Matay 7 - Bibili 1927 (Omyene)

¹ Ayèkèlyaṉi, gambèṉè aṉw’ayèkèlyô.

² Konde ôyèkèlyô wi jèkèlya ṉwè am̃ori, wô be jèkèlyô ṉwè, n’egèṉizô zi kèṉizô ṉwè gôr’am̃ori, zô be kèṉizô gôre ṉwè.

³ Ntiṉa nde yi pôno nkizi yi re gw’intyo nya mwô’ngi yo, ko w’avikily’ ôkoga wi re gw’intyo nyomè?

⁴ Ge awè ko bulinya mwô’ngi yo inè: Ndare mi tômbare nkizi yi re gw’intyo, na vôna, ô re n’ôkoga gw’intyo nyomè?

⁵ Awè ômbyagwaṉa, lônge tômb’ôkoga avila gw’intyo nyo, gambèṉè ô be jeṉa zange gô tômbe nkizi avila gw’ intyo nya mwô’ngi yo.

⁶ Avaṉ’imbwa yom̃a y’ôrunda, awalaṉi kè adô maṉi ambya gw’azô m’ingôwa, si vende jara mô n’intyôzô saô, arô fwinya awonja ṉwè.

⁷ Ṽambyaṉi, gambèṉè aṉw’apô; wutaṉi, gambèṉè aṉw’adènga; lôkaṉi, gambèṉè ny’ aṉunguṉô ṉwè.

⁸ Konde ôm’edu e bambya e bonga, n’ayè yi buta e dènga, na gôre yè yi dôka nyi be nunguṉô.

⁹ Ôma me mande gôre ṉwè are jog’ômwaṉi wè abambyè mpèmba, ko yè pè idô?

¹⁰ Ge ja abambyè ntyuè ko yè pè ôm̃amba?

¹¹ Sambô j’aṉwè aṉag’aṽe aṉw’avôrô gô p’awaṉi waṉi yom̃a ṽya, ko pôrô Reri yaṉi yi re g’ôrôṽa e be pe yom̃a ṽya gôre waô wi bambyè.

¹² Sambô isam̃u yôdu yi belô ṉwè inè, aṉaga wi ga lendiṉe ṉwè, lendaṉi yô kè gôre waô, konde nyiṉo n’ivanga n’ivogisi kè.

¹³ Yingiṉaṉi g’ômpômbala wa zwa, konde ômpômbala wi r’ômpôlô, ni mpoṉo yi r’ômpuzu wi kènda gw’ijiliza, n’awenge wi jingiṉa gô yô.

¹⁴ Ndô ômpômbala wi re zwa, ni mpoṉo yi re nyangô yi kènda gw’em̃èṉo, na wa kwè waô dènga yô.

¹⁵ Gelimaṉi gôr’ivogisi y’môka yi bya gôre ṉwè n’egolaṉi z’adombè, ndô gô gare ntye waô injègo si sasuṉa.

¹⁶ Aṉwè be mya waô n’ilôndi yaô. Aṉaga wi dule dukatonda avila gw’arèndè, ge ifigi avila gw’ imbara?

¹⁷ Erery’edu eṽya zi jaṉ’ ilônd’imbya, ndô erer’eṽe zi jaṉ’ilônd’imbe.

¹⁸ Erer’eṽya z’ayolye jaṉ’ilônd’imbe, erer’eṽe kè z’ayolye jaṉ’ilônd’imbya.

¹⁹ Erery’edu zi re z’ayaṉ’ ilônd’imbya, zi begô avungô g’ôgôṉi.

²⁰ Sambô aṉwè be mya waô n’ilôndi yaô.

²¹ Arang’ôm’edu e bulinya myè inè: Rera, Rera! e be jingiṉa gw’iṉongo ny’ôrôṽa, ndô ayè yi dende ntondiṉi ya Reri yam̃ yi re g’ôrôṽa.

²² Awenge wi be bulinya myè gô ntyugu mè inè: Rera, Rera, azwè pa poge n’ini nyo? Azwè pa tômb’aṉiṉ’ambe n’ini nyo? na gw’ini nyo azwè pa dende lemba yenge?

²³ Gambèṉè mi be bulinya waô buku inè: Mi pa mya ṉwè ni mori, lubwaṉi avila gôre myè, aṉwè yi janj’ibe.

²⁴ Sambô ôm’edu e jogw’agamba miṉo mi bulyô myè, alenda mô, e be kolaṉô g’ôma w’ôkeli aṉôgi nagô yè gw’idô.

²⁵ N’aṉogi ningô, n’avôv’intônda, n’avèviṉi ômpunga awôle nagô mè, ndô yi re tugwe, konde y’avevagi dôṽyô pa gw’idô.

²⁶ Ndô ôm’edu e jogw’agamba miṉo mi bulyô myè, ko alenda mô, e be kolaṉô g’ôma w’ôtem̃u aṉôgi nagô yè g’ôzègè.

²⁷ N’aṉogi ningô, n’avôv’intônda, n’avèviṉi ômpunga awôle nagô mè; n’arugwi yô, n’itugwa sa yô s’arweṉi sipôlô.

²⁸ N’arweṉi gw’amazi Yesu agamba miṉo, aṉaga w’am̃am’inènji sè;

²⁹ konde aṉènjagi waô g’ôma re n’inyanga, n’aranga g’irèndisi.