Ôsea 10 - Bibili 1927 (Omyene)

¹ Israèl avegagi ôgoli wi jaṉa pôlô, w’ayaṉag’ilônd’imyenge. Gw’ibuṉa s’ilôndi yè, awuṉizi yè imbôra si jirô intyagô; g’ômbyambye wi ntye yè, am̃èpizi yè ikaṉa.

² Irèm̃i yaô y’akeraṉi, wi be dènge njuke. Yeôva e be jôṉ’imbôri saô si jirô intyagô, e be jiliz’ikaṉi saô.

³ Na kwè wi be bulya inè: Azw’azele n’ôga, konde azwè pa tye Yeôva; n’ôga ko jolye dend’ande gôre zwè?

⁴ Wi kamb’agamba m’enyalè, n’irangô y’inôka, gô jeka waô njeka: yeṉo ôgôm̃a wi be pôm̃a, ga igônjw’iṽe gw’amemba m’itôve.

⁵ Alwaṉi wi Samarya wi be dwaṉa n’itya g’ômwanja w’awônyare wi Bèt‐Avèn; iṉongo nyi be dwaṉa n’iwoga g’ômwanja w’ôgaṉa, n’imiṉisè sa wô si be tatam̃iṉa gô wô, g’ômwanja w’ivenda nya wô, nyi re ko dubwa avila gôre waô.

⁶ Wô be twaṉô gw’Asur, gô dwaṉa ga ezom̃a zi mpagaga gôr’ôga Yarèb. Efrayim e be kôtô ne asayi, n’Israèl e be jeṉe ntyoṉi g’ômwanja w’imôndo sè.

⁷ Samarya ajilizyô, n’ôgi wè are ga ivuṉi gw’aṉingô.

⁸ Imbôr’indôndwi si Bèt‐Avèn, si r’Israèl janja p’ibe, si be jilizô; irèndè ni falifa si be pôm̃a gw’imbôri saô si jirô intyagô. Wi be buliny’inômba inè: Vugaṉi zwè! na gô sanômba inè: Vôswaṉi gôre zwè!

⁹ Israèl, ô re janja p’ibe avila gw’intyugu si Gibea! w’agum̃aṉi vovo gôre, igoṽi gôr’arègo nyi re date waô gô Gibea.

¹⁰ Mi be sônya waô ôgôm̃a gô ntondiṉi yam̃, n’aṉongo mi be dataṉa gô sira waô, gô be kôrô waô g’ômwanja w’ifwem̃i saô baṉi.

¹¹ Efrayim ne nyare nyantô yi re nènjô pa, na yi tonda gô jar’ilônda, ndô mi be susa pyèrè g’ômpele wè ômbya; mi be fwele mpanga gw’Efrayim, Yuda e be tumbe ntye, Yakob e be nyigyanyigy’amunga m’iroy.

¹² Nyènyaṉi ga nt’ar’ôgôre, reṉaṉi ga nt’are nkèngo, ko tumbaṉi ntye nyoṉa! konde r’egômbe gô bute Yeôva, kaô abya, ayir’ôgôre gôre ṉwè.

¹³ Aṉw’are tumba pe mbe, aṉw’are teṉa p’ibe, aṉw’are nya p’ilônda y’inôka; konde w’aṽekelyi mpoṉo yo, gô ntangô y’iṽèmbi yo.

¹⁴ Sambô e be nongw’edungu gôr’iṉongo nyo, n’inagô so injoli sôdu si be jilizô, ga nt’ayilizô Salman‐Bèt‐Arbèl, gô ntyugu y’igoṽi, yi re ôbôta anyigyanyigyô n’awaṉi wè.

¹⁵ Yeṉo be dendô gôre ṉwè gô Betèl, g’ômwanja w’ibe saṉi sipôlômè. Gw’ijenja s’ôwenja ôga w’Israèl e be teṉô nkwe.