoṉo.

⁸ Mi be nwa na waô ga ursi yi re bongiṉô p’awaṉi wè, mi be jôkuṉ’eliṽiṉi z’irèm̃i yaô; mi be nya waô ga liyoni nyantô; inyam̃a s’iga si be nyigyanyigya waô.

⁹ Israèl, ezom̃a zi pang’ijilizi so, ne gôre wè sira pa myè, gô sir’ôma wi re ni ngulu gô nunguṉo.

¹⁰ Sambô ôgi wo are gweṉi? ko yè sungiṉo gw’inkali so sôdu! iyèkèli yo yi re gweṉi, yi bulyôgô wè inè: vaṉi myè ôga n’ivangiṉi?

¹¹ My’are wè pa p’ôga gw’eguṉu zam̃, mi be tômbè gw’ibendi sam̃.

¹² Ifwem̃a s’Efrayim si re penjavenjô pa, ibe sè si re pigô pa.

¹³ Nkaza y’ômwantô wi jaṉa yi be bya gôre yè; ayè n’ômwaṉa wi re n’imya sa kwè, konde e dinga gô kogwa avila gw’iwum̃u nyi ngwè, j’egômbe z’akeki.

¹⁴ Mi be danduṉa waô avila gô ngulu y’ilômbô, mi be sungiṉa waô avila gw’ijuwa. Ijuwa, evungi zo zi re gweṉi? ilômbô, ijilizi so si re gweṉi? ndô iniga si nkôndi si jumbuṉô gw’antyo mam̃!

¹⁵ Vangaṉ’Efrayim ajaṉ’ilônda gôr’awareri yè, ômpunga wi nkôṽa yi tongwa ni nkômbe wi be bya, ômpunga wi Yeôva wi be nongwa avila gw’itôve, wi be kam̃iny’ikèy sè, n’igerômbeṉe yè yi be kam̃iṉa kakaka. Igumba nyi vagô yôdu yi njôni nyi be kwèrô.

¹⁶ Samarya yi be sôny’ôgôm̃a, konde are pava pa gôr’Anyambyè yè. Wi be pôswa n’ôkwara w’iwora; awaṉi waô arumbe wi be nyigyanyigyô, n’anyem̃e m’antu waô mi be jaruṉô.