Ôsea 11 - Bibili 1927 (Omyene)

¹ Gw’avegag’Israèl erumbe, my’arondagi yè, n’aweyi myè ômwaṉi wam̃ avila gw’Egipt.

² Ndô w’adubwi bô avila gôre mongi w’aweyi waô; wi re jira p’intyagô gôre Baal, aveze yom̃a yi nkangô gôr’ikaṉa si mpaṉôgô.

³ My’aṉènji Efrayim gô kènda, azimbyè n’ago mè; ndô wi pa kôtiza inè, my’ayingagi waô.

⁴ My’aluri waô n’igoli yi nkèngo, n’igôrô y’itonda, my’alwaṉi gôre waô g’ayè yi tômbe mpanga avila gw’agwaṉi maô, n’alôṽinyi myè waô inya.

⁵ Wi ze fwinye gô ntye y’Egipt; ndô mw’Asur e be dwaṉ’ôgi waô, konde w’aṽiki gô fwinya gôre myè.

⁶ Ôkwara w’iwora wi be dwaṉa gw’inkali saô, wi be jiliza any’ivenjavenji yaô, g’ômwanja w’imôndo si re waô bônda pa.

⁷ Iṉongo nyam̃ nyi kenja gô dubwa avila gôre myè; wi fweyô gôr’Ôma w’Igôṉômè, ndô e zel’ôma gôre waô wi sum̃inyè.

⁸ Mi be denda sè g’ômwanji wo, Efrayim? mi ga zungiṉe wè, Israèl? mi ga lendiṉe wè ga Adma? mi ga vange wè ga Zebôyim? Ôrèm̃i wam̃ wi sugyazugya gô gare ntye yam̃, ipôgiṉi sam̃ sôdu si kôtô n’ikèsi.

⁹ Mi ze dende ga nt’ar’eguṉu zam̃ evôlô, mi bika gô jiliz’Efrayim; konde myè ne Anyambyè, arang’ôma, myè n’Ônkèrènkèrè gô garegare yo; mi ze bye n’eguṉu.

¹⁰ Wi be sônge Yeôva, yi be kungula ga liyoni, konde e be kungula, n’awaṉa wi be pale mangô avila gô ntyuṽa.

¹¹ Wi be pale mangô avila gw’Egipt, ga nyoṉi, n’avila gô ntye y’Asur, ga ibembe, mi be panga waô gô dwaṉa gw’inagô saô, bulye Yeôva.