Neemya 1 - Bibili 1927 (Omyene)

¹ Agamba mi Neemya, y’ômwaṉa w’Akalya. N’arweṉi g’ôgwèli wi Kislèv, g’ômpum̃a w’agôm̃i ambaṉi, gw’avegagi myè gô Suzi, gô nkala mpôlô,

² aṽyeṉ’Anani, ôm̃ori gôr’awareri yam̃, n’aṉôm̃e awèwo avila gô Yuda. N’aṽambyi myè waô g’ômwanja w’Iju s’arôli, s’arigyô avila gw’ikôte, na g’ômwanja wi Yerusalèm.

³ N’awiṉizi waô myè inè: Waô w’arigaṉi avila gôr’ikôte, wi re gw’iṉongo gw’azingw’ampôlô ni ntyoṉi; ikômba si Yerusalèm s’ajuwi kè, n’aguge ma sô m’apezyô n’ôgôṉi.

⁴ N’arweṉi gw’ayogyô myè agamba miṉo, my’alwaṉi baru, n’aleṉi myè ayeṉ’ekèṽa intyugu sinyenge. My’aveng’esônge agambiṉa g’ôzô w’Anyambyè y’ôrôṽa, awulya mè:

⁵ Mi kweno inkolo, Yeôva, Anyambyè y’ôrôṽa, Anyambyè mpôlô na y’ererya, awè yi penjavenje njeki yo arum̃inye nkèngo gôre waô wi tondo n’avenjavenj’isômbyi so!

⁶ Ôrôy wo wi ga vôganyô ko antyo mo nungwa: vôganyô ikambiṉa si kambiṉô wè nyôngô yo egômbe ziṉo ôm̃anda n’ôgwèra g’ômwanja w’inyôngô so awaṉa w’Israèl, mèmaga ibe s’awaṉa w’Israèl, ibe sazô gôre wè; konde myè ni nagô ya reri yam̃ azw’are janja p’ibe.

⁷ Azw’are fwem̃iṉo pa, n’azwè pa penjavenj’isômbyi so, n’ampangi mo, n’intyale so s’azômbyô wè gôre nyôngô yo Môsès.

⁸ Yônginy’igamba nyiṉo ny’azômbyô wè gôre nyôngô yo, Môsès, inè: J’aṉw’ajanj’ibe, gambèṉè mi be pazangaṉa ṉwè gôr’aṉongo;

⁹ ndô j’aṉw’afwinya gôre myè, ko ṉwè penjavenj’isômbyi sam̃ alenda sô, gambèṉè vangaṉ’aṉw’afalô gô ntyay y’ôrôṽa, avila vovo mi be tô datiza ṉwè arô baga ṉwè gô mbôra yi re myè pinja pa gô pang’ini nyam̃ gô dwaṉa vovo.

¹⁰ Wi r’inyôngô so n’aṉagi wo, wi re wè danduṉa pa ni ngulu yo mpôlô n’ôgo wo wi ngulu.

¹¹ Kokolo! Rera, ôrôy wo wi ga vôganyô ikambiṉa si nyôngô yo, na gw’ikambiṉa s’inyôngô so si bela gô ty’ini nyo! Vange nyôngô yo ṉèṉo wiṉo gô kènda mbyambye, avange gô dèng’imèpiṉô gw’antyo m’ôṉôm̃e wiṉo! Egômbe mèzoṉo my’avegagi sôri y’ôga.