Ôkambi 1 - Bibili 1927 (Omyene)

¹ Agamba m’Ôkambi, y’ômwaṉa wi David, y’ôga wi Yerusalèm.

² Enyalè z’enyalè, buly’Ôkambi, enyalè z’enyalè, yôdu enyalè.

³ Ôba nde wi dèngô n’ôma gw’ijanji sè sôdu si janjô yè g’ôdôlôngô wi nkômbe?

⁴ Ivôm̃’im̃ori nyi pyagaṉa, ivôm̃’inyèṉè nyi bya, ndô ntye yi dwaṉa pèkèpèkè.

⁵ Nkômbe yi tongwa, nkômbe kè yi kènda; aṉegiza gô fwinya gô mbôra ya yô yi tongwa na yô.

⁶ Ômpunga wi kènda gô Sud, awinya gô Nor; avila vovo wi tô fwinya, aṽya gw’igom̃a mèmô.

⁷ Itèmbo sôdu si kogwa gô ntyuṽa, ndô ntyuṽa yi pa jônya; si re kaô nkèndaga gô mbôra yi kèndô sô.

⁸ Yom̃a yôdu yi re ralye n’ijanja vyagaṉô ni nt’ar’ôma ko bulya; intyo nyi pa jôra n’ijeṉa, ge ôrôy jasa gô jogo.

⁹ Ezom̃a zi re pila pa, zô mèmô zi be tô dwaṉa, n’ezom̃a zi re dendô pa, zô mèmô zi be tô dendô; e zel’ezom̃’ezoṉa g’ôdôlôngô wi nkômbe.

¹⁰ J’ar’ezom̃a zi bulyô inè: Vôn’ezom̃a ziṉo, zi r’ezoṉa! ezom̃a mèzoṉo zi re dwaṉa pa gw’ampôm̃a m’alônge dwaṉi gô bôsô yazô.

¹¹ E zel’ijônginya si yom̃a lungu; n’isam̃u yi be twa gô bôsô yi ze tig’ijônginya gôre waô wi be dwaṉa gô num̃uṉa.

¹² Myè, Ôkambi, my’are dwaṉa p’ôga w’Israèl gô Yerusalèm.

¹³ My’aveṉ’ôrèm̃i wam̃ gô buta na gô kèlagèla n’imya isam̃u yôdu yi dendô g’ôdôlôngô w’ôrôṽa: zô n’eṽilô eyoli zi pô awaṉa w’ôma n’Anyambyè.

¹⁴ My’are jeṉa pe yom̃a yôdu yi dendô g’ôdôlôngô wi nkômbe; na vôna, yôdu enyalè, enyal’erevô.

¹⁵ Ezom̃a zi re règo z’ayolye tô kum̃anyô, n’ezom̃a zi sila z’ayolye tangô.

¹⁶ My’awulyi g’ôrèm̃i wam̃ inè: Vôna, my’are penda pa alèng’imya vyagaṉô na waôdu w’alônge pangiṉi gô Yerusalèm myè ṽyagaga ro, n’ôrèm̃i wam̃ wi re jeṉa p’imy’ijenge n’ikôtiza.

¹⁷ My’aveṉ’ôrèm̃i wam̃ gô my’imya, na gô mye nkende n’edosu; my’agôtizi nè, ziṉo kè enyal’erevô.

¹⁸ Konde vangaṉ’imya si buṉa, injuke si buṉa kè, n’ayè yi buṉiz’imyi sè e pendiza kè injuke sè.